އޯކްލޭންޑް، ނިއު ޒީލެންޑް (އޮގަސްޓް 15) - ނިއު ޒީލެންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕްގެ ފުރަތަމަ ސެމީ ފައިނަލުގައި ސްވިޑެން އަތުން 2-1 އިން މޮޅުވެ، ސްޕެއިން މުބާރާތުގެ ފައިނަލުގެ ފުރަތަމަ ޖާގަ ހޯދައިފި އެވެ.
މިއީ ސްޕެއިނުން ފައިނަލުގައި ކުޅޭ ފުރަތަމަ ފަހަރެވެ. އަނެއްކޮޅުން، ސްވިޑެން މި ވަނީ ޖެހިޖެހިގެން ދެ ވަނަ ފަހަރަށް ވޯލްޑް ކަޕްގެ ސެމީ ފައިނަލުން ބަލިވެފަ އެވެ. ޖުމްލަ އެކު، ފީފާ ވިމެންސް ވޯލްޑް ކަޕްގެ ހަތަރު މުބާރާތެއްގެ ސެމީގައި ސްވިޑެން ވަނީ ބަލިވެފަ އެވެ. އެންމެ ފަހުން، ފްރާންސްގައި 2019 ވަނަ އަހަރު ބޭއްވި ވިމެންސް ވޯލްޑް ކަޕްގެ ސެމީ ފައިނަލުން ސްވިޑެން ބަލިވީ ނެދަލެންޑްސް އަތުންނެވެ.
އެޑެން ޕާކުގައި މިއަދު ކުޅުނު ސެމީ ފައިނަލް މެޗުގެ ބޮޑުބައި ދިޔައީ ދެ ޓީމުން ކުރެ އެއް ޓީމަކަށް ވެސް ލަނޑެއް ނުޖެހި އެވެ. އެ ގޮތުން، ސްޕެއިން އިން ލީޑުނެގީ 19 އަހަރުގެ ސަލްމާ ޕަރަލުއޭލޯ، މެޗުގެ 81 ވަނަ މިނިޓްގައި ޖެހި ގޯލުންނެވެ. ސަލްމާ ވަނީ ކުއާޓާ ފައިނަލުގައި ބަދަލަކަށް ކުޅެން އަރައި، ނެދަލެންޑްސް އަތުން ސްޕެއިން މޮޅުކޮށްދިން ގޯލު ވެސް ޖަހައިފަ އެވެ.
ސްވިޑެން އިން ކުޅުން ރަނގަޅުކޮށް މެޗުގެ 88 ވަނަ މިނިޓްގައި ނަތީޖާ ހަމަހަމަކުރި އެވެ. އެ ޓީމުގެ ގޯލު ޖަހައިދިނީ ރެބޭކާ ބްލޮމްކްވިސްޓް އެވެ. އޭނާ، ސްވިޑެން އަށް އެއްވަރުކޮށްދިންތާ 93 ސިކުންތަށް ފަހު، ސްޕެއިން މޮޅުވި ގޯލު ޖެހީ އެ ޓީމުގެ ކެޕްޓަން، އޯލްގާ ކަރްމޯނާ އެެވެ.
އަންނަ އާދިއްތަ ދުވަހު ކުޅޭ ފައިނަލް މެޗުގައި ސްޕެއިން ވާދަކުރަންް ޖެހޭ ޓީމެއް އެނގޭނީ މާދަމާ އޮސްޓްރޭލިއާ އާއި އިންގްލެންޑް ކުޅޭ ދެ ވަަނަ ސެމީ ފައިނަލް މެޗުންނެވެ.
