ރިޔާސީ އިންތިޚާބު މި ވަނީ ބޯމަތިވެފަ އެވެ. ޕާޓީތަކުގެ ނަމުގައްޔާއި މިނިވަނުންގެ ގޮތުގައި ރެކޯޑު ޢަދަދެއްގެ ކެންޑިޑޭޓުން މި ވަނީ ރިޔާސީ އިންތިޚާބަށް ނަން ހުށަހަޅާފަ އެވެ. ތަރުތީބު އަދި ސާފު ނުވިޔަސް ވޯޓު ކަރުދާހުގައި ހުންނާނީ ކޮން ނަންތަކެއް ކަމާއި، ކޮން ޕާޓީތަކެއްގެ ލޯގޯތަކެއްކަން މިހާރު މި ވަނީ ސާފުވެފަ އެވެ. ހޫނުގަދަ ބަޙުޘްތަކާއި، ޝަރުއީ މަރުޙަލާތަކާއި، އިއްތިޙާދީ އެއްބަސްވުންތަކާއި، އަދި ކިއެއްތަ ބައިބައިވުންތަކުގެ ތެރެއިން، އަހަރެމެން ވެރިއަކު އިޚްތިޔާރު ކުރަންވީ، ކޮންކޮން ބައެއްގެ ތެރެއިންކަން ސާފުވެއްޖެ އެވެ. މިހާ ހިސާބުން ފެންމަތިވަނީ މުހިންމު ސުވާލެކެވެ. ތިމާގެ ވޯޓު ދޭނީ މީހަކަށްތޯ، ޕާޓީއަކަށްތޯ ނުވަތަ ފިކުރަކަށްތޯ ކުރެވޭ ސުވާލެވެ.
ވޯޓުލުމުގައި އިސްކުރަންވީ ސްޓްރެޓަޖީއެއްތަ؟
ވޯޓުލުމުގެ މަޤްޞަދުކަމުގައި ބެލެވިފައި މި އޮންނަނީ، ތިމާ ޤަބޫލުކުރާ އުޞޫލުތަކެއް އިސްކުރާ ކެންޑިޑޭޓަކަށް ތިމާ ތާއީދުކުރާކަން ހާމަކުރުމުގެ ގޮތުން ތިމާގެ ވޯޓު އޭނާއަށް ދިނުމުގެ މުހިންމު ކަމެވެ. އެއީ އޭނާއަށް އިންތިޚާބު ކާމިޔާބުކުރުމުގެ ފުރުޞަތު ކިތައްމެ ހަނިކަމުގައިވާ ވިޔަސް ވެހެވެ. އެހެންނަމަވެސް، މި ނޫން ގޮތެއްވެސް އެބައޮތެވެ. އެއީ ސްޓްރެޓަޖީއެއް ބޭނުންކުރުމެވެ. ތިމާ އެންމެ ތާއީދުކުރާ ފިކުރު އިސްކުރާ ކެންޑިޑޭޓަށް އިންތިޚާބު ކާމިޔާބުކުރެވޭނެކަމަށް ޤަބޫލުނުކުރެވޭނަމަ، ހޮވެން ބޭނުންނުވާ ކެންޑިޑޭޓު ނުހޮވޭނެކަން ޔަޤީންކުރުމަށް، ތިމާ ތާއީދުނުކުރާ، އެހެންނަމަވެސް އިންތިޚާބު ކާމިޔާބުކުރުމުގެ ފުރުޞަތު އޮތް އެހެން ކެންޑިޑޭޓަކަށް ތިމާގެ ވޯޓު ދިނުމެވެ.
