ވެލިންޓަން، ނިއު ޒީލެންޑް (އޮގަސްޓް 11) - ނިއު ޒީލެންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕްގެ ކުއާޓާ ފައިނަލުގައި މިއަދު ކުޅުނު މެޗުން ނެދަލެންޑްސް އަތުން 2-1 އިން މޮޅުވެ، ސްޕެއިނުން ސެމީގެ ފުރަތަމަ ޖާގަ ޔަގީންކޮށްފި އެވެ.
މިއީ ވިމެންސް ވޯލްޑް ކަޕްގެ ސެމީ ފައިނަލަށް ސްޕެއިން ދަތުރުކުރި ފުރަތަމަ ފަހަރެވެ. ސެމީގައި ސްޕެއިން ކުޅޭނެ ޓީމެއް އެނގޭނީ މިއަދު ޖަޕާނާއި ސްވިޑެން ބައްދަލުކުރާ މެޗުންނެވެ. މިއީ، ވޭތުވެދިޔަ 26 އަހަރު ތެރޭ ސްޕެއިނުން ބޮޑު މުބާރާތެއްގެ ސެމީގައި ކުޅޭ ފުރަތަމަ ފަހަރެވެ.
ވެލިންޓަން ރީޖަނަލް ސްޓޭޑިއަމްގައި މިއަދު ކުޅުނު މެޗުގެ ބޮޑުބައިގައި ދެ ޓީމުން ވެސް ރަނގަޅު ކުޅުމެއް ދެއްކި ނަމަވެސް ގޯލެއް ފެނިފައިނުވެ އެވެ. މި މެޗުގައި ލީޑުނެގި ގޯލު ސްޕެއިނުން ޖެހީ 81 ވަަނަ މިނިޓްގަ އެވެ. މަރިއޯނާ ކަލްޑެންޓޭ ވަނީ ސްޕެއިނަށް ލިބުނު ޕެނަލްޓީ ގޯލަށް ވައްދާލައިފަ އެވެ. މިއީ ނެދަލެންޑްސްގެ ސްޓެފަނީ ވެން ޑާ ގްރާޓް އަތުގައި ބޯޅަ ޖެހުމުން ދިން ޕެނަލްޓީ އެކެވެ.
ސްޕެއިން މޮޅުވާނެ ކަމަށް ބެލެވިފައިވަނިކޮށް، އިތުރު ވަގުތުގެ ތިން ވަނަ މިނިޓްގައި ނެދަލެންޑްސްގެ ވެން ޑާ ގްރާޓް ވަނީ ގޯލެއް ޖަހައި، މެޗުގެ ނަތީޖާ ހަމަހަމަކޮށްދީފަ އެވެ.
އިތުރު ވަގުތުގެ ފުރަތަމަ ހާފުގެ 11 ވަނަ މިނިޓްގައި ސްޕެއިން މޮޅުކޮށްދިން ލަނޑު ޖެހީ 19 އަހަރުގެ ސަލްމާ ޕަރަލުއޭލޯ އެވެ. ސަލްމާ މި ގޯލު ޖެހީ އޭރިއާތެރެއިން ލިބުނު ފުރުސަތެއްގައި ގޯލުގެ ތެރެއަށް ބޯޅަ ފޮނުވާލައިގެންނެވެ. އޭނާ އަކީ ވޯލްޑް ކަޕެއްގައި ސްޕެއިނަށް ގޯލެއް ޖަހައިދިން އެންމެ ހަގު ކުޅުންތެރިޔާ އެވެ.
