އިނގިރޭސިވިލާތުގައި ތުއްތު ކުދިންތަކެއް މެރުމުގެ ކުށް ސާބިތުވި ނަރުސް ލޫސީ ލެޓްބީ އުމުރަށް ޖަލަށް ހުކުމްކޮށްފި އެވެ.
ލެޓްބީގެ މައްޗަށް ސާބިތުވީ ވިހެއުމަށް ފަހު އައިސީޔޫގައި ފަރުވާދެމުން ދިޔަ ތުއްތު ހަތް ކުދިން މަރާލުމުގެ ކުށެވެ. އޭގެ އިތުރުން އިތުރު ހަ ކުދިން މަރާލަން މަސައްކަތް ކުރި ކަމަށް ވެސް ސާބިތުވި އެވެ.
މެންޗެސްޓާގެ ކޯޓެއްގައި ހޯމަ ދުވަހު ފަނޑިޔާރު އިއްވީ މުޅި އުމުރުގެ ޖަލު ހުކުމެއް ނުވަތަ "ހޯލް ލައިފް އޯޑާ" އެވެ. މިހާތަނަށް އެ ހުކުމް އިއްވާފައި ވަނީ މަދު އަދަދެއްގެ ކުށްވެރިންނަށެވެ.
އެއީ އިނގިރޭސިވިލާތުގައި ދެވޭ އެންމެ ހަރުކަށި އުގޫބާތެވެ. އެ ހުކުމާ އެކު ދުވަހަކު ވެސް ޖަލުން މިނިވަންވުމުގެ ފުރުސަތެއް ނޯންނާނެ އެވެ.
އުމުރުން 33 އަހަރުގެ ލެޓްބީ ހުކުމް އިއްވުމުގެ އަޑުއެހުމަށް ކޯޓަށް ހާޒިރެއް ނުވެ އެވެ. އެހެންވެ، އޭނާގެ ޝިކާރައަކަށްވި ކުދިންގެ އާއިލާތަކުން ނުރުހުން ފާޅުކުރި އެވެ.
ކުށް ސާބިތުވެ އެންމެ ހަރުކަށި އުގޫބާތް ދިން ނަމަވެސް، ލެޓްބީ އިއުތިރާފްވެފައެއް ނުވެ އެވެ.
އޭނާ ކުދިންތައް މެރީ ކައުންޓެސް އޮފް ޗެސްޓާ ހޮސްޕިޓަލުގައި ނަރުހެއްގެ ގޮތުގައި އުޅެމުންނެވެ. އޭނާގެ ގެ ބަލައި ފާސްކުރި އިރު، ހިންގި ލާއިންސާނީ ކަންކަމުގެ ނޯޓުތައް ރައްކާކޮށްފައި ހުއްޓެވެ.
ޖޫން 2015 އިން ޖޫން 2016 އަށް ލެޓްބީ އެ އަމަލުތައް ހިންގީ ކީއްވެގެން ކަމެއް ނޭނގެ އެވެ.
މި ވަގުތު "ހޯލް ލައިފް އޯޑާ" ތަންފީޒު ކުރަމުން ދަނީ 70 މުޖުރިމުންނެވެ. އަދި މިހާތަނަށް އެ ހުކުމް އިއްވާފައި ވަނީ އެންމެ ތިން އަންހެނުންނަށެވެ. އެއީ 1960 ގެ އަހަރުތަކުގައި ފަސް ކުދިން މަރާލި މީރާ ހިންޑްލީ އާއި ސިލްސިލާކޮށް މީހުން މެރުމުގެ ކުށް ސާބިތުވި ރޯޒް ވެސްޓް އާއި ޖޮއާނާ ޑެނެހީ އެވެ.
