ލަންޑަން (އޮގަސްޓް 16) - މެންޗެސްޓާ ޔުނައިޓެޑަށް ކުޅެމުން އަންނަ އިނގިރޭސި ޑިފެންޑަރު، ހެރީ މެގުއާ، ވެސްޓް ހޭމް އަށް ވިއްކާލަން ޔުނައިޓެޑުން އެއްބަސްވުމަކަށް އަތުވި ނަމަވެސް، ފައިސާގެ ކަންތައްތަކެއް ހަމަނުޖެހޭތީ އެ ޑީލް ހުއްޓުމަކަށް އައިސްފި އެވެ.
ވެސްޓް ހޭމް އިން، މެގުއާ، 30، ގަންނަން ކުރި 28 މިލިއަން ޑޮލަރުގެ ބިޑް، ޔުނައިޓެޑުން އަނބުރާ ފޮނުވާލީ އެވެ. އޭގެ ފަހުން، ވެސްޓް ހޭމް އިން މި ހުށަހެޅީ މެގުއާ އާއި ޔުނައިޓެޑްގެ ސްކޮޓްލެންޑް މިޑްފީލްޑަރު، ސްކޮޓް މެކްޓޮމިނޭ ގަންނަން އެކުގައި 77 މިލިއަން ޑޮލަަރެވެ. އެކަމަކު، އޭގެ ފަހުން، ޔުނައިޓެޑުން ވަނީ މެގުއާ 38 މިލިއަން ޑޮލަރުގެ ޑީލެއްގައި ދޫކޮށްލަން އެއްބަސްވެފަ އެވެ. އެހެން ނަމަވެސް އެ ޑީލް ވެސް ނުހިނގި އެވެ. އެއީ މެގުއާގެ ރުހުން ނުލިބޭތީ އެވެ.
މީގެ ހަތަރު ވަރަކަށް އަހަރު ކުރިން، 2019 ވަނަ އަހަރު ލެސްޓާ ސިޓީ އިން 93 މިލިއަން ޑޮލަރަށް، ދުނިޔޭގެ އެންމެ އަގުބޮޑު ޑިފެންޑަރުގެ ގޮތުގައި ޔުނައިޓެޑާ ގުޅުނު މެގުއާ އެ ކުލަބާ އެކު ހަދާފައިވާ ކޮންޓްރެކްޓްގައި ބާކީ ދެ އަހަރު އެބައޮތެވެ. ޔުނައިޓެޑްގެ ކެޕްޓަން ބޭންޑް ވެސް ދާދި ފަހުން މެގުއާ އަތުން ވަނީ ނަަގައިފަ އެވެ. އެކަމާ މެގުއާ ވަނީ މީޑިއާގައި ހިތްހަމަނުޖެހުން ފާޅުކޮށްފަ އެވެ.
ރިޕޯޓްތައް ބުނާގޮތުން މެގުއާ، ޔުނައިޓެޑް ދޫކޮށްލަން ބޭނުންނުވަނީ ކޮންޓްރެކްޓްގައިވާ ބާކީ މުއްދަތަށް ދޭން އެއްބަސްވާ ފައިސާ އެއްކޮށް ދޭން ޔުނައިޓެޑުން ދެކޮޅު ހަދާތީ އެވެ. އެ ގޮތުން، ކޮންޓްރެކްޓްގައިވާ މާއްދާ އަކަށް ބަލައި، ޔުނައިޓެޑް ދޫކޮށްލަން މެގުއާ އެދެނީ ބަދަލެއްގެ ގޮތުގައި 19 މިލިއަން ޑޮލަރެވެ. އެކަމަކު، ޔުނައިޓެޑުން ދޭން އެއްބަސްވަނީ އަށް މިލިއަން ޑޮލަރު ކަމަށް ރިޕޯޓްތައް ބުނެ އެވެ.
