"އަދި ތަންކޮޅެއް އަވަސް ސެޕްޓެމްބަރު ނުވައެއް ގެ ސީދާ ނަތީޖާ ދަންނަވަން. އެހެން ނަމަވެސް އިލްޔާސް ލަބީބު ދެވަނަ ބުރަކަށް ނުދާނެ ހަމަ އެއްވެސް ގޮތެއް އަޅުގަނޑަކަށެއް ނުފެނޭ. ހަަމަ އެއް ގޮތެއް ވެސް އަޅުގަނޑަކަށް ނުފެނޭ،" ޖުލައި 23 ގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވި އެވެ.
އޭރު އެމަނިކުފާނުގެ ތަސައްވުރަކީ ރިޔާސީ އިންތިހާބުގެ ދެވަނަ ބުރެއް އޮތުމާއި އެ ބުރުގައި ދަ ޑިމޮކްރެޓްސްގެ ކެންޑިޑޭޓް، ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު ވާދަކުރެއްވުމެވެ. އެންމެ ބޮޑު ސަބަބަކަށް ދެއްކެވީ އިލްޔާސްގެ ޒުވާން ކަމާއި ރައީސް އިބްރާހީމް މުހައްމަދު ސޯލިހުގެ ދޮށިކަމެވެ.
އެ ތަސައްވުރާ އެކު އެތައް އަތޮޅެއްގެ އެތައް ރަށެއްގައި ކެމްޕޭން ކުރެއްވުމަށް ފަހު ފުވައްމުލަކަށް ވަޑައިގެން ރޭ ބޭއްވި ޖަލްސާގައި އެހެން ނަމަވެސް އެމަނިކުފާނު ކުރެއްސެވީ މުޅިން އެހެން ތަސައްވުރެކެވެ.
އިދިކޮޅު ޕީޕީއެމް/ޕީއެންސީގެ މެމްބަރުންގެ ކިބައިން އެމަނިކުފާނު ނުސީދާ ގޮތެއްގައި އެދިވަޑައިގެންނެވީ ދެވަނަ ބުރެއްގައި ޑިމޮކްރެޓުން، އެ ކޯލިޝަނަށް ވޯޓް ދޭ ފަދަ ކެންޑިޑޭޓަކު ނެރުމަށެވެ. އެ ކޯލިޝަނުގެ ކެންޑިޑޭޓަކު ދެވަނަ ބުރުގައި އޮންނަ ވަރަށް ވޯޓު އަޅަން އެދިވަޑައިގެންނެވުން ކަމަށް ވެސް އެ ވާހަކަފުޅު ތަރުޖަމާ ވެ އެވެ.
"އަޅުގަނޑު މިރޭ ޕީޕީއެމްގެ މެމްބަރުންގެ ގާތުގައި އިހުލާސްތެރިކަމާ އެކުގައި ދަންނަވަން އޮތް ނުކުތާއެއް އެބަ އޮތް. ދެވަނަ ބުރެއްގައި އަޅުގަނޑުމެން ލައްވާ އެމްޑީޕީއަށް ވޯޓުދޭން ޖެހޭ ގޮތެއް ތިޔަ ބޭފުޅުން ނުހައްދަވާތި،" ނަޝީދު ވިދާޅުވި އެވެ.
ދެވަނަ ބުރުގެ ވޯޓުލުން އޮންނާނެ ގޮތް އެއަށް ވުރެ އަދި ސާފުކޮށް ތަސައްވުރު ކުރައްވަމުން އެމަނިކުފާނު ވިދާޅުވި ގޮތުގައި އެ ބުރުގައި ތިއްބަވާނެ ކެންޑިޑޭޓުން ކަނޑައެޅޭނީ ޕީޕީއެމްގެ މެމްބަރުން ވޯޓު ދޭ ގޮތެއްގެ މައްޗަށެވެ.
"ޑިމޮކްރެޓުން އެމްޑީޕީއަށް ވޯޓު ލާން ޖެހޭ ގޮތަކަށް އެ ބުރުގެ ކަންތައް ތިޔަ ބޭފުޅުން ނުބާއްވަވާތި. މިއަދު ޕީޕީއެެމްއަށް އެކަން އެހެން ކޮށްދެވެން އެބަ އޮތް،" ނަޝީދު ވިދާޅުވި އެވެ.
ޕީޕީއެމަށް ތައުރީފު ކުރައްވަމުން އެމަނިކުފާނު ވިދާޅުވީ އެންމެ މެމްބަރުން ގިނައީ އެ ޕާޓީގެ ކަމަށެވެ. ޖުމްލަކޮށް އެމަނިކުފާނު ކުރެއްސެވި ތަސައްވުރުގައި ދަ ޑިމޮކްރެޓްސް އަކީ ދެވަނަ ބުރަކަށް ނުގޮސް، ކޮންމެވެސް އެހެން ޕާޓީއަކަށް ވޯޓު ދޭނެ ބައެކެވެ. އަދި, އެއީ ދެވަަނަ ބުރަށް ވަޑައިގަންނަވާ ކެންޑިޑޭޓެއްގެ ގޮތުން، އެމްޑީޕީއަށް ވެސް ވޯޓު ދީފާނެ ބައެކެވެ.
