ސިމްޑީން ވިއްކާ ގިނަ އަދަދެއްގެ ޕްރޮޑަކްޓްތައް ހޯލްސޭލްކޮށް އަދި ރީޓެއިލްކޮށް ވިއްކާ ފިހާރައެއް އެ ކުންފުނިން ހުޅުމާލޭގައި ހުޅުވައިފި އެވެ.
"ސިމްޑީ ރެކްރިއާ" ނަމުގައި ހުޅުވި އެ ފިހާރަ ހުންނަނީ ހުޅުމާލޭ ނިރޮޅުމަގު ހަތްތަރި މާޓް ކައިރީގަ އެވެ. އެ ފިހާރަ ރޭ ހުޅުއްވައިދެއްވީ ސިމްޑީ ގުރޫޕުގެ މެނޭޖިން ޑިރެކްޓަރު ޔޫޝައު ހަސަން އެވެ.
ސިމްޑީން މައުލޫމާތު ބުނީ އެ ފިހާރަ ހުޅުވުމުގެ މަގުސަދަކީ ހުޅުމާލޭގައި ދިރިއުޅޭ ކަސްޓަމަރުންނަށް އެކުންފުނީގެ ގިނަ ޕްރޮޑަކްޓުތަކެއް އެއް ތަނަކުން ފަސޭހައިން ގަނެވޭނެ ގޮތް ފަހިކޮށްދިނުން ކަމަށެވެ.
އެގޮތުން ދެ ފަންގިފިލައަށް ހުންނަ އެ ފިހާރައިން ޝޭމްޕޫ އާއި ޝަވާ ޖެލް ފަދަ ޕާސަނަލް ކެއާގެ އައިޓަމްތަކާއި އެކި ވައްތަރުގެ ބޭބީ ޕްރޮޑަކްޓްތުތަކުގެ އިތުރުން ދުނިޔޭގެ މަޝްހޫރު ބްރޭންޑުތަކުގެ ތެރޭގައި ހިމެނޭ ދުނާރު ރައިސް، ނޫރު ސަންފްލާވާ އޮއިލް، ބޮން ކެފޭގެ އެކިވައްތަރުގެ ބުއިންތަކާއި މޮނިން ބްރޭންޑުގެ ސިރަޕާ ޑިލްމާ ބްރޭންޑުގެ ސައިފަތް ލިބެން އެބަ ހުއްޓެވެ.
ސިމްޑީން ވިއްކާ ގިނަ އަދަދެއްގެ ޕްރޮޑަކްޓްތައް ހޯލްސޭލްކޮށް އަދި ރީޓެއިލްކޮށް މި ފިހާރައިން ލިބެން ހުންނާނެ--- ފޮޓޯ:ސިމްޑީ
އޭގެ އިތުރުން، އެކުންފުނިން ވިއްކާ އިލެކްޓްރޯނިކްސް ޕްރޮޑަކްޓްތަކުގެ ތެރޭގައި ހިމެނޭ ޖޭބީއެލް ސްޕީކަރުތަކާއި ކެނޮން ޕްރިންޓަރާއި އިލޮކްޓްރޯލަކްސް ބްރޭންޑުގެ ދޮންނަ މެޝިނާއި އިސްތިރި އަދި އައިސް އަލަމާރި އާއި އިލީ ބްރޭންޑުގެ ކޮފީ މެޝިންތަކާއި ކެޕްސޫލް ވެސް އެ ފިހާރައިން ލިބެން ހުރެ އެވެ.
އެ ފިހާރަ ހުޅުވުން ފާހަގަކުރުމުގެ ގޮތުން ސިމްޑީން ވަނީ ހާއްސަ ޕްރޮމޯޝަނެއް ވެސް ފަށާފަ އެވެ. އެގޮތުން އަންނަ ހޮނިހިރު ދުވަހާ ހަމަޔަށް އެ ފިހާރައިން ވިޔަފާރިކުރާ ހުރިހާ އެންމެންނަށް ބައިވެރިވެވޭ ހާއްސަ ލަކީޑްރޯއެއް ކުރިއަށްގެންދާއިރު ލަކީޑްރޯގައި އެއްވަނައަށް ހޮވޭ ފަރާތަކަށް 3000ރ. ގެ އޮންލައިން ގިފްޓް ވައުޗާ އެއް ލިބޭނެ ކަމަށް އެކުންފުނިން ބުންޏެވެ. އަދި މި ލަކީޑްރޯއިން ދެވަނަ އަށް ހޮވޭ ފަރާތައް 1500ރ. ގެ ގިފްޓް ވައުޗާ އެއް ލިބޭއިރު ތިންވަނައަށް ހޮވޭ ފަރާތަށް 500ރ. ގެ ސިމްޑީ އޮންލައިން ގިފްޓް ވައުޗާ އެއް ދިނުމަށް ވަނީ ހަމަޖެހިފަ އެވެ.
މި ގިފްޓް ވައުޗަރުތައް ސިމްޑީ އޮންލައިން އެޕް މެދުވެރިކޮށް ލިބެން ހުންނަ ކޮންމެ ޕްރޮޑަކްޓަކަށް ރިޑީމް ކުރެވޭނެ އެވެ.
