ޖަކާޓާ، އިންޑޮނޭޝިއާ (އޮކްޓޫބަރު 2) - މިހާރު ކުރިއަށްދާ ފީފާ އާސިއާން ކަޕްގެ ގްރޫޕް އޭގައި ބަންގްލަދޭޝް އިން ކުޅުނު ފަހު މެޗުގައި އިންޑޮނޭޝިއާ އަތުން 9-2 އިން ބަލިވެ، ޖުމްލަކޮށް މުބާރާތުގައި ދަށް ނަތީޖާތަކަކާ ކުރިމަތިލާން ޖެހިއްޖެ އެވެ.
އާސިއާން ކަޕުގައި ވާދަކުރަން ބަންގްލަދޭޝް އަށް ފުރުސަތު ލިބިގެންދިޔައީ، އިންޑިއާ މި މުބާރާތުން ވަކިވުމުންނެވެ. އެ ގޮތުން، ބަންގްލަދޭޝް އިން ކޯޗު ތޯމަސް ޑޫލޭގެ އިރުޝާދުގެ ދަށުން މި މުބާރާތަށް ނުކުމެ، ވާދަކުރަން ޖެހުނު ގްރޫޕްގައި އިންޑޮނޭޝިއާގެ އިތުރުން ދެން އޮތީ މެލޭޝިއާ އަދި ސިންގަޕޫރު އެވެ.
ބަންގްލަދޭޝް އިން ފުރަތަމަ މެޗުގައި މެލޭޝިއާއާ ދެކޮޅަށް ކުޅެން ޖެހުނުއިރު، އެ މެޗުން ވަނީ 3-0 އިން ބަލިވެފަ އެވެ. ދެ ވަނަ މެޗުގައި ސިންގަޕޫރާ ކުޅެގެން ބަންގްލަދޭޝް ބަލިވީ 1-0 އިންނެވެ. ފުރަތަަމަ ދެ މެޗުގައި ލަނޑެއް ވެސް ނުޖެހި ބަލިވުމުން، ތިން ވަަނަ މެޗުގައި ނަތީޖާ އެއް ހޯދުމަށްޓަކައި ނުކުމެ، ބަންގްލަދޭޝް އަށް ދިމާވީ މާ ދެރަ ނަތީޖާ އެކެވެ.
އިންޑޮނޭޝިއާ އިން ވަނީ ގޯލު ޖަހަން ލިބުނު ގިނަ ފުރުސަތުތަކެއްގެ ބޭނުންހިފައި، ބަންގްލަދޭޝް ކޮޅަށް 9 ގޯލު ޖަހައިފަ އެވެ. މިއީ، ފާއިތުވި 40 އަހަރު ތެރޭ ޓީމަކުން ބަންގްލަދޭޝް ކޮޅަށް ނުވަ ގޯލު ޖެހި ފުރަތަމަ ފަހަރެވެ. އެއީ، 1986 ވަނަ އަހަރު ދެކުނު ކޮރެއާ އިން 9-0 އިން ބަންގްލަދޭޝް ބަލިކުރިއިރު އެވެ. އޭގެ އިތުރުން، އިރާނުން 1982 ވަނަ އަހަރު 9-0 އިން ބަންގްލަދޭޝް ބަލިކުރިއިރު، 1975 ވަނަ އަހަރު ހޮންގް ކޮންގް އިން 9-1 އިން ބަންގްލަދޭޝްގެ މައްޗަށް ކުރިހޯދި އެވެ.
ބަންގްލަދޭޝް އިން އާސިއާން ކަޕްގައި ކުޅުނީ، ނޮވެމްބަރު 5-17 އަށް އެ ގައުމުގައި ބާއްވާ ސާފް ޗެމްޕިއަންޝިޕަށް ތައްޔާރުވުމަށްޓަކަ އެވެ. އެކަމަކު، މި މުބާރާތުގައި އެ ޓީމުގެ ގިނަ މައްސަލަތަކެއް ވަނީ ފެނިގެންގޮސްފަ އެވެ.
ސައުތު އޭޝިއާގެ ގައުމުތަަކުގެ ތެރެއިން ދެން މި ފަހަރުގެ އާސިއާން ކަޕްގައި ކުޅެނީ، ޕާކިސްތާން އެވެ. ޕާކިސްތާނުން ފުރަތަމަ މެޗުގައި ތައިލެންޑް އަތުން 4-0 އިން ބަލިވި ނމަވެސް ދެ ވަނަ މެޗުގައި ފަހަތުން އަރައި ފިލިޕީންސްއާ 2-2 އިން އެއްވަރުކުރި އެވެ. ޕާކިސްތާނަށް ގްރޫޕްގެ އެއް ވަނަ ހޯދައިގެން ފައިނަލަށް ދިއުމުގެ ފުރުސަތު ނެތް ކަމުގައި ވިޔަަސް، މިރޭ ވިއެޓްނާމް ބަލިކޮށް، ތިން ވަނަ ހޮވާ މެޗަށް ދަތުރުކުރުމުގެ ފުރުސަތު އެބައޮތެވެ.
ޕާކިސްތާނަށް ފުޓްބޯޅައިގައި މިހާތަނަށް ލިބުނު އެންމެ ބޮޑު ކާމިޔާބަކީ، މިދިޔަ ޖޫން މަހު މާލޭގައި ކުރިއަށްދިޔަ ޑައިމަންޑް ޖުބިލީ އިންޓަނޭޝަނަލް މުބާރާތް ކާމިޔާބުކުރުމެވެ. އެ މުބާރާތަކީ، ރާއްޖޭގެ ފުޓްބޯޅަ އަށް 75 އަހަރު ފުރުމުގެ މުނާސަބަތުގައި ބޭއްވި މުބާރާތެކެވެ.
އާސިއާން ކަޕްގައި ކުޅޭ ކޮންމެ ގައުމަކަށް، ފީފާގެ ސްޕޮންސަޝިޕްގެ ދަށުން، 125،000 ޑޮލަރުގެ ބޯނަހެއް ދޭން ވަނީ ނިންމައިފަ އެވެ.
