ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން މާލެ ސަރަހައްދުން ގޯތި ލިބޭ ތަން ކަނޑައެޅުމުގެ ގުރުއަތު ނެގުމަށް މިހާތަނަށް ހާޒިރުވެފައި ނުވާ މީހުންގެ ގުރުއަތުލުން މާދަމާ ބާއްވަން ނިންމައިފި އެވެ.
ހައުސިން މިނިސްޓްރީން މިއަދު ކުރި އިއުލާނެއްގައި ބުނީ ގޯތި ލިބޭ ފަރާތްތަކުގެ ތެރެއިން މިއަދުގެ ނިޔަލަށް ގުރުއަތު ނެގުމަށް ހާޒިރު ނުވާ ފަރާތްތަކުގެ ގުރުއަތުލުން ބޭއްވުމަށް ހަމަޖެހިފައިވަނީ ގަލޮޅު ދަނޑުގައި ގުރު ނެގުމަށް ހަމަޖެހިފައިވާ ތަނުގައި މާދަމާ ހެދުނު 10:00 ގައި ކަމަށެވެ.
އަދި، މާދަމާ ހުޅުވާލެވޭ ފުރުސަތުގައި ވެސް ގުރުއަތު ނެގުމަށް ހާޒިރު ނުވާ ފަރާތްތަކުގެ ގުރުއަތު ނަގާނީ މީޑިއާތަކުގެ ކުރިމަތީގައި އެ މިނިސްޓްރީގެ އޮފިޝަލުން ކަމަށް ވެސް ހައުސިން މިނިސްޓްރީން ބުނެފައިވެ އެވެ.
ގުރުއަތު ނެގުމަށް ހާޒިރު ނުވާ ފަރާތްތަކަށް އިތުރު ފުރުސަތެއް ލިބޭނެ ކަމަށް ހައުސިން މިނިސްޓްރީން މީގެ ކުރިންވެސް ވަނީ ބުނެފަ އެވެ.
ބިންވެރިޔާ ސްކީމުގެ ދަށުން ދޫކުރާ ގޯތީގެ ގުރުއަތު ނެގުމާއި ގުޅޭގޮތުން މިނިސްޓްރީން ފުރަތަމަ ކުރި އިއުލާނުގައި ބުނެފައިވާ ގޮތުން ގުރުއަތު ނެގުމަށް ދީފައިވާ ގަޑިއަށް އެއްވެސް މީހަކު ހާޒިރު ނުވެއްޖެ ނަމަ އެމީހެއްގެ ބަދަލުގައި ގުރުއަތުގައި ބައިވެރިވާނީ މިނިސްޓްރީގެ އޮފިޝަލެކެވެ. އެއީ ގުރުއަތު ނެގުން މެދުނުކެނޑި ކުރިއަށްގެންދިއުމަށް ކަމަށް މިނިސްޓްރީން އޭރު ބުންޏެވެ.
މިނިސްޓްރީން އެގޮތައް ނިންމާފައިވަނީ ގޯތި ދިނުމުގައި މަކަރު ހަދައި އޮޅުވާލުމަށް ކަމަށް ބުނެ ބައެއް ފަރާތްތަކުން ވަނީ ތުހުމަތުކޮށްފަ އެވެ.
ނަމަވެސް, މިނިސްޓްރީގެ އެ ނިންމުން ބަދަލުކޮށް ގުރުއަތު ނެގުމުގައި އޮފިޝަލުން ބައިވެރިނުވާން ނިންމާފައިވާ ކަމަށް ނޫސްވެރިންނަށް މައުލޫމާތު ދެއްވަމުން ޕްލޭނިން މިނިސްޓްރީގެ ސީނިއާ އެކްޒެކެޓިވް ޑިރެކްޓަރު މުހައްމަދު އާރިފް މި މަހުގެ 18 ގައި ވިދާޅުވި އެވެ.
ގޯތި ގުރުގައި މަކަރު ހަދަމުންދާ ކަމަށް އެކި ފަރާތްތަކުން ތުހުމަތު ކުރި ނަމަވެސް ގުރުގައި މަކަރު ހެދުމުގެ އެއްވެސް ފުރުސަތެއް ނޯންނާނެކަމުގެ ޔަގީންކަން މިނިސްޓްރީން ވަނީ ދީފަ އެވެ.
އެގޮތުން ގުރުއަތު ކަރުދާސް އަޅާފައި ހުންނަ ފޮށިތަކުގެ ސީލް ކެނޑުމާއި ބަންދުކޮށް އަލުން ސީލްކުރަނީީ އެވަގުތު ތިބި ބައެއްގެ ހާޒިރުގައި ކަމަށާއި ފުލުހުންނާއި މިނިސްޓްރީގެ މުވައްޒަފުން އެ ފޮށިތައް 24 ގަޑިއިރު ބަލަމުންދާ ކަމަށް މިިނިސްޓްރީން ބުންޏެވެ.
ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތި ދިނުމަށް ސަރުކާރުން ވަނީ ނިންމާފަ އެވެ. އެއީ 18،955 މީހުންނަށް 9001 ގޯއްޗެވެ. ގޯތި ދެނީ ހުޅުމާލެއާއިި ގުޅީފަޅާއި ގިރާވަރުފަޅުންނެވެ.
