އެމްޑީޕީން ވަކިވެ ދަ ޑިމޮކްރެޓްސް ނަމުގައި އާ ޕާޓީއެއް އުފެއްދި މީހުންނާ މެދު އެއްވެސް ނުރުމެއް ނެތް ކަމަށާއި އެމްޑީޕީއާއެކު އަލުން މަސައްކަތް ކުރަން އަންނަން ތިބެފި ނަމަ މަރުހަބާ ކިޔާނެ ކަމަށް، އެމްޑީޕީގެ ރިޔާސީ ކެމްޕެއިންގެ ތަރުޖަމާނު މާރިޔާ އަހުމަދު ދީދީ މިއަދު ވިދާޅުވެއްޖެ އެވެ.
އެމްޑީޕީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހުގެ ކެމްޕެއިން ތަރުޖަމާނު މާރިޔާ މިއަދު ބޭއްވި ނޫސްވެރިންގެ ބައްދަލުވުމުގައި މާރިޔާ ވިދާޅުވީ، ޕާޓީން ބަޔަކު ކެނޑިގެން ޑިމޮކްރެޓްސް އުފެއްދި ނަމަވެސް އެމްޑީޕީން ވަކިވި މެމްބަރުންގެ އަދަދު މާ ބޮޑު ނޫން ކަމަށެވެ.
"އަޅުގަނޑުމެންނަކަށް ފާހަގައެއް ނުވޭ އެމްޑީޕީން މާ ބައިވަރު ބަޔަކު ކެނޑިގެން ދިޔަ ކަމަކަށް، އަޅުގަނޑުމެން ގަބޫލުކުރަނީ އެމްޑީޕީ މި އޮތީ ހަމަ [ކުރިއެކޭ އެއް ގޮތަށް] އެކަތިގަނޑެއްހެން، އެމްޑީޕީ ނަގާނެ ހަމަ ބޮޑު ތަނުން، މި އިންތިހާބު،" މި ސަރުކާރުގެ ޑިފެންސް މިނިސްޓަރަކަށް ވެސް ހުންނެވި މާރިޔާ ވިދާޅުވި އެވެ.
ރިޔާސީ އިންތިހާބުގެ ދެ ވަނަ ބުރަކަށް ގޮސްފި ނަމަ، ޑިމޮކްރެޓްސްގެ މެމްބަރުން އެމްޑީޕީއަށް ވޯޓު ދޭން ފަދަ ހާލަތެއް ވެސް އައިސްދާނެ ކަމަކަށް، ޑިމޮކްރެޓްސް އުފެއްދެވުމުގައި އިސްކޮށް ހުންނެވި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ މި ފަހުން ވިދާޅުވެފަ އެވެ.
އެމްޑީޕީގެ ކުރީގެ ރައީސް ނަޝީދުގެ އެ ވާހަކައާ ގުޅޭ ގޮތުން "އަދަދު" ނޫހުން ކުރި ސުވާލަކަށް ޖަވާބު ދެއްވަމުން މާރިޔާ ފުރަތަމަ ވެސް ވިދާޅުވީ އެމްޑީޕީއަކީ އަބަދުވެސް އެ ޕާޓީއަށް ގުޅޭން ކޮންމެ މީހަކަށް ވެސް މަރުހަބާ ކިޔާނެ ޕާޓީއެއް ކަމަށެވެ.
"ދެ ވަނަ ބުރު ކީއްކުރަންތޯ، ފުރަތަމަ ބުރު ވެސް، ހުރިހާ ބޭފުޅުން ހަމަ ވަޑައިގަންނަވަންވީ، އަޅުގަނޑުމެން ރުޅި އައިސްގެނެއް ނޫން އެއްވެސް ބަޔަކު ދުރަށް ޖެހިފައި ވަނީ ވެސް، އަޅުގަނޑުމެންގެ ތެރެއަށް އައިމަ އެއީ ދެން ހަމަ ސީދާ އެމްޑީޕީ ބޭފުޅުން،" މާރިޔާ ވިދާޅުވި އެވެ.
އެއް އަތޮޅެއްގެ އެތައް ރަށެއްގައި، ޑިމޮކްރެޓްސްގެ ކެންޑިޑޭޓު އަދި ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު އިލްޔާސް ލަބީބަށް ކެމްޕެއިން ކުރެއްވުމަށް ފަހު ޏ. ފުވައްމުލައް ސިޓީގައި މިދިޔަ އަންގާރަ ދުވަހު ބޭއްވި ޑިމޮކްރެޓްސްގެ ޖަލްސާގައި ނަޝީދު ވާހަކަ ދެއްކެވީ ދެވަނަ ބުރަށް ވެސް އެ ޕާޓީގެ ކެންޑިޑޭޓަށް ނުދެވިދާނެ ހާލަތަކަށް ވިސްނާވަޑައިގެންނެވެ.
އިދިކޮޅު ޕީޕީއެމް/ޕީއެންސީގެ މެމްބަރުންގެ ކިބައިން އެމަނިކުފާނު ނުސީދާ ގޮތެއްގައި އެދިވަޑައިގެންނެވީ ދެ ވަނަ ބުރެއްގައި ޑިމޮކްރެޓުން، އެ ކޯލިޝަނަށް ވޯޓް ދޭ ފަދަ ކެންޑިޑޭޓަކު ނެރުމަށެވެ. އެ ކޯލިޝަނުގެ ކެންޑިޑޭޓަކު ދެވަނަ ބުރުގައި އޮންނަ ވަރަށް ވޯޓު އަޅަން އެދިވަޑައިގެންނެވުން ކަމަށް ވެސް އެ ވާހަކަފުޅު ބައެއް މީހުން ތަރުޖަމާ ކުރެ އެވެ.
"އަޅުގަނޑު މިރޭ ޕީޕީއެމްގެ މެމްބަރުންގެ ގާތުގައި އިހުލާސްތެރިކަމާ އެކުގައި ދަންނަވަން އޮތް ނުކުތާއެއް އެބަ އޮތް. ދެވަނަ ބުރެއްގައި އަޅުގަނޑުމެން ލައްވާ އެމްޑީޕީއަށް ވޯޓުދޭން ޖެހޭ ގޮތެއް ތިޔަ ބޭފުޅުން ނުހައްދަވާތި،" ނަޝީދު ވިދާޅުވި އެވެ.
ޖެނުއަރީ 28، ގައި ބޭއްވި އެމްޑީޕީގެ ރިޔާސީ ޕްރައިމަރީން ނާކާމިޔާބުވި ފަހުން ނަޝީދާއި އެމަނިކުފާނުގެ ވަފާތެރިން އެމްޑީޕީގައި ތިބެގެން ސަރުކާރާ ދެކޮޅަށް ހަރަކާތްތެރިވާން ފެށި އެވެ. ޑިމޮކްރެޓްސް އުފެއްދުމުގެ މަސައްކަތް ފެށީ، ސަރުކާރާ ދެކޮޅަށް ހަރަކާތްތެރިވި މެންބަރުން އެމްޑީޕީން ވަކިކުރަން އުޅުމުންނެވެ.
