ރައްޔިތުންގެ މަޖިލީހުގެ ރައީސް އަދި މޯލްޑިވިއަން ޑިމޮކްރެޓިކް ޕާޓީގެ އެއް ބާނީ މުހައްމަދު ނަޝީދު އެ ޕާޓިން ވަކިވެވަޑައިގަތުމުން ޕާޓީއަށް ލޮޅުމެއް އައި ކަމަށާއި ނަމަވެސް މިހާރު މެމްބަރުން ތިބީ ޕާޓީއާއެކު ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.
ކުރިއަށް އޮތް ރިޔާސީ އިންތިހާބުގެ ކެމްޕެއިނަށް ބ. ތުޅާދޫއަށް ވަޑައިގެން އެ ރަށުގައި ވާހަކަ ދައްކަވަމުން ރައީސް މިރޭ ވިދާޅުވީ، އެމަނިކުފާނު ހިމެނިވަޑައިގަންނަވާ ގޮތަސް އެމްޑީޕީގެ އެންމެ އިސް ދެ ލީޑަރުންގެ މެދުގައި ޖެހުނު މައްސަލައިގެ އަސަރު "ބައެއް ރަށްރަށުގައި ކުރިން ކޮށްފައި ހުރި" ކަމަށެވެ.
"އެމްޑީޕީގެ ތެރޭގައި ކުޑަ ލޮޅުމެއް އަރައިފި. އޭގެ އަސަރު ތުޅާދޫގައި ވެސް ޖެހުނު. [އެކަމަކު] އެ މަންޒަރު މިދަނީ ބަދަލުވަމުން. ދެވުނު ހުރިހާ ރަށަކުން ވެސް، ބައެއް ރަށްރަށުގައި މީގެ އަސަރު ކުރިން ކޮށްފައި ހުރި. ނަމަވެސް ބަދަލުވަމުން، ބަދަލުވަމުން އައިސް އެމްޑީޕީއާއެކު, އަސްލު އެމްޑީޕީގެ މެމްބަރުން ނުކުމެ ތިބިތަން ފެނޭ. ވަރަށް ސާފުކޮށް ފެންނަނީ އިންތިހާބު ބޮޑުތަނުން ކާމިޔާބު ކުރާ ތަން،" ރައީސް ވިދާޅުވި އެވެ.
ނަޝީދު އެމްޑީޕީން އިސްތިއުފާ ދެއްވީ، މިދިޔަ ޖެނުއަރީގައި ބޭއްވި ރިޔާސީ ޕްރައިމަރީގައި ލިބިވަޑައިގެންނެވި ނާކާމިޔާބީއަށްފަހު ޖޫން، 21، ގަ އެވެ. އޭގެ ފަހުން އެމަނިކުފާނު އިސްކޮށް ހުންނަވައި، ދަ ޑިމޮކްރެޓްސްގެ ނަމުގައި ވަނީ އާ ސިޔާސީ ޕާޓީއެއް އުފައްދަވައިފަ އެވެ.
އެމްޑީޕީން އިސްތިއުފާ ދެއްވި ނަމަވެސް ސެޕްޓެމްބަރު 9، ގައި އޮތް ރިޔާސީ އިންތިހާބުގައި ނަޝީދު ވާދައެއްނުކުރައްވަ އެވެ. ޑިމޮކްރެޓްސްގެ ކެންޑިޑޭޓަކީ ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބެވެ.
ރައީސް ސޯލިހާއި އިލްޔާސްގެ އިތުރުން ރިޔާސީ އިންތިހާބުގައި ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމާއި ޕީޕީއެމް/ޕީއެންސީގެ ޑރ. މުހައްމަދު މުއިއްޒާއި އެމްއެންޕީގެ މުހައްމަދު ނާޒިމެވެ. އޭގެ އިތުރުން ކުރީގެ ހޯމް މިނިސްޓަރު އުމަރު ނަސީރާއި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި ކުރީގެ ޑެޕިއުޓީ މިނިސްޓަރު ހަސަން ޒަމީލު ވެސް ރިޔާސީ ރޭހުގައި އަމިއްލަ ގޮތުން ވާދަ ކުރައްވަ އެވެ.
