ރައްޔިތުންގެ މަޖިލީހުގެ މިއަހަރުގެ ތިން ވަނަ ދައުރު ފަށަން މިއަދު ބޭއްވި ޖަލްސާއަށް އެޖެންޑާކުރި، ދާއިމީ ކޮމިޓީތަކުގައި ސިޔާސީ ޕާޓީތައް ތަމްސީލުކުރާ ގޮތް ކަނޑައެޅުމުގެ މައްސަލަ ކުރިއަށް ނުގެންގޮސް، އެ ޖަލްސާ ނިންމާލައިފި އެވެ.
މަޖިލީހުގައި ތަމްސީލުކުރާ ސިޔާސީ ޕާޓީތައް ކޮމިޓީތަކުގައި ތަމްސީލުކުރާ ގޮތް ކަނޑައެޅުމުގެ މައްސަލަ ކުރިއަށް ނުގެންދަވަން ރިޔާސަތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނިންމެވީ އެމަނިކުފާނުގެ ދަ ޑިމޮކްރެޓްސް ޕާޓީއާ ގުޅިވަޑައިގެންނެވި މެމްބަރުން އެކަން މަޖިލީހަަށް ރަސްމީކޮށް ނާންގަވައި އޮތުމުންނެވެ.
އެމްޑީޕީގެ ރިޔާސީ ޕްރައިމަރީ ނަޝީދަށް ނާކާމިޔާބުވެވަޑައިގެންނެވުމާ އެކު އުފެއްދެވި "ފިކުރެއްގެ ދިރުން" ހަރަކާތުގައި އިސްކޮށް އުޅުއްވި މެމްބަރުން ދަ ޑިމޮކްރެޓްސްގެ ނަމުގައި އާ ޕާޓީއެއް އުފެއްދެވީ މަޖިލީހުގެ މިއަހަރުގެ ދެވަނަ ދައުރު ނިމެނިކޮށެވެ. މަޖިލީހުގެ ދާއިމީ ކޮމިޓީތަކުގެ އެކުލެވުމަށް ބަދަލު ގެންނަން ޖެހުނީ އެ މެމްބަރުން އެމްޑީޕީން ވަކިވެވަޑައިގެންނެވުމުންނެވެ. އެއީ ނަޝީދު ހިމެނިވަޑައިގަންނަވާ ގޮތުން ޖުމްލަ 14 މެމްބަރެކެވެ.
މިއަދުގެ ޖަލްސާ ފެށްޓެވުމަށް ފަހު ރިޔާސަތުން ނަޝީދު އިއުލާނުކުރެއްވި ގޮތުގައި ދަ ޑިމޮކްރެޓްސް އަށް ބަދަލުވިކަން މަޖިލީހަށް ރަސްމީކޮށް އެންގެވީ އޭގެ ތެރެއިން އެންމެ ތިން މެމްބަރުންނެވެ.
"އަޅުގަނޑު ދަ ޑިމޮކްރެޓްސް އަށް ފުރުސަތު އަރުވަން މިއަދުގެ ވަގުތުތަކުގެ ތެރޭގައި ތިޔަ ބޭފުޅުންގެ ޕާޓީއަށް އެހެން އިއްޒަތްތެރި މެމްބަރުން ވެދެވަޑަައިގަންނަވާ ނަމަ އެ ސިޓީތައް މަޖިލީހުގެ އިދާރާއަށް ފޮނުވައިދެއްވުމަށް. އެހެން ހެއްދެވުމުން މަޖިލީހުގެ ދާއިމީ ކޮމިޓީތައް އެކުލަވައިލުމުގެ މަސައްކަތް ހަލުވިކަމާ އެކު ކުރިއަށް ގެންދެވިގެން ދާނެ ކަމަށް އަޅުގަނޑު ދެކެން،" ނަޝީދު ވިދާޅުވި އެވެ.
އެމަނިކުފާނު މިމޭރުމުން ވާހަކަފުޅު ދެއްކެވުމުން އެމްޑީޕީގެ ބައެއް މެމްބަރުން އެކަމާ ދެކޮޅަށް އަޑު އުފުއްލަވަން ފެށްޓެވި އެވެ. އެހިސާބުން އެމްޑީޕީގެ ތިން މެމްބަރެއްގެ ނަން އިއްވަވައި ތަޅުން ދޫކުރައްވައި ވަޑައިގަންނަވަން ނަޝީދު އެންގެވި އެވެ.
ޖަލްސާ ދޫކުރައްވައި ނުކުމެވަޑައިގަަންނަވަން ނަޝީދު އެންގެވީ ދާންދޫ ދާއިރާގެ މެމްބަރު ޔައުގޫބު އަބްދުﷲ އަށާއި ތިނަދޫ އުތުރު ދާއިރާގެ މެމްބަރު އަބްދުލް މުޣުނީ އާއި ކެލާ ދާއިރާގެ މެމްބްރު އިބްރާހީމް ޝަރީފަށެވެ.
އެހެން ނަމަވެސް އެ މެމްބަރުން ތަޅުމުން ނުކުމެ ވަޑައިނުގެންނެވުމުން ތަކުރާރުކޮށް އިންޒާރުކުރެއްވުމަށް ފަހު ޖަލްސާ މެދުކަނޑުއްވައިލެއްވި އެވެ.
ހުސްވަގުތުކޮޅަށް ފަހުގައި ވެސް އެ މެމްބަރުން ތިއްބެވުމުން ތަކުރާރުކޮށް އިންޒާރުކުރެއްވުމަށް ފަހު ނަޝީދު އިއުލާނުކުރެއްވީ މިއަދުގެ ޖަލްސާ ނިންމަވައިލައްވަނީ ކަމަށެވެ. ދެން ޖަލްސާއެއް އޮންނާނީ މާދަމާ ކަމަށް އެމަނިކުފާނު ވިދާޅުވި އެވެ.
