ލަންޑަން (އޮގަސްޓް 6) - ޕެނަލްޓީ ޖަހައިގެން 4-1 އިން މެންޗެސްޓާ ސިޓީ ބަލިކޮށް އާސެނަލުން މިރޭ ޗެރިޓީ ޝީލްޑް އުފުލާލައިފި އެވެ.
މިއީ އާސެނަލުން ޝީލްޑް ކާމިޔާބުކުރި 17 ވަނަ ފަހަރެވެ. އެންމެ ގިނަ ޗެރިޓީ ޝީލްޑް ކާމިޔާބުކުރުމުގެ ރެކޯޑް އޮތީ 21 ފަަހަރު ހޯދި މެންޗެސްޓާ ޔުނައިޓެޑް އަތުގަ އެވެ. ލިވަޕޫލުން ވަނީ 16 ފަހަރު ޝީލްޑް އުފުލާލައިފަ އެވެ.
މިދިޔަ ސީޒަނުގެ އިނގިރޭސި ޕްރިމިއާ ލީގާއި ޗެމްޕިއަންސް ލީގު އަދި އެފްއޭ ކަޕް ހޯދި ސިޓީ އަތުން މިއީ އާސެނަލަށް ރަނގަޅު ބަދަލުހިފުމެކެވެ. އާސެނަލުން މިދިޔަ ފަހަރު ލީގުގައި 248 ދުވަހު އެއް ވަނައިގައި އޮތް ނަމަވެސް ފަހު ވަގުތު ސިޓީން ވަނީ ޗެމްޕިއަންކަން ހޯދައިފަ އެވެ.
ވެމްބްލީ ސްޓޭޑިއަމްގައި މިރޭ ކުޅުނު މެޗުގައި ލީޑުނެގީ ސިޓީންނެވެ. މެޗުގެ 77 ވަނަ މިނިޓްގައި ކެވިން ޑި ބްރޭނާ ދިން ބޯޅައަކުން ސިޓީގެ ގޯލު ޖެހީ ކޯލް ޕާމާ އެވެ. ޕާމާ ޖެހި ބޯޅަ އަމާޒުވީ ގޯލުގެ ކަނަށެވެ. ސިޓީ މޮޅުވާން ދަނިކޮށް އިތުރު ވަގުތުގެ ގޮތުގައި ދެއްކި ވަގުތުގެ ތެރެއިން 11 ވަނަ މިނިޓްގައި އާސެނަލަށް އެއްވަރުކޮށްދިނީ ލެއަންޑްރޯ ޓްރޮސާޑް އެވެ.
ނަތީޖާ ހަމަހަމަވެ، ޕެނަލްޓީ ޖަަހަން ޖެހުމުން، ސިޓީން ޖެހި ތިން ޕެނަލްޓީގެ ތެރެއިން ދެ ޕެނަލްޓީ ވަނީ ނާކާމިޔާބުވެފަ އެވެ. އެއީ ޑިބްރޭނާ އާއި ރޮޑްރީ ޖެހި ޕެނަލްޓީ އެވެ. ކާމިޔާބުވީ ބެނާޑޯ ސިލްވާ ފޮނުވާލި ޕެނަލްޓީ އެވެ. އާސެނަލުން ވަނީ ހަތަރު ޕެނަލްޓީ ވެސް ކާމިޔާބުކޮށްފަ އެވެ. ޓްރޮސާޑްގެ އިތުރުން ދެން ޕެނަލްޓީތައް ކާމިޔާބުކުރީ މާޓިން އޮޑެގާޑް، ބުކާޔޯ ސަކާ އަދި ފަބިއޯ ވިއޭރާ އެވެ.
ސިޓީ އަކީ ޔުނައިޓެޑަށް ފަހު ޖެހިޖެހިގެން ދެ އަހަރު ޝީލްޑް މެޗުން ބަލިވި ފުރަތަމަ ޓީމެވެ. ޔުނައިޓެޑް ވަނީ 1998 އިން 2001 އަށް ޖެހިޖެހިގެން ހަތަރު ފަހަރު ޗެރިޓީ ޝީލްޑް މެޗުން ބަލިވެފަ އެވެ.
