ފަނޑިޔާރު ކަމަށް ކުރިމަތިލާ މީހުންގެ ފެންވަރު ވަޒަން ކުރަން އިމްތިހާނެއް ފުރިހަމަ ކުރަން ޖެހޭ ގޮތަށް ޖުޑިޝަލް ސާވިސް ކޮމިޝަން (ޖޭއެސްސީ)އިން އުސޫލެއް ހަދައިފި އެވެ.
ޖޭއެސްސީން މިއަދު ނެރުނު ބަޔާނެއްގައި ބުނީ، ފަނޑިޔާރު ކަމަށް ކުރިމަތިލުމުގެ އެޕްލިކޭޝަން މަރުހަލާގެ ތެރެއިން އިމްތިހާނެއް ފުރިހަމަ ކުރަން ޖެހޭ ގޮތަށް ފަނޑިޔާރުން އައްޔަން ކުރުުމުގެ ސިޔާސަތަށް ބަދަލު ގެނެސްފައިވާ ކަމަށެވެ. އެ ބަދަލު ގެނައީ، ކޯޓުތަކަށް އައްޔަން ކުރާ ފަނޑިޔާރުންނަކީ ގާބީލު ބައެއްކަން ކަށަވަރު ކުރުމުގެ ގޮތުން ކަމަށް ވެސް ބުންޏެވެ.
އަންނަ އަހަރުގެ ޖެނުއަރީ އެކަކުން ފެށިގެންް އަމަލު ކުރަން ފަށާ މި އުސޫލުގެ ދަށުން، އެ ކޮމިޝަނުން ތައްޔާރު ކުރާ އިމްތިހާނުން، ފަނޑިޔާރު ކަމަށް ކުރިމަތިލާ މީހުންގެ ގާނޫނީ އިލްމު ހުރި ވަރާއި ފެންވަރު ވަޒަން ކުރެވޭނެ ކަމަށް ޖޭއެސްސީން ބުންޏެވެ.
އެގޮތުން، ފަނޑިޔާރު ކަމަށް ކުރިމަތިލާ މީހުންގެ ތެރެއިން އެންމެ ރަނގަޅަށް ގާނޫނުތަކާއި އިޖުރާއަތުތައް ތަތުބީގު ކުރާ މީހުންނާއި ސުލޫކީ ގޮތުން ވެސް އަމަލުތައް ބަހައްޓަން ޖެހޭ ގޮތް އެންމެ ރަނގަޅަށް އެނގޭ މީހުން ވަޒަން ކުރެވޭނެ ކަމަށް ވެސް ކޮމިޝަނުން ބުންޏެވެ.
ޖޭއެސްސީން ބުނި ގޮތުގައި، އެ ބަދަލުގެ ސަބަބުން ކޯޓުތަކަށް ކުރިމަތިލާ މީހުންގެ ތެރެއިން އެންމެ ފެންވަރު ރަނގަޅު، ރައްޔިތުންގެ ހައްގުތައް ދަމަހައްޓާ، އިންސާފުވެރި ފަނޑިޔާރުން އައްޔަން ކުރެވެވި، ޖުޑިޝަރީއަށް އާންމުން ކުރާ އިތުބާރު ވެސް ބޮޑުވާނެ ކަމަށެވެ.
