ލިޒްބަން، ޕޯޗުގަލް (އޮކްޓޫބަރު 3) - އަމިއްލަ ކަމެއްގެ ސަބަބުން ޕޯޗުގަލް ގައުމީ ޓީމުގެ ކެޕްޓަން، ކްރިސްޓިއާނޯ ރޮނާލްޑޯ އެ ޓީމުގެ ކޭމްޕް ދޫކޮށްލި މައްސަލައިގައި އޭނާ އަށް ޕޯޗުގަލް ފުޓްބޯޅަ ފެޑެރޭޝަންގެ ޑިސިޕްލިނަރީ ކޮމިޓީން ފިޔަަވަޅު އެޅުމުގެ ފުރުސަތު އެބައޮތް ކަމަށް މީޑިއާތަކުން ރިޕޯޓްކޮށްފި އެވެ.
މި ފަހަރުގެ ނޭޝަންސް ލީގުގައި ޕޯޗުގަލް އިން ކުޅުނު ފުރަތަމަ މެޗުގައި ވޭލްސްއާ ދެކޮޅަށް، އުމުރުން 41 ރޮނާލްޑޯ ވަނީ ކުޅެފަ އެވެ. އެކަމަކު، ދެ ވަނަ މެޗުގައި ނޯވޭއާ ދެކޮޅަށް ރޮނާލްޑޯ އަށް އެއްވެސް ވަގުތެއްގައި ކުޅެން ފުރުސަތު ނުލިބޭއިރު، ކުޅެން އެރުމަށްޓަކައި، 20-30 މިނިޓް އޭނާ ވޯމްއަޕް ކުރި އެވެ. ކަންކަން މިހެން ދިމާވެފައި އޮއްވައި، ރޮނާލްޑޯ ވަނީ ޕޯޗުގަލްގެ ކޯޗު، ޖޯޖް ޖީސޫސް އާއި ޕޯޗުގަލްގެ ފުޓްބޯޅަ ފެޑެރޭޝަން ރައީސް، ޕެޑްރޯ ޕްރޮެންކާއާ އެކު ބޭއްވި ބައްދަލުވުމަށް ފަހު ޓީމުގެ ކޭމްޕް ދޫކޮށްލައިފަ އެވެ.
ރޮނާލްޑޯ ނުލައި ކުޅުނު މެޗުން ޕޯޗުގަލް އިން ވަނީ 4-2 އިން ޑެންމާކް ބަލިކޮށްފަ އެވެ.
ރޮނާލްޑޯ ނުލައި ޕޯޗުގަލް އިން ޑެންމާކް ބަލިކޮށްފި
ކެޕްޓަން ކްރިސްޓިއާނޯ ރޮނާލްޑޯ ނުލައި ކުޅެ، ޔުއެފާ ނޭޝަންސް ލީގުގައި ޕޯޗުގަލް އިން 4-2 ގެ ނަތީޖާއަކުން ޑެންމާކް ބަލިކޮށްފި. މި މެޗުގައި ޕޯޗުގަލްގެ ލަނޑުތައް ކާމިޔާބުކޮށްދިނީ ކަންސެލޯ، ރާމޯސް، ވިޓީނިއާ އަދި ފެލިކްސް.
އެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޖީސޫސް ބުނީ، ޕޯޗުގަލް ގައުމީ ޓީމާ ހަވާލުވީ ރޮނާލްޑޯ ހުރެގެން ނޫން ކަމަށެވެ. އަދި، ޕޯޗުގަލްއާ ހަވާލުވެ، މި ވަގުތު މައިގަނޑު އަމާޒަކީ ނޭޝަންސް ލީގު ކާމިޔާބުކުރުން ކަމަށާއި އެކަން ކުރަން ބަލަން ޖެހެނީ މުޅި ޓީމަށް ކަމަށް ވެސް ޖީސޫސް ވަނީ ބުނެފަ އެވެ.
ޖީސޫސް ބުނީ، ނޯވޭ މެޗުގެ ކުރިން ރޮނާލްޑޯ ގާތުގައި އެ މެޗުގެ ފުރަތަމަ އެގާރައިގައި އޭނާ ނެތްކަން އަންގާފައިވާނެ ކަމަށެވެ. އެކަމަކު، މެޗުގެ ވަކި ހިސާބަކުން ކުޅެން އަރުވަން ޖެހިދާނެކަން އެންގި ކަމަށް ވެސް އޭނާ ބުނެފައިވެ އެވެ. އަދި، ޑެންމާކު މެޗުގެ ކުރިން ވާހަކަ ދައްކައިގެން ރޮނާލްޑޯއާ އެކު އެ ދިމާވި ކަންތައްތަކުގެ ވާހަކަ ދައްކާނީ އާދިއްތަ ދުވަހު ޕޯޗުގަލް އިން ކުޅޭ މެޗަށް ފަހު ކަމަށް ޖީސޫސް ވަނީ ބުނެފަ އެވެ.
