ކުރިއަށް އޮތް ރިޔާސީ އިންތިހާބު ކާމިޔާބުކުރެވިއްޖެ ނަމަ ޗުއްޓީއެއް ނުނަންގަވާނެ ކަމަށް ދަ ޑިމޮކްރޭޓްސްގެ ރިޔާސީ ކެންޑިޑޭޓު އިލްޔާސް ލަބީބު މިއަދު ވިދާޅުވެއްޖެ އެވެ.
ސެޕްޓެމްބަރު މަހު ބާއްވާ ރިޔާސީ އިންތިހާބަށް ތާއީދު ހޯދުމަށް ޑިމޮކްރެޓްސް އިން މިހާރު ތ. އަތޮޅަށް ކުރަމުން ގެންދާ ދަތުރުގެ ތެރެއިން އެ އަތޮޅު ތިމަރަފުއްޓަށް ވަޑައިގެން އިލްޔާސް ވިދާޅުވީ ހުންނަވާނީ 24 ގަޑިއިރު ރައްޔިތުންގެ ހިދުމަތުގައި ކަމަށެވެ.
"އަޅުގަނޑު ރެއަކުވެސް ނުނިދާނަން، އެންމެ ދުވަހަކު ވެސް ޗުއްޓީއެއް ނުނަގާނަން. 24 ގަޑިއިރު ތިބޭފުޅުންގެ ހިދުމަތުގައި އަޅުގަނޑު ހުންނާނީ،" އިލްޔާސް ވިދާޅުވި އެވެ.
އިލްޔާސް މިފަދައިން ވިދާޅުވީ ތިމަރަފުށީ މަގު ހެދުމުގެ މަސައްކަތް ފަސް އަހަރުގެ ވެރިކަމުގެ ދައުރެއް ނިމޭއިރު ނުނިމި އޮތުމުން ކަންބޮޑުވުން ފާޅުކޮށެވެ. އިލްޔާސް ވިދާޅުވީ މަސައްކަތެއް ދިގުލައިގެން ގޮސްފި ނަމަ އެކަމެއް އަވަސްކުރުމަށް އަމިއްލަފުޅަށް އެރަށަކަށް ވަޑައިގަންނަވާނެ ކަމަށެވެ.
"އެ މަގު އަޅުގަނޑު ސަރުކާރެއްގައި ހަވާލުވެއްޖިއްޔާ އަޅުގަނޑު އައިސް މިތާ 24 ގަޑިއިރު ހުރެގެންވެސް މަގު ނިންމަދޭނަން. އަޅުގަނޑު ނިކުމެ މިހިރީ މި ހިއްވަރާއި ޖޯޝާ އެކު،" އިލްޔާސް ވިދާޅުވި އެވެ.
އިލްޔާސް ވަނީ ކުރިއަށް އޮތް އިންތިހާބުގައި ވާދަކުރާ އެހެން ކެނޑިޑޭޓުން އުމުރުން ދޮށީކަން ފާހަގަކުރައްވައި ފާޑު ވިދާޅުވެފަ އެވެ. އިލްޔާސް ވިދާޅުވީ މި ޖީލަށް ބޭނުންވަނީ އޭނާފަދަ ޒުވާން ވެރިއެއް ކަމަށެވެ.
"އަޅުގަނޑު ކުޑައިރު ސިޔާސީ ދާއިރާގައި މަސައްކަތްކުރެއްވި ބޭފުޅުން މިއަދު އަޅުގަނޑު އުމުރުން 44 އަހަރުގައި ނުކުންނަ އިރު ރިޔާސީ އިންތިހާބުގައި ވާދަކުރަން މި ތިބެނީ. ލަދުވެތި ނޫންތޯ،" އިލްޔާސް ވިދާޅުވި އެވެ.
ޑިމޮކްރެޓްސް އަކީ، މިދިޔަ ޖެނުއަރީ 28، ގައި ބޭއްވި އެމްޑީޕީގެ ރިޔާސީ ޕްރައިމަރީން އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނާކާމިޔާބުވި ފަހުން ސަރުކާރާ ދެކޮޅަށް ޕާޓީ ތެރޭގައި މަސައްކަތްތަކެއް ކުރަމުން ދަނިކޮށް ފިޔަވަޅު އަޅަން ފެށުމުން އުފެއްދި ޕާޓީއެކެވެ.
އަންނަ ސެޕްޓެމްބަރު 9، ގައި އޮންނަ ރިޔާސީ އިންތިހާބުގައި ވާދަކުރައްވާނެ ކަމަށް ޕާޓީތަކުން އިއުލާންކުރި ކެންޑިޑޭޓުންނަކީ އިލްޔާސްގެ އިތުރުން އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހާއި އެމްއެންޕީގެ ރިޔާސީ ކެންޑިޑޭޓު މުހައްމަދު ނާޒިމާއި ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމްގެ އިތުރުން، ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީނެވެ. ޔާމީނަށް ވާދަ ނުކުރެވިއްޖެ ނަމަ ޑރ. މުހައްމަދު މުއިއްޒު އެވެ.
