ލަންޑަން (އޮގަސްޓް 9) - މެންޗެސްޓާ ޔުނައިޓެޑަށް ކުޅެމުން އަންނަ އިނގިރޭސި ޑިފެންޑަރު، ހެރީ މެގުއާ، ވެސްޓް ހޭމް ޔުނައިޓެޑަށް ވިއްކާލަން ޔުނައިޓެޑުން އެއްބަސްވުމަކަށް އަތުވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
މީގެ ހަފްތާއެއްހާ ދުވަސް ކުރިން ވެސްޓް ހޭމް އިން، މެގުއާ، 30، ގަންނަން ކުރި 28 މިލިއަން ޑޮލަރުގެ ބިޑް، ޔުނައިޓެޑުން އަނބުރާ ފޮނުވާލީ އެވެ. އޭގެ ފަހުން، ވެސްޓް ހޭމް އިން މި ހުށަހެޅީ މެގުއާ އާއި ޔުނައިޓެޑްގެ ސްކޮޓްލެންޑް މިޑްފީލްޑަރު، ސްކޮޓް މެކްޓޮމިނޭ ގަންނަން އެކުގައި 77 މިލިއަން ޑޮލަަރެވެ.
އިނގިރޭސި މީޑިއާ ރިޕޯޓްތައް ބުނާގޮތުން، ޔުނައިޓެޑުން ވަނީ މެގުއާ 38 މިލިއަން ޑޮލަރުގެ ޑީލެއްގައި ދޫކޮށްލަން އެއްބަސްވެފަ އެވެ.
މީގެ ހަތަރު ވަރަކަށް އަހަރު ކުރިން، 2019 ވަނަ އަހަރު ލެސްޓާ ސިޓީ އިން 93 މިލިއަން ޑޮލަރަށް، ދުނިޔޭގެ އެންމެ އަގުބޮޑު ޑިފެންޑަރުގެ ގޮތުގައި ޔުނައިޓެޑާ ގުޅުނު މެގުއާ އެ ކުލަބާ އެކު ހަދާފައިވާ ކޮންޓްރެކްޓްގައި ބާކީ ދެ އަހަރު އެބައޮތެވެ. އެކަމަކު، ޔުނައިޓެޑްގެ ކެޕްޓަން ބޭންޑް ދާދި ފަހުން މެގުއާ އަތުން އަތުލިއިރު، މި ޓްރާންސްފާގައި އޭނާ ކްލަބް ބަދަލުވާނެކަމަށް އޮތީ ކުރިން ވެސް ބެލެވިފަ އެވެ.
މިދިޔަ ސީޒަނުގައި ޔުއެފާ ކޮންފަރެންސް ލީގު ކާމިޔާބުކުރި ވެސްޓް ހޭމް އަކީ މި ފަހަރުގެ ޓްރާންސްފާގައި އަދި ކުޅުންތެރިއަކު ސޮއިނުކޮށް އޮތް ހަމައެކަނި ކްލަބް އެވެ.
ވެސްޓް ހޭމްގެ ކެޕްޓަން، ޑެކްލަން ރައިސް ވަނީ 138 މިލިއަން ޑޮލަރަށް އާސެނަލަށް ސޮއިކޮށްފަ އެވެ. ވެސްޓް ހޭމް އިން އަންނަނީ އަޔަކްސް އަށް ކުޅެމުން އަންނަ މެކްސިކޯގެ މިޑްފީލްޑަރު އެޑްސަން އަލްވަރޭޒް ގަންނަން މަޝްވަރާ ކުރަމުންނެވެ. އަލްވަރޭޒް ގަންނަން 35 މިލިއަން ޑޮލަރު ދޭން ވެސްޓް ހޭމް އިން އޮތީ ތައްޔާރަށެވެ. އޭގެ އިތުރުން، ސައުތެމްޓަންގެ ކެޕްޓަން ޖޭމްސް ވޯޑް-ޕްރައުސް ގަންނަން ވެސް ވެސްޓް ހޭމް އިން އަންނަނީ މަސައްކަތް ކުރަމުންނެވެ.