މި ދެގޮތުން ކުރެ ތާއީދުކުރާ ފިކުރަށް ވޯޓު ދިނުމަކީ ފައްސި ވިސްނުމެއްކަމަށް ބެލެވިދާނެ އެވެ. އަދި މީހަކު ހޮވުނަނުދިނުމަށް އެހެން މީހަކަށް ވޯޓުލުމަކީ ނައްސި ވިސްނުމެއްކަމަށް ބެލެވިދާނެ އެވެ. އެހެންނަމަވެސް، ޙާލަތަށް ރިޢާޔަތްކޮށް މި ގޮތަށް ވިސްނައިގެން، "ގޯސް މީހަކު" އިންތިޚާބުވުމަށްވުރެ، "އެންމެ ގޯސްކަން ކުޑަ" މީހަކު އިންތިޚާބުވުން ރަނގަޅު ކަމުގައި ދެކި، ޢާއްމު ތާއީދުނެތް "ތިމާގެ ކެންޑިޑޭޓު" ދޫކޮށްލުމަކީ ނަތީޖާ ނެރެފައިވާ އުކުޅެކެވެ.
ބަލަންވީ މީހާއަށްތަ، ޕާޓީއަށްތަ، ގެންގުޅޭ ފިކުރަށްތަ؟
މި ހުރިހާ ކަންކަމަކީވެސް އިޚުލާސްތެރިކަމާއެކު ވޯޓުލުމުގައި މިނެކިރަންޖެހޭ ކަންކަމެވެ. ފުރަތަމަ މީހާގެ ވާހަކަ ދައްކަމާހެއްޔެވެ. އެ މީހާއަކީ، މިނިވަނެއްނަމަ، އޭނާ އަކީ ޤައުމުގައި އޮތް ޕާޓީ ނިޒާމުގެ ތެރޭ ބަސްބުނެވޭ ވަރުގެ ޝަޚުޞިއްޔަތެއްތޯ ވިސްނާލާށެވެ.
ޕާޓީއެއްގެ ލީޑަރެއްނަމަ އޭނާ އަކީ އެ ޕާޓީގެ ވިޕް ކޮންޓްރޯލް ކުރެވޭވަރަށް ޕާޓީގައި ތާއީދު އޮތް މީހެއްތޯ ވިސްނާލާށެވެ. އެ މީހާ ޙަޤީޤަތުގައިވެސް ރަމްޒުކުރަނީ ޕާޓީގެ މަސްލަޙަތުތޯ، ނުވަތަ އޭނާގެ ޒާތީ މަސްލަހަތުތޯ ވަޒަންކޮށްލާށެވެ. އޭނާއަކީ އޭނާގެ ޕާޓީގެ މެންބަރުން ޤަދަރުކުރާ މީހެއްތޯ ޔަޤީންކުރާށެވެ. އޭނާގެ ފަތިފުށް ހޯދައި ދެނެގަންނާށެވެ. އޭނާގެ ދުލުން ބޭރުވާ ލަފުޒުތަކަކީ ކިހާ ބުރަދަނެއް ހުރި ލަފުޒުތަކެއްތޯ ޔަޤީންކުރާށެވެ. އޭނާގެ ޒާތީ ފިކުރާއި ޕާޓީގެ ފިކުރާ ދެމެދު ހުރި އެއްގޮތް ކަންކަމާއި ފުށުއެރުންތަކާއި ތަފާތުތައް ދެނެ ވަޒަންކުރާށެވެ.
އޭނާއަކީ ޤައުމުގެ ހުންގާނުގައި ހިފަން ކުފޫ ހަމަވާ މީހެއްތޯ ބަލާށެވެ. ބަލަންވީ ނަސަބުފަތެއް ނޫނެވެ. ނެޕޮޓިޒަމް ތިޔާގި ސިޔާސީ މައިދާނުގައި، ވަކި މީހެއްގެ ދަރިއަކަށް ނުވަތަ އަޚަކަށް ނުވަތަ އުޚުތަކަށް ވީތީ، އޭނާއަކީ ޤައުމުގެ ވެރިކަމުގެ ވާރިސެއް ކަމުގައި ނުދެކޭށެވެ. އެ ކަންކަން އެއްފަރާތްކޮށް، އޭނާގެ ކިބައިގައި ހުރި ޢިލްމަކާއި، ހިލްމަކާއި، އަމާނާތްތެރިކަމާއި، ނަޒާހާތްތެރިކަމާއި، ހިތްވަރާއި އިޚުލާސްތެރިކަމާއި މި ނޫންވެސް ސިފަތަކަށް ބިނާކޮށް، އޭނާގެ ފެންވަރު ތިމާ އަމިއްލައަށް ކަނޑައަޅާށެވެ.
