މިހާރު މާލޭގައި ކުރިއަށްދާ މޯލްޑިވްސް އިންޓަނޭޝަނަލް ސީރީސްގެ އަންހެން ޑަބަލްސް އަދި މިކްސް ޑަބަލްސް ކުއާޓާ ފައިނަލުގައި ވާދަކުރި ރާއްޖޭގެ ދެ ޕެއާ ވެސް ނާކާމިޔާބީއާ ކުރިމަތިލާން ޖެހިއްޖެ އެވެ.
ކުޅިވަރު އެކުވެނި ބެޑްމިންޓަން ކޯޓުގައި ކުރިއަށްދާ މުބާރާތުގެ އަންހެން ޑަބަލްސް ކުއާޓާ ފައިނަލުގައި ރާއްޖޭގެ ދެބެން ކަމަށްވާ އައިމިނަތު ނަބީހާ (ނަބީ) އާއި ފާތިމަތު ނަބާހާ (ނަބާ) ނުކުތީ މެލޭޝިއާގެ ހޯ ލޯ އީ އާއި އަމަންޑާގެ ޕެއާއާ ދެކޮޅަށެވެ.
އަންހެން ޑަބަލްސް ކުއާޓާ ފައިނަލްގެ މި މެޗުން މެލޭޝިއާގެ ހޯ ލޯ އާއި އަމަންޑާގެ ޕެއާ ކުރިހޯދައިފައިވަނީ ދެ ސެޓު އެއް ސެޓުންނެވެ. މެޗުގެ ސެޓުތައް ދިޔައީ، 22-20، 18-21 އަދި 21-08 އިންނެވެ.
މިކްސް ޑަބަލްސްގެ ކުއާޓާ ފައިނަލުގައި ރާއްޖޭގެ ޒަޔާން ޒަކީ އާއި ނަބާގެ ޕެއާ ވަނީ މެލޭޝިއާގެ ޖުއާން ޖެރެމީ އާއި ޔަޕް ލިންގްގެ ޕެއާ އަތުން 21-08، 21-11 އިން ބަލިވެފަ އެވެ.
މި މަހު 15-20 އަށް ކުރިއަށްދާ މި މުބާރާތުގައި ރާއްޖޭގެ ގިނަ ކުޅުންތެރިންތަކެއް ވާދަކުރި ނަމަވެސް ނޮކައުޓްގެ ރަނގަޅު ހިސާބަކަށް ގިނަ އިވެންޓްތަކުގައި ދަތުރުކުރެވިފައިނުވެ އެވެ. މިކްސް ޑަބަލްސް އާއި އަންހެން ޑަބަލްސް އަކީ މި ފަހަރުގެ މުބާރާތުގައި ރާއްޖެ އަށް އެންމެ ދުރަށް އާދެވުނު ދެ އިވެންޓް އެވެ. ރާއްޖޭގެ ކުޅުންތެރިން ތައްޔާރުވަމުން އަންނަނީ މި މަހު ފަށާ ބެޑްމިންޓަން ވޯލްޑް ޗެމްޕިއަންޝިޕާއި މަޑަގަސްކަރާގައި ބާއްވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަދި އަންނަ މަހުގެ އޭޝިއަން ގޭމްސް އަށެވެ.