ގައުމީ ޓީމުގެ ކޭމްޕް ދޫކޮށްލި ސަބަބާ ގުޅޭގޮތުން ރޮނާލްޑޯ ކުރި ޕޯސްޓެއްގައި ބުނެފައިވަނީ، ނޫސްވެރިންގެ ބައްދަލުވުމަށް ފަހު، ޖީސޫސް އާއި ޕޯޗުގަލްގެ ފުޓްބޯޅަ ފެޑެރޭޝަން ރައީސް، ޕެެޑްރޯ ޕްރޮއެންކާއާ އެކު ބޭއްވި ބައްދަލުވުމަށް ފަހު، ގައުމީ ޓީމުގެ ކޭމްޕް ދޫކޮށްލަން ނިންމާފައިވާ ކަމަށެވެ.
"ވަގުތު ޖެހުނީމަ އަހަރެން ޕޯޗުގަލްގެ ރައްޔިތުންނަށް ހިއްސާކުރާނަން އަހަރެން މި ނިންމުން ނިންމަން މެދުވެރިވި ސަބަބު. އަަބަދުވެސް އަހަރެން ގައުމީ ޓީމާ އެކު ހުރެފައި މި ގޮތަށް މިކަން ކުރަންޖެހުނީ ކީއްވެކަން،" ރޮނާލްޑޯ ލިޔެފައިވެ އެވެ.
"މި ވަގުުތަކީ ޕޯޗުގަލް އާއި ޓީމުގެ ހުރިހާ ކުޅުންތެރިންނަށް އިތުރު ކަމެއްގެ ވާހަކަ ދެއްކުމެއް ނެތި ކާމިޔާބަށް އެދެންޖެހޭނެ ވަގުތެއް،"
މީގެ 22 އަހަރު ކުރިން ޕޯޗުގަލް އަށް ކުޅެން ފެށި ރޮނާލްޑޯ އަކީ ބައިނަލްއަގުވާމީ ފުޓްބޯޅައިގައި ގައުމީ ޓީމަށް އެންމެ ގިނަ ގޯލު ޖެހުމުގެ ރެކޯޑް އޮތް ކުޅުންތެރިޔާ އެވެ. ހަ ވޯލްޑް ކަޕެއްގައި ޕޯޗުގަލް އަށް ކުޅެދިން ރޮނާލްޑޯ ވަނީ، ގައުމީ ޓީމަށް ކުޅެދިން، 234 މެޗުން 146 ލަނޑު ޖަހައިފަ އެވެ.
އެމެރިކާ، މެކްސިކޯ އަދި ކެނަޑާގައި މިދިޔަ ޖޫން/ޖުލައި މަހު ކުރިއަށްދިޔަ ފީފާ ވޯލްޑް ކަޕަށް ފަހު ޕޯޗުގަލްގެ ގައުމީ ފުޓްބޯޅަ ޓީމުން ރިޓަޔާކުރަން ވިސްނި ކަމަށް ރޮނާލްޑޯ ވަނީ މި ފަހަރުގެ ނޭޝަންސް ލީގާ ދިމާކޮށް ގައުމީ ޓީމާ ގުޅުމަށް ފަހު ދިން އިންޓަވިއުއެއްގައި ބުނެފަ އެވެ. ޕޯޗުގަލް، ވޯލްޑް ކަޕުން ކެޓީ ގަދަ 16 ބުރުގައި ސްޕެއިން އަތުން ބަލިވެގެންނެވެ. މުބާރާތުގެ ޗެމްޕިއަންކަން ހޯދީ ވެސް ސްޕެއިނުންނެވެ.
އެ އިންޓަވިއުގައި ރޮނާލްޑޯ ވަނީ ޕޯޗުގަލްގެ ގައުމީ ޓީމުުން އޭނާގެ ބޭނުންހިފަން ބޭނުންވި މުއްދަތަކަށް ޓީމާ އެކު ކުރިއަށްދާނެ ކަމަށް ބުނެފަ އެވެ. އަދި، މިހާރު ވެސް އޭނާގެ މުހިންމުކަން ޓީމަށް ބޮޑު ކަމަށް ވެސް ރޮނާލްޑޯ ބުނެފައިވެ އެވެ.
ޕޯޗުގަލްގެ ގައުމީ ޓީމުގެ ޑިސިޕްލިނަރީ ކޯޑުގައިވާ ގޮތުން، މަގުބޫލު އުޒުރެއް ދެއްކުމެއް ނެތި ގައުމީ ޓީމުގެ ކޭމްޕްގައި ހުރެފައި، އަމިއްލަ އަށް ކޭމްޕް ދޫކުރުމަކީ އަދަބެއް އަންނާނެ ކަމެކެވެ. އެ ގަވާއިދުގެ ތެރެއިން މި ކަހަލަ ކުށަކަށް ދެވޭނެ އެންމެ ބޮޑު އަދަބަކީ ހަ މަހަށް ގައުމީ ޓީމުގެ މެޗުތަކުން ސަސްޕެންޑް ކުރުމެވެ.
ރޮނާލްޑޯއާ މެދު ކަންތައް ކުރާނެ ގޮތެއް ޕޯޗުގަލް މެނޭޖްމަންޓުން ނިންމާނީ، މާދަމާރޭ ކުޅޭ ނޯވޭ މެޗަށް ފަހު އެވެ.
