އޯކްލެންޑް، ނިއު ޒީލެންޑް (އޮގަސްޓް 5) - ނިއު ޒީލެންޑާއި އޮސްޓްރޭލިއާގައި މިހާރު ކުރިއަށްދާ ފީފާ ވިމެންސް ވޯލްޑް ކަޕްގެ ކުއާޓާ ފައިނަލްގެ ފުރަތަމަ ޖާގަތައް ސްޕެއިނާއި ޖަޕާނުން ހޯދައިފި އެވެ.
ޖަޕާނާއި ސްޕެއިނުން ކުއާޓާ ފައިނަލަށް ދަތުރުކުރީ މިއަދު ކުޅުނު ގަދަ 16 ބުރުގެ މެޗުތަކުން މޮޅުވެގެންނެވެ. އެ ގޮތުން، ސްވިޒަލެންޑް އަތުން ސްޕެއިން ވަނީ 5-1 އިން މޮޅުވެފަ އެވެ. ކުރީގެ ދެ ޗެމްޕިއަނުންގެ ކުރިމަތިލުމެއްގެ ގޮތުގައި ފެނިގެންދިޔަ މެޗުގައި ޖަޕާނުން ވަނީ ނޯވޭ އަތުން 3-1 އިން މޮޅުވެފަ އެވެ.
ނޮކައުޓް ފުރަތަމަ މެޗުގައި ސްޕެއިން އިން ފަސް ވަނަ މިނިޓްގައި އައިޓާނާ ބޯންމާޓީގެ ގޯލުން ލީޑުނަގައިފައިވަނިކޮށް، 11 ވަނަ މިނިޓްގައި ސްވިޒަލެންޑުން އެއްވަރުކުރި އެވެ. މިއީ ސްޕެއިނުގެ ލައިއާ ކޯޑީނާ އަތުން ބައިކޮޅަށް ވަން ގޯލަކުންނެވެ.
މީގެ ފަސް ދުވަސް ކުރިން ޖަޕާން އަތުން 4-0 އިން ބަލިވި ސްޕެއިން އިން ވަނީ ސްވިޒަލެންޑް އެއްވަރުކުރި ފަހުން އިތުރު ހަތަރު ގޯލު ޖަހައި، ޕްރެޝަރެއް ނެތި މެޗުން މޮޅުވެފަ އެވެ. ސްޕެއިނަށް އަލުން ލީޑުނަގައިދިނީ އަލްބާ ރެޑޯންޑޯ ބޮލުން ޖެހި ގޯލުންނެވެ. ފުރަތަމަ ހާފުގައި ބޯންމާޓީ ސްޕެއިންގެ ތިން ވަނަ ގޯލު ޖެހިއިރު، ހާފުގެ ފަހު މިނިިޓްގައި ކޯޑީނާ ވަނީ ގޯލެއް ޖަހައި ސްޕެއިނަށް އިތުބާރު ބޮޑުކޮށްދީފަ އެވެ.
ދެ ވަނަ ހާފުގައި ސްޕެއިންގެ ފަހު ގޯލު ޖެހީ ޖެނިފާ ހާމޯސޯ އެވެ. މި މޮޅާ އެކު، ސްޕެއިން އިން މި ވަނީ ވިމެންސް ވޯލްޑް ކަޕެއްގެ ކުއާޓާ ފައިނަލުން ފުރަތަމަ ފަހަރަށް ފުރުސަތު ހޯދައިފަ އެވެ.
މި ފަހަރުގެ ވޯލްޑް ކަޕްގައި ތަފާތު މޮޅު ކުޅުމެއް ދައްކަމުން އަންނަ މިޔަޒާވާ ގޯލެއް ޖެހުމަށް ފަހު އުފާފާޅުކުރަނީ.
ޖަޕާނުން މިއަދުގެ މެޗުގައި ލީޑުނެގީ ނޯވޭގެ އިންގްރިޑް އެންގެން އަތުން، މެޗުގެ 15 ވަނަ މިނިޓްގައި ބައިކޮޅަށް ވަން ގޯލުންނެވެ. އޭގެ ފަސް މިނިޓް ފަހުން، ނޯވޭގެ ގޫރޯ ރެއިޓެން ވަނީ ގޯލެއް ޖަހައި ނަތީޖާ ހަމަހަމަކޮށްދީފަ އެވެ. މިއީ މި ފަހަރުގެ ވޯލްޑް ކަޕްގައި ޖަޕާން ކޮޅަށް ވަން ފުރަތަމަ ގޯލެވެ.
ޖަޕާނުން ދެ ވަނަ ފަހަރަށް ލީޑުނެގީ ދެ ވަނަ ހާފްގެ ކުޅުން ފެށިގެން ފަސް ވަނަ މިނިޓްގައި، ރީސާ ޝިމިޒޫ ޖެހި ގޯލުންނެވެ. ޖަޕާނަށް އޮތް ޕްރެޝަރު ކަނޑުވާލައި، އެ ޓީމަށް ކުއާޓާގެ ޖާގަ ޔަގީންކޮށްދިން ގޯލު ޖެހީ މެޗުގެ 81 ވަނަ މިނިޓްގައި ހިނާޓާ މިޔަޒާވާ އެވެ. މިއީ މި ފަހަރުގެ މުބާރާތުގައި މިޔަޒާވާ ޖެހި ފަސް ވަނަ ގޯލެވެ.
މުބާރާތުގެ ތަށި 2011 ވަނަ އަހަރު ހޯދި، ޖަޕާނުން ކުއާޓާ ފައިނަލުގައި ކުޅެން ޖެހޭނީ ގަދަ 16 ބުރުގައި ސްވިޑެން އާއި އެންމެ ފަހުގެ ޗެމްޕިއަން، އެމެރިކާ ކުޅޭ މެޗުން މޮޅުވާ ޓީމަކާ އެވެ. އަނެއްކޮޅުން، ސްޕެއިނުން ކުއާޓާގައި ބައްދަލުކުރަން ޖެހޭނީ ދެ ވަނަ ބުރުގައި ނެދަލެންޑްސް އާއި ދެކުނު އެފްރިކާ ކުޅޭ މެޗުން މޮޅުވާ ޓީމަކާ އެވެ.
