ޖުމްހޫރީ ޕާޓީގެ ކެންޑިޑޭޓު ގާސިމް އިބްރާހިމްގެ ވެރިކަމެއްގައި ކޮންމެ ރަށެއްގެ މަލަމަތިން ރީތި މިސްކިތެއް ފެނިގެންދާނެ ކަމަށް އޭނާ މިއަދު ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕޭނުގައި ގާސިމް ނ. މާޅެންދޫއަށް ވަޑައިގެން އެ ރަށުގައި ވާހަކަ ދައްކަވަމުން ގާސިމް ވިދާޅުވީ ކޮންމެ ރަށެއްގެ އަތިރިމަތީގައި ރަނގަޅު ފެންވަރެއްގެ މިސްކިތެއް ބިނާ ކުރާނެ ކަމަށެވެ. އެއީ އަންހެނުންނާއި ފިރިހެނުންނަށް ވެސް ނަމާދު ކުރެވޭ ގޮތަށް، ޒަމާނީ ވަސީލަތްތަކާއެކު ގާއިމުކުރާ މިސްކިތްތަކެއް ކަމަށާއި މިސްކިތްތައް އެއާ ކަންޑިޝަން ވެސް ކުރާނެ ކަމަށް އޭނާ ވިދާޅުވި އެވެ.
ހުރިހާ މިސްކިތެއް ފުރަތަމަ ދެ އަހަރު ދުވަހުގެ ތެރޭގައި އެއާ ކަންޑިޝަން ކުރާނެ ކަމަށް ވެސް ވިދާޅުވި އެވެ.
ކޮންމެ ރަށެއްގެ ހުރިހާ ކްލާސް ރޫމެއް ވެސް އެއާ ކަންޑިޝަންކޮށް، ސްމާޓު ބޯޑު ހަރުކޮށްދޭނެ ކަމަށް އަދި ސްކޫލުތަކުގެ ކޮމްޕިއުޓަރު ލެބްތައް ވެސް އާކޮށްދޭނެ ކަމަށް ގާސިމް ވަނީ ވައުދުވެވަޑައިގެންފަ އެވެ.
ގާސިމް ވިދާޅުވީ އޭނާ ރިޔާސީ އިންތިހާބަށް ނުކުމެ ހުންނެވީ ރައްޔިތުންނަށް ހެޔޮ ވެރިކަމެއް ހޯދައިދީ، ދީނާއި ގާނޫނުއަސާސީ ނަގަހައްޓާނެ ވެރިކަމެއް ގެނެސް ދިނުމަށް ކަމަށެވެ. އޭނާގެ ވެރިކަމެއްގައި ރައްޔިތުންގެ ހައްގުތައް ކަށަވަރުކޮށްދެއްވާނެ ކަމަށާއި ހުރިހާ ރަށްތަކެއްގެ ރައްޔިތުން ތަރައްގީގެ އާ ހަރުފަތްތަކަކަށް ގެންގޮސްދެއްވާނެ ކަމަށް ވެސް ވިދާޅުވި އެވެ.
އިސްލާހީ މަސައްކަތް ކުރީ އަމިއްލަ އެދުމެއްގައި ނޫން ކަމަށާއި ދިވެހިންނަށް ފަހިކަމާއި ރޯޝަނީކަން ހޯދައިދޭން ކަމަށް ވެސް ގާސިމް ވަނީ ވިދާޅުވެފަ އެވެ.
"އެ ބައިމީހުންނަށް ތަނަވަސްކަމާއި އުޖާލާކަމާއި ފަހިކަމާއި ރޯޝަނީކަން ހޯދައި ދިނުމަށް އަޅުގަނޑު މަސައްކަތް މި ކުރަނީ،" ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް ހދ. ފިނޭގައި އިއްޔެ ވިދާޅުވި އެވެ.