މެނިފެސްޓޯތައް ކޮބާ؟
2023 ވަަނަ އަހަރުގެ ރިޔާސީ އިންތިޚާބު ފެށެން ކުޑަކުޑަ ދުވަސްކޮޅަކަށް ވެފައި ވާއިރު، ފިކުރަކަށް ތާއީދު ހޯދުމުގެ މަޤްޞަދުގައި އިންތިޚާބީ މެނިފެސްޓޯއެއް ދައްކާފައިވަނީ ކިތައް ޕާޓީން ހެއްޔެވެ؟ ނުވަތަ ކިތައް މިނިވަނުން ހެއްޔެވެ؟ ރައްޔިތުންގެ ވޯޓުތައް ބިނާ ކުރަންވީ ހަމައެކަނި "ޕޯޑިއަމް ވަޢުދު"ގެ މައްޗަށް ހެއްޔެވެ؟ ކުރިއަށް އޮތް ފަސް އަހަރު ޤައުމު ގެންދާނޭ މިސްރާބު ރައްޔިތުން ކުރަންވީ އަންދާޒާ ހެއްޔެވެ؟ ޕާޓީއެއްނަމަ، ރިޔާސީ ރޭސް ކާމިޔާބުކުރުމަށްފަހު އެޖެންޑާގައި ހުރި ކަންކަން ފުރިހަމަކުރުމަށް މަގުފަހިކުރުމުގެ ގޮތުން، ރައްޔިތުންގެ މަޖިލީހުގެ އަޤުލަބިއްޔަތު ހޯދުމަށް ކުރަން ނިންމާފައިވާ ކަންތައްތަކެއް އެބަހުރިހެއްޔެވެ؟ ލޯކަލް ގަވަނަންސަށް އޮތީ ކޮން ރޭވުމެއްހެއްޔެވެ؟
މިހާލަތުގައި ފިކުރަކަށް ތާއީދުކޮށްގެން ވޯޓުލުން ވެގެންދާނީ ހަމައެކަނި ޕާޓީގެ އަސާސީ ސިޔާސަތުތަކަށް ތާއީދުކޮށްގެން ވޯޓުލުމަށް ނޫންތޯއެވެ؟ ކުރިއަށްއޮތް ފަސް އަހަރަށް ކުރާ ތަޞައްވަރާއި، އެ ތަޞައްވަރު ކުލަކުރާނޭ ހަރުދަނާ ރޭވުންތަކާއި ބައްޓަންކުރާނޭ ސިޔާސަތުތައް ނޭނގި، ފިކުރަކަށް ކުރާ ތާއީދު، އެންމެ އިޚުލާސްތެރިކަމާއެކު ވޯޓުކަރުދާހަށް ތިރިކުރެވޭނޭބާވައެވެ؟
ދެނޯ؟
ދެން އޮންނާނީ ވޯޓުލާމީހާގެ ޒިންމާ، އޭގެ އެންމެ ފުރިހަމަގޮތުގައި އަދާކުރުމެވެ. އިސްވެ މަޝްވަރާކުރި ހުރިހާ ނުކުތާތަކާމެދު ފިކުރު ކުރާށެވެ. ވޯޓުގައި ތިމާގެ އަޑުއިއްވާނީ ކޮން ގޮތަކަށްތޯ ނިންމާށެވެ. ވަގުތު މިއޮތީ ކުޑަތަންވެފައެވެ. ތިމާގެ ވޯޓަކީ ވިއްކާ މުދަލަކަށް ނުހަދާށެވެ. އެއީ ތިމާގެ ޑިމޮކްރެޓިކް ޒިންމާކަމުގައި ދެކޭށެވެ. ތިމާ ޖަހާ ފާހަގަ އަކީ ކުރިއަށް އޮތް ފަސް އަހަރުދުވަހުގެ ވެރިިޔާ ޖަވާބުދާރީކުރުވާނޭ ޙައްޤު ތިމާއަށް ހޯދައިދޭ ފަހުމުނާމާ ކަމުގައި ހަދާށެވެ.
