ރިޔާދު، ސައުދީ އަރަބިއްޔާ (އޮގަސްޓް 10) - ސައުދީ އަރަބިއްޔާގައި ކުޅިވަރުގެ ބޮޑު އިވެންޓްތައް ބާއްވަން ބޮޑު ފަންޑެއް އެކުލަވާލައި، ވިޝަން 2030 އަށް އަމާޒުހިފަފާފައިވާ ކަންކަން ކުރުމަށް ކުޅިވަރުގެ ތެރެއިން ހަރަދުކުރުމުގެ ޕްލޭނެއް ހަދައިފި އެވެ.
އެ ގޮތުން، އަލަށް އެކުލަވާލި ފަންޑް ހިންގަން، ވުޖޫދުކުރި އާ ސްޕޯޓްސް އިންވެސްޓްމަންޓް ކުންފުންޏަކީ، އެސްއާރްޖޭ ސްޕޯޓްސް އިންވެސްޓްމަންޓް އެވެ. އެސްއާރްޖޭ ސްޕޯޓްސް އިންވެސްޓްމަންޓް އަށް ފަންޑު ފޯރުކޮށްދޭނީ ޕަބްލިކް އިންވެސްޓްމަންޓް ފަންޑް (ޕީއައިއެފް) މެދުވެރިކޮށެވެ.
އިނގިރޭސި ޕްރިމިއާ ލީގުގެ ކްލަބް، ނިއުކާސަލް ޔުނައިޓެޑް ހިންގަމުން އަންނަނީ ވެސް ޕީއައިއެފް މެދުވެރިކޮށް، ފައިސާ ހޯދާ ކުންފުންޏަކުންނެވެ.
ޕީއައިއެފް އަކީ ދުނިޔޭގެ އެންމެ ބޮޑު ސޮވެރިން ވެލްތު ފަންޑް އެވެ. އެ ގޮތުން އެ ފަންޑުގައި ޖުމްލަ އެކު، މިދިޔަ އަހަރުގެ ނިޔަލަށް، 595 ބިލިއަން ޑޮލަރެވެ.
ޕީއައިއެފްގެ ޗެއާމަން، ސައުދީ އަރަބިއްޔާގެ ވަލީ އަހުދު މުހައްމަދު ބިން ސަލްމާން ދާދި ފަހުން ވިދާޅުވީ، އެސްއާރްޖޭއާ އެކު، ކުޅިވަރުގައި ސައުދީގެ ނަން އާ ހަރުފަތަކަށް ގެންދެވޭނެ ކަމުގެ ފުރިހަމަ ޔަގީންކަން އެބައޮތް ކަމަށެވެ.
އެސްއާރްޖޭ މެދުވެރިކޮށް، ސައުދީ އަރަބިއްޔާގެ ޕްރޮފެޝަނަލް ލީގު (ޕްރޯ ލީގު)ގެ ކްލަބްތަކަށް ވަނީ ކުޅުންތެރިން ގަންނަން ފަންޑް ދޭން ފަށައިފަ އެވެ.
އެ ގޮތުން، 2030ގެ ނިިޔަލަށް ސައުދީ ލީގު ދުނިޔޭގެ އެންމެ ނަން ހިނގާ ލީގަށް ހެދުމުގެ ގޮތުން، ފުރަތަމަ މަރުހަލާގެ ތިން އަހަރުގެ ޕްލޭންގެ ތެރެއިން ކްލަބްތަކަށް 20 ބިލިއަން ޑޮލަރު އެކިއެކި ކަންކަމަށް ދޫކުރަން ވަނީ ނިންމައިފަ އެވެ.
ފުޓްބޯޅަ ލީގު ވަރުގަދަ ކުރުމުގެ އިތުރުން، ދެން އެސްއާރްޖޭ އިން އަމާޒުހިފާފައިވަނީ ބޮޑެތި ކުޅިވަރު އިވެންޓްތައް ސައުދީގައި ހޯސްޓް ކުރުމަށެވެ. ފޯމިއުލާ ވަން ގްރޯން ޕްރީ އާއި ޓެނިހުގެ އޭޓީޕީ އާއި ޑަބްލިއުޓީއޭގެ މުބާރާތްތަކުގެ އިތުރުން، އެހެނިހެން ކުޅިވަރުތަކުގެ ބޮޑު މުބާރާތްތައް ވެސް ސައުދީ އަށް ގެނައުމުގެ މަސައްކަތް ކުރަން އެސްއާރްޖޭގެ ޕްލޭނުގައި އެބައޮތެވެ.
