ޕްލޭނިން މިނިސްޓްރީން ގަލޮޅު ރަސްމީ ދަނޑުގައި ކުރިއަށްގެންދާ، މާލެ ސަރަހައްދުން ގޯތި ލިބޭ މީހުންގެ ގުރުނެގުމުގެ އިވެންޓު ދިގުލައިދާތީވެ، ދިވެހި ޕްރިމިއާ ލީގުގެ ކުޅުން އަނެއްކާ ވެސް ފަސްކުރަން ޖެހިއްޖެ އެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެންމެ ފުރަތަމަ މިދިޔަ އާދިއްތަ ދުވަހު އެންގީ ސަރުކާރުގެ އިވެންޓެއް އޮތުމުން، ލީގު މެޗުތައް ފަސްކުރަން ޖެހިފައިވާ ކަމަށެވެ.
އެއީ، މި ހަފްތާގެ ހޯމަ އިން ފެށިގެން ގޯތީގެ ގުރު ނެގުމުގެ އިވެންޓް ރަސްމީ ދަނޑުގައި ކުރިއަށް ގެންދަން ހައުސިން މިނިސްޓްރީ އަށް ދޫކޮށްފައިވާތީ އެވެ އެ ގޮޮތުން، ގަލޮޅު ދަނޑު ބެލެހެއްޓުމުގެ ޒިންމާ އޮތް ޔޫތު މިނިސްޓްރީގެ އެންގުމާ އެއްގޮތަށް އެފްއޭއެމުން ވަނީ ގޯތީގެ ގުރުނެގުމުގެ އިވެންޓަށް ޖާގަ ދޭން ލީގު ފަސްކޮށްފަ އެވެ.
އެ ގޮތުން، ގުރުނެގުމުގެ އިވެންޓަށް އެންމެ ފުރަތަމަ ދިން މުއްދަތު އިއްޔެގެ ނިޔަލަށް ވަނީ ހަމަވެފަ އެވެ. އެހެންވެ، ދިވެހި ޕްރިމިއާ ލީގު އަލުން މިއަދު ފަށާގޮތަށް ޝެޑިއުލަށް ވެސް އޮތީ ބަދަލު ގެނެސްފަ އެވެ.
އެކަމަކު، ހައުސިން މިނިސްޓްރީގެ އެދުމަށް ރަސްމީ ދަނޑު ދޫކުރި މުއްދަތު އަންނަ ހަފްތާގެ ހޯމަ ދުވަހާ ހަމައަށް އިތުރު ކޮށްފައި ވާތީ، މިހާރު އަނެއްކާ ވެސް ދިވެހި ޕްރިމިއާ ލީގު ފަސްކުރަން ޖެހިފައިވާ ކަމަށް އެފްއޭއެމުން ރޭ ވަނީ މީޑިއާގައި ބުނެފަ އެވެ.
ގޯތީ ގުރުނެގުމަށް ގަލޮޅު ދަނޑުގައި ކުރިއަށްދާ އިވެންޓްެ ތެރެއިން.--- ފޮޓޯ: މުހައްމަދު ޝާބިން/ އަދަދު
އެފްއޭއެމް އިން ބުނީ ލީގުގެ އާ ޝެޑިއުލް ވީހާވެސް އަވަހަކަށް ނެރޭނެ ކަމަށެވެ.
މުޅި ޖުމްލަ އެކު، 9001 ގޯތި، ހުޅުމާލެ، ގުޅީފަޅު އަދި ގިރާވަރުފަޅުން ދިނުމަށް ގުރުއަތުލުން ގަލޮޅު ދަނޑުގައި ކުރިއަށްދާއިރު، މި އިވެންޓް މިއަދުން ފެށިގެން ހެންވޭރު ދަނޑުގައި ބާއްވަން ޕްލޭނިން މިނިސްޓްރީން ކުރިން ރޭވި އެވެ. އެކަމަކު، މިހާރު އަނެއްކާ ވެސް އިވެންޓް ކުރިއަށްދާނީ ގަލޮޅު ދަނޑުގައި ކަމަށް މި ވަނީ ނިންމައިފަ އެވެ.
ކުއްލިއަކަށް މި ގޮތަށް ލީގު މެދުތައް ފަސްކުރަން ޖެހުމާ އެކު، ފުޓްބޯޅަ ކޯޗުންނާއި ކުޅުންތެރިން އަންނަނީ ކަންބޮޑުވުން ފާޅުކުރަމުންނެވެ. ލީގަށް މި ގޮތަށް އަސަރުކުރާނަަމަ، އޮކްޓޫބަރު މަހު ރާއްޖޭގެ ގައުމީ ފުޓްބޯޅަ ޓީމަށް އޮތް ފީފާ ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިން އަށް އަސަރުކުރާނެ ކަން ބައެއް ފަރާތްތަކުން އަންނަނީ ފާހަގަކުރަމުންނެެވެ.
