ގެދޮރުވެރިޔާގެ ސްކީމްގެ ދަށުން ފްލެޓް ލިބުމަށް 15،000 އަށް ވުރެ ގިނަ މީހުން ޝަރުތުހަމަވާ ކަމަށް ޕްލޭނިން މިނިސްޓްރީން އާންމުކުރި ވަގުތީ ލިސްޓުން ދައްކައިފި އެވެ.
"ގެދޮރުވެރިޔާ" ސްކީމްގެ ދަށުން ފްލެޓަށް އެދުނު މީހުންގެ ތެރެއިން ޝަރުތު ހަމަވާ އެންމެނަށް ފްލެޓް ދޭން ނިންމައި، ފްލެޓް ލިބޭ މީހުންގެ ވަގުތީ ލިސްޓު ސަރުކާރުން ގެޒެޓުކުރީ މިއަދު އެވެ. އެ ލިސްޓްގައިވާ ގޮތުން، ފްލެޓުތަކަށް އެދި ހުށަހެޅި 20،697 މީހުންގެ ތެރެއިން 15،046 މީހުންގެ ޝަރުތު ހަމަވެ އެވެ.
އޭގެ ތެރޭގައި ދެ ކޮޓަރީގެ އެޕާޓްމެންޓް ލިބުމަށް ޝަރުތުހަމަވާ 4،319 މީހުން އަދި ތިން ކޮޓަރީގެ ފްލެޓް ލިބުމަށް ޝަރުތު ހަމަވާ 10،727 މީހުން ހިމެނެ އެވެ. ތިން ކޮޓަރީގެ ފްލެޓް ލިބޭ މީހުންގެ ތެރޭގައި ޖޮއިންޓްކޮށް އެއް ފެލެޓެއް ލިބޭ މީހުން ވެސް ހިމެނެ އެވެ.
ހުޅުމާލޭގެ ދެ ވަނަ ފިޔަވަހީގައި މިހާރު ކުރިއަށް ދަނީ އެފްޑީސީއާ ގުޅިގެން އިންޑިއާގެ ދެ ކުންފުންޏެއް ކަމަށްވާ ޖޭއެމްސީ އަދި އެންބީސީސީ އާ ހަވާލުކޮށްގެން އަޅާ 4،000 ފްލެޓްގެ މަސައްކަތެވެ. ދެ ކުންފުނިން ވެސް އަޅަނީ 16 ޓަވަރުގެ ޖުމްލަ 2000 ހައުސިން ޔުނިޓެވެ. މި ޔުނިޓުތަކުގެ ކޮންކްރީޓު މަސައްކަތުގެ ބޮޑު ބައެއް ވަނީ ނިމިފަ އެވެ.
އިތުރު 4،000 ހައުސިން ޔުނިޓް އެޅުމަށް ފަހިދިރިއުޅުން ކޯޕަރޭޝަނުން އިންޑިއާގެ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އާއެކު ސޮއިކުރީ މި މަހުގެ ދެވަނަ ދުވަހު އެވެ.
މީގެ އިތުރުން ހުޅުމާލޭގައި އިތުރު 3،000 ފްލެޓް އެޅުމަށް ނެގޯޝިއޭޓް ކުރަމުން އަންނަކަމަށް ޕެލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން މިއަދު 'އަދަދު' އަށް ވިދާޅުވި އެވެ.
"މިހާރު އިތުރު 4،000 ފްލެޓް އަޅަން އެވަނީ ސޮއި ކުރެވިފަ. އަދި 3،000 ފްލެޓް އަޅަން މިހާރު ނެގޯޝިއޭޓް ކުރަމުން މިދަނީ. އެހެންވީމަ ޝަރުތުހަމަވާ އެންމެނަށް ފްލެޓް ލިބޭނެ،" އަކްރަމް ފާހަގަކުރެއްވި އެވެ.
ފްލެޓު ލިބޭ މީހުންގެ ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައި ވަނީ އޯގަސްޓު، 22 އާ ހަމަ އަށެވެ.
