ރިޔާސީ އިންތިހާބުގެ ދެވަނަ ބުރަކަށް ދިއުމުން، ކޯލިޝަން ހަދައި، ސަރުކާރުން ބައި އަޅަން ނުތިބެން ގޮވާލައްވައި، އެހެން ބައެއް ޕާޓީތަކަށް ރައީސް އިބްރާހީމް މުަހްމަދު ސޯލިހު ދެއްވި މެސެޖަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް މިރޭ ރައްދު ދެއްވައިފި އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ކެމްޕޭން ކުރައްވަން ބ. ކެންދޫގައި ބޭއްވި ޖަލްސާއެއްގައި ރައީސް ވިދާޅުވީ ރިޔާސީ އިންތިހާބަށް ނިކުމެ ތިބި ކެންޑިޑޭޓުންގެ ތެރެއިން ސީރިއަސްކޮށް މަސައްކަތް މަސައްކަތް ކުރަނީ މަދު ކެންޑިޑޭޓުން ކަމަށެވެ. އަދި ދެން ތިބި ކެންޑިޑޭޓުން މަސައްކަތް ކުރަނީ އިންތިހާބު ދެވަނަ ބުރަކަށް ގެންދިއުމަށް ކަމަށެވެ. އެއަށް ފަހު އެހެން ރަށްރަށުގައި ވެސް އެހެން ވިދާޅުވި އެވެ.
ނަމަވެސް ވަކި ބޭފުޅެއްގެ ނަން ރައީސް ވިދާޅެއް ނުވެ އެވެ.
ޖުމްހޫރީ ޕާޓީ (ޖޭޕީ) އިން ނ. މަނަދޫގައި މިރޭ ބޭއްވި ޖަލްސާގައި ގާސިމް ވިދާޅުވި އެޕާޓީން މިހައިތަނަށް ވާދަކުރި ދެ އިންތިހާބުގައި ވެސް ނާކާމިޔާބު ވުމުން "ދިޔައީ ގެއަށް" ކަމަށެވެ.
މަލްޓި ޕާޓީ ނިޒާމު ރާއްޖެއަށް ތައާރަފުކުރި ފަހުން މިހާތަނަށް ބޭއްވި ތިން އިންތިހާބުގައި ވެސް ކާމިޔާބުކުރި ޕާަޓީއާއެކު ޖޭޕީ އޮތީ ކޯލިޝަން ހަދައިގެންނެވެ. ގާސިމް ވިދާޅުވީ އެގޮތަށް އެކަންވީ ސިޔާސީ ޕާޓީތަކުން އިސްވެ ދިން ދައުވަތުން ކަމަށް އޭނާ ސިފަކުރެއްވި އެވެ.
"އެފަހަރު އަޅުގަނޑުމެން ނުހޮވުނީމާ ވެސް ދިޔައީ ގެއަށް. ގޭގައި ތިބީ، 2013 ގައި ވެސް. އަޅުގަނޑުމެން ނުދަން ޕީޕީއެމް ކައިރިއަކަށް , އަޅުގަނޑުމެން ނުދަން އެމްޑީޕީ ކައިއަކަށް. އެބޭފުޅުން އައީ . ވަށަވަށައިގެން މީހުން ފޮނުވައިގެން. މިވެނި ޕަސެންޓެއް ދޭނަން، އެވެނި ޕަސެންޓެއް ދޭނަން، މިހާ ލާރި ދޭނަން، އެހާ ލާރި ދޭނަން ކިޔަކިޔާފައި އައީ. އަޅުގަނޑުމެން ލާރިއަކު ވެސް ނުހިފަން،" ގާސިމް ވިދާޅުވި އެވެ.
ގާސިމް ވިދާޅުވި ގޮތުގައި 2008 ގައި އެމްޑީޕީ، 2013 ގައި ޕީޕީއެމުން ކޯލިޝަން ހަދަން އައުމުން ވެސް ޖޭޕީން ހުށަހެޅި ހަމަ އެކަނި ކަމަކީ އެޕާޓީގެ މެމްބަރުން، ލެވެން އޮތް އެންމެ އިސް މަގާމުތަކަށް ލުމެވެ.
ގާސިމް ވަނީ އެ ދެ އަހަރުގެ ގެ ރިޔާސީ އިންތިހާބުގައި ވެސް ވާދަކުރައްވައިފަ އެވެ. 2008 ވަނަ އަހަރު ގާސިމަށް ލިބުނީ ވޯޓުލީ މީހުންގެ 15 ޕަސެންޓެވެ. އަދި 2013 ގައި ގާސިމަށް ލިބުނީ ވޯޓުލީ މީހުންގެ 24 ޕަސެންޓެވެ.
ދެ އިންތިހާބުގައި ވެސް ދެ ވަަނަ ބުރަށް ދެވޭ ވަރަށް ގާސިމަށް ވޯޓު ނުލިބުނު ނަމަވެސް އެ ދެ ފަހަރު ވެސް އިންތިހާބު ކާމިޔާބުކުރީ ގާސިމްގެ ތާއީދު އޮތް ކެންޑިޑޭޓެވެ. އަދި ދެވަނަ ބުރުގައި، އެ ދެ އަހަރު ވެސް، ގާސިމް ތާއީދު ކުރެއްވީ ފުރަތަމަ ބުރުގައި ދެވަނައަށް އެންމެ ގިނަ ވޯޓު ލިބުނު ކެންޑިޑޭޓަށެވެ.
ރައީސް މުހައްމަދު ނަޝީދާއި ރައީސް އަބްދުﷲ ޔާމީން ވެސް ސަރުކާރު އެކުލަވާލީ ޖޭޕީއަށް ހިއްސާއެއްދޭ ގޮތަށެވެ.
އެންމެ ފަހުން 2018 ގެ ރިޔާސީ އިންތިހާބު އޮތް އިރު، ގާސިމް ހިމެނޭހެން އޭރުގެ އިދިކޮޅު ހުރިހާ ލީޑަރުން ތިބީ ޖަލު ހުކުމެއްގައި ނުވަތަ ހުކުމެއް ނެތި ބަންދުގަ އެވެ. އެހެންވެ ގާސިމްގެ ޖޭޕީގެ އިތުރަށް އެމްއާރުއެމާއި އަދާލަތު ޕާޓީން ތާއީދުކުރީ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހަށެވެ.
