ސިއްހީދާއިރާގައި ދުނިޔޭގެ އެންމެ ކުރިއަރާފައިވާ އަދި ޖަޕާނުގެ އެއްވަނަ ނިހޯން ކޯޑެން ބްރޭންޑްގެ ވެންޓިލޭޓަރާއި ޖީ ފައިވް މޮނިޓަރު އެސްޓީއޯއިން ރާއްޖެއަށް ތައާރަފްކޮށްފިއެވެ.
ކްރޮސް ރޯޑްސްގައި މިރޭ ބޭއްވި ހާއްސަ ރަސްމިއްޔާތެއްގައި މި އުފެއްދުންތައް ތައާރަފްކޮށްދެއްވީ ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ތަކެއުޗީ މިދޯރީއެވެ. އެ ރަސްމިއްޔާތުގައި ހެލްތް މިނިސްޓްރީގެ ސްޓޭޓް މިނިސްޓަރު އަހުމަދު އާދިލް އާއި އެސްޓީއޯގެ މެނޭޖިން ޑިރެކްޓަރު އަބްދުﷲ ސައީދު އަދި، ނީހޮން ކޯޑެން ސިންގަޕޫރުގެ މެނޭޖިން ޑިރެކްޓަރު ހިރޮޓްސޫނީ ކޮބަޔާޝީ ބައިވެރިވެވަޑައިގެންނެވިއެވެ.
އެސްޓީއޯ އިން ނިހޯން ކޯޑެން ބްރޭންޑްގެ ވެންޓިލޭޓަރު ރާއްޖެ ތާރަފްކުރުމަށް ބޭއްވި ރަސްމިއްޔާތުގައި ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ތަކެއުޗީ މިދޯރީ އަދި އެސްޓީއޯގެ އެމްޑީ، އަބްދުﷲ ސައީދު --- ފޮޓޯ: އެސްޓީއޯ
ނިހޯން ކޯޑެން ގެ ވަސީލަތްތަކަކީ އިމަޖެންސީ ރޫމާއި އޮޕަރޭޝަން ތިއޭޓަރު އަދި އައިސީޔޫ ތަކުގެ އިތުރުން ހޮސްޕިޓަލުގެ ކޮންމެ ޑިޕާޓްމެންޓެއްގައިވެސް ބޭނުންކުރެވޭނެ އިކުއިޕްމެންޓްތަކެކެވެ. އެގޮތުން އެސްޓީއޯއިން މިރޭ ތާރަފްކުރި ވެންޓިލޭޓަރަކީ އެކި އުމުރުފުރައިގެ ނިއޯނޭޓަލް ޕޭޝަންޓުން ވެންޓިލޭޓް ކުރުމަށް ސިއްހީ ހިދުމަތްދޭ މީހުން ބޭނުންވާ ހުރިހާ ގާބިލުކަމެއް އެކުލެވޭގޮތަށް ފަރުމާކޮށްފައިވާ ވެންޓިލޭޓަރެކެވެ. އިންވޭސިވް އަދި ނޮން-އިންވޭސިވް ވެންޓިލޭޝަން އާއި ހައި ފްލޯ އޮކްސިޖަން ތެރަޕީގެ މެދުގައި މެދުކެނޑުމެއް ނެތި ބަދަލު ގެނައުމުގެ ގާބިލުކަން ލިބިފައިވާ މި ވެންޓިލޭޓަރުގެ ސަބަބުން ޑޮކްޓަރުންނާއި ނަރުހުންގެ ވޯކްފްލޯ އަވަސްވެ ބަލިމީހާ އަށް ބޭނުންވާ ފަރުވާ ވަގުތުން ދިނުމަށް އެހީތެރިވެދެ އެވެ.
އެސްޓީއޯ އިން ބުނީ ރާއްޖެއަށް އަލަށް ތައާރަފް ކުރި މި ވަސީލަތްތަކަށް އަހުލުވެރިކުރުމުގެގޮތުން ނަރުހުންނާއި ޑޮކްޓަރުންނަށް ހާއްސަ ތަމްރީނު ޕްރޮގްރާމެއް މާދަމާއިން ފެށިގެން އަންގާރަ ދުވަހުގެ ނިޔަލަށް ކުރިޔަށް ގެންދިއުމަށް ނިންމާފައިވާ ކަމަށެވެ.
މި ތަމްރީނުގެ ތެރެއިން ނިހޯން ކޯޑެން ބްރޭންޑްގެ ވެންޓިލޭޓަރ އާއި ޖީ ފައިވް މޮނިޓަރުގެ ފީޗާސްތަކާއި، އެކި ބޭނުންތަކުގެ އިތުރުން އެކި ހާލަތްތަކުގައިވާ ބަލިމީހުންނަށް މި ވަސީލަތްތަށް ބޭނުންކުރާނެ ގޮތް ދަސްވެގެންދާނެ ކަމަށް އެސްޓީއޯ އިން ބުންޏެވެ.
