ލަންޑަން (އޮގަސްޓް 8) - ވެސްޓް ހޭމް އިން 77 މިލިއަން ޑޮލަރަށް މެންޗެސްޓާ ޔުނައިޓެޑަށް ކުޅެމުން އަންނަ އިނގިރޭސި ޑިފެންޑަރު، ހެރީ މެގުއާ އާއި ސްކޮޓްލެންޑްގެ މިޑްފީލްޑަރު ސްކޮޓް މެކްޓޮމިނޭ ގަންނަން ހުށަހަޅައިފި އެވެ.
މީގެ ހަފްތާއެއްހާ ދުވަސް ކުރިން ވެސްޓް ހޭމް އިން، މެގުއާ، 30، ގަންނަން ކުރި 28 މިލިއަން ޑޮލަރުގެ ބިޑް، ޔުނައިޓެޑުން ވަނީ އަނބުރާ ފޮނުވާލައިފަ އެވެ. މި ފަހަރު ވެސްޓް ހޭމް އިން މި ވަނީ މެގުއާ އާއި މެކްޓޮމިނޭ ގަންނަން އެކުގައި 77 މިލިއަން ޑޮލަަރު ހުށަހަޅައިފަ އެވެ.
ޔުނައިޓެޑުން ވެސްޓް ހޭމްގެ މި ހުށަހެޅުމާ މެދު އަދި ގޮތެއް ނުނިންމަ އެވެ. އާ ސީޒަނަށް ޔުނައިޓެޑަށް އިތުރު ކުޅުންތެރިން ގަނެވެން އޮތީ ބައެއް ކުޅުންތެރިން ވިއްކައިގެންނެވެ. އެ ގޮތުން، މެގުއާ އާއި މެކްޓޮމިނޭ އަކީ ޔުނައިޓެޑްގެ ކޯޗު އެރިކް ޓެން ހާގްގެ ޕްލޭނުގެ މާ ބޮޑު ހިއްސާއެއް އޮތް ދެ ކުޅުންތެރިން ކަމަށްނުވާތީ، އެ ކުޅުންތެރިން ރުހޭނަމަ ވެސްޓް ހޭމް އަށް ދިއުމުގެ ފުރުސަތު ބޮޑުކަމަށް ރިޕޯޓްތައް ބުނެ އެވެ.
ވެސްޓް ހޭމް އަކީ މި ފަހަރުގެ ޓްރާންސްފާގައި އަދި ކުޅުންތެރިއަކު ސޮއިނުކޮށް އޮތް ހަމައެކަނި ކްލަބް އެވެ. ވެސްޓް ހޭމްގެ ކެޕްޓަން، ޑެކްލަން ރައިސް ވަނީ 138 މިލިއަން ޑޮލަރަށް އާސެނަލަށް ސޮއިކޮށްފަ އެވެ.
ވެސްޓް ހޭމް އިން އަންނަނީ އަޔަކްސް އަށް ކުޅެމުން އަންނަ މެކްސިކޯގެ މިޑްފީލްޑަރު އެޑްސަން އަލްވަރޭޒް ގަންނަން މަޝްވަރާ ކުރަމުންނެވެ. އަލްވަރޭޒް ގަންނަން 35 މިލިއަން ޑޮލަރު ދޭން ވެސްޓް ހޭމް އިން އޮތީ ތައްޔާރަށެވެ.
