ލަންޑަން (އޮގަސްޓް 10) - ސައުތެމްޓަން އަށް ކުޅެމުން އަންނަ ބެލްޖިއަމްގެ މިޑްފީލްޑަރު، ރޮމެއޯ ލަވިއާ ހޯދުމުގެ ރޭހަށް ޗެލްސީން ވަދެފައިވާ ކަމަށް ރިޕޯޓްތައް ބުނެފި އެވެ.
މެންޗެސްޓާ ސިޓީ ޔޫތު ޓީމުގައި ވިދާލި ލަވިއާ، 19، މިދިޔަ އަހަރު ފަސް އަހަރުގެ ކޮންޓްރެކްޓެއްގައި ސައުތެމްޓަން އަށް ސޮއިކުރި އެވެ. ސައުތެމްޓަން ޓީމުގައި ލަވިއާ، މިދިޔަ ސީޒަނުގައި ދެއްކި މޮޅު ކުޅުމާ އެކު އޭނާ އަށް ގިނަ ޓީމުތަކެއްގެ ހުށަހެޅުން ވަނީ ލިބިފަ އެވެ.
އެ ގޮތުން، ލަވިއާ ހޯދަން ލިވަޕޫލުން ކުރި ދެ ބިޑެއް ސައުތެމްޓަން އިން އަނބުރާ ފޮނުވާލާފައިވާއިރު، އެންމެ ފަހުން ކުރި ބިޑާ މެދު ވެސް ހިތްހަމަނުޖެހޭ ކަމަށް ރިޕޯޓްތައް ބުނެ އެވެ.
ލިވަޕޫލުން ލަވިއާ ގަންނަން އެންމެ ފަހުން ކުރި ބިޑަކީ 60 މިލިއަން ޑޮލަރެވެ. ލަވިއާ ވިއްކަން ސައުތެމްޓަން އިން ކިޔާ އަގު 70 މިލިއަން ޑޮލަރާ ގާތްކުރެ އެވެ.
ޗެލްސީން ބްރައިޓަން އަށް ކުޅެމުން އަންނަ މޮއިސަސް ކައެސޭޑޯ ގަންނަން ކުރަމުން އަންނަ މަސައްކަތަށް އަލިމަގެއް ނުލިބޭތީ އެހެން މިޑްފީލްޑަރަކަށް ފާރަލާން ފަށާފައިވާއިރު، އެ ޓީމުން ޓާގެޓްކުރަނީ ލަވިއާ އަށް ކަމަށް ރިޕޯޓްތައް ބުނެ އެވެ. އެ ގޮތުން ޗެލްސީން ލަވިއާ އަށް 64 މިލިއަން ޑޮލަރުގެ ބިޑެއް ތައްޔާރުކުރަމުން އަންނަ ކަމަށް އިނގިރޭސި މީޑިއާތަކުން ވަނީ ރިޕޯޓްކޮށްފަ އެވެ.
