ޝަރުތު ހަމަވާ އެންމެނަށް ފްލެޓް ދޭން ނިންމައި ގެދޮރުވެރިޔާގެ ސްކީމްގެ ދަށުން ފްލެޓް ލިބޭ މީހުންގެ ލިސްޓު ސަރުކާރުން މިއަދު ގެޒެޓުކޮށްފި އެވެ.
ހައުސިން މިނިސްޓަރީން މިއަދު ގެޒެޓު ކުރި އިއުލާނުގައި ބުނެފައި ވަނީ ވަގުތީ ލިސްޓުގައި ޝަރުތު ހަމަވާކަމަށް ޝަރުތު ކަނޑައަޅާފައިވާ ފަރާތްތަކުން ހުށަހަޅާފައިވާ ފޯމުގައި ދީފައިވާ ދިރިއުޅުމުގެ ހާލަތާގުޅޭ މައުލޫމާތުގެ ސައްހަކަން ކަށަވަރުކުމުގެ މަސައްކަތް އެ މިނިސްޓަރީން ކުރަމުން ގެންދާނެ ކަމަށެވެ.
ފްލެޓު ލިބޭ މީހުންގެ ވަގުތީ ލިސްޓަށް ޝަކުވާ ހުށަހެޅުމުގެ ފުރުސަތު ހުޅުވާލާފައި ވަނީ އޯގަސްޓު، 22 އާ ހަމަ އަށެވެ.
ފޯމުގައި ހުށަހަޅާފައިވާ މައުލޫމާތުގެ ސައްހަކަން ކަށަވަރު ނުކުރެވޭ ފަރާތްތަކުގެ ފޯމާމެދު "ގެދޮރިވެރިން ޕޯޓަލް" މެދުވެރިކޮށް ފޯމު ހުށަހެޅިއިރު، ވެފައިވާ އިގުރާރުގައިވާ ގޮތުގެ މަތިން އަމަލު ކުރެވޭނެ ކަމަށް ވެސް އެ މިނިސްޓަރީން ކުރި އިއުލާނުގައިވެ އެވެ.
ގެދޮރުވެރިޔާ ސްކީމުގެ ދަށުން ހުޅުމާލޭގެ ދެވަނަ ފިޔަވަހީގައި ސަރުކާރުން އަންނަނީ 18 ބުރީގެ 32 ޓަވަރު އިމާރާތް ކުރަމުންނެވެ. އޭގެތެރޭގައި ހިމެނެނީ ދެ ކޮޓަރީގެ 1200 އެޕާޓުމެންޓާއި ތިން ކޮޓަރީގެ 2800 އެޕާޓުމެންޓެވެ.
މާލެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމަށް މިސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ފްލެޓުތަކަށް އެދުމުގެ ފުރުސަތު ހުޅުވާލީ މިދިޔަ އަހަރުގެ ޖޫން 26 ގައެވެ. ފޯމު ހުށަހެޅުމުގެ ސުންގަޑި ހަމަވިއިރު ފްލެޓަށް އެދި 20،697 މީހުން ފޯމު ހުށަހެޅި އެވެ.
