ޕެރިސް (އޮގަސްޓް 1) - ރެއާލް މެޑްރިޑުން ޕީއެސްޖީގެ ހުއްދަ ނެތި އެ ކްލަބްގެ ފޯވާޑް ކީލިއަން އެމްބާޕޭއާ ޓްރާްންސްފާގެ މަޝްވަރާތަކެއް ކުރަމުން އަންނަ ކަމަށް ބުނެ، ރެއާލްގެ މައްސަލަ ފީފާ އަށް ހުށަހަޅަން ޕީއެސްޖީން ތައްޔާރުވަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
އެމްބާޕޭ، މި ވަގުތު، ޕީއެސްޖީގައި ހުރި ކޮންޓްރެކްޓް ކުރިއަށް އޮތް ސީޒަނަށް ފަހު ހަމަވާނެ އެވެ. ޕީއެސްޖީއާ އެކު އެމްބާޕޭ އާ ކޮންޓްރެކްޓެއްގައި ސޮއިނުކުރާތީވެ، އެ ކްލަބުން މި ފަހަރު އޭނާ ވިއްކާލަން ވަނީ ނިންމައިފަ އެވެ. އެކަމަކު، އެމްބާޕޭ ހުރީ މި ވަގުތު ކްލަބް ބަދަލުކުރާ ވިސްނުމުގައެއް ނޫނެވެ. ބަދަލުގައި އޭނާ ވިސްނަނީ މި ސީޒަން ނިމުމުން ހިލޭ ޓްރާންސްފާއެއްގައި ކްލަބް ބަދަލުކުރާށެވެ.
ފްރާންސްގެ މީޑިއާ ރިޕޯޓްތައް ބުނާގޮތުން އެމްބާޕޭގެ ވިސްނުމަކީ އަންނަ އަހަރު ހިލޭ ޓްރާންސްފާއެއްގައި ރެއާލަށް ދިއުމަށެވެ. އެއީ ސޮއިކުރާއިރު ރަނގަޅު ބޯނަހެއް ލިބޭ ގޮތަށެވެ. އަދި އެ މަޝްވަރާތައް ރެއާލުން އެމްބާޕޭއާ އެކު ބާއްވާފައިވާ ކަމަށް ވެސް ސްޕެއިނާއި ފްރާންސްގެ މީޑިއާތަކުން ވަނީ ރިޕޯޓްކޮށްފަ އެވެ.
މި ހުރިހާ ކަމަކަށް ބަލައި، ޕީއެސްޖީން މިހާރު މަސައްކަތް ފަށަން ނިންމާފައިވަނީ ރެއާލްގެ މައްސަލަ ފީފާ ޓްރިބިއުނަލް އަށް ހުށަހެޅުމަށެވެ. ޕީއެސްޖީގެ ޝަކުވާ އަކީ އެ ކްލަބްގެ ކޮންޓްރެކްޓްގައި ހުރި ކުޅުންތެރިއަކާ ވާހަކަ ދައްކައި ނުރަނގަޅު ނުފޫޒެއް ފޯރުވަން އުޅުމެވެ.
އެމްބާޕޭ އަށް، ސައުދީ އަރަބިއްޔާގެ އަލް-ހިލާލް އިން 400 މިލިއަން ޑޮލަރު ލިބޭ އެއް އަހަރުގެ ޑީލެއް ހުށަހެޅި ނަމަވެސް އޭނާ ވަނީ އެ ޑީލަށް ފުރަގަސްދީފަ އެވެ. އެއީ، ވެސް ޕީއެސްޖީން ހިތްހަމަނުޖެހުނު ސަބަަބެކެވެ. ޕީއެސްޖީން ބޭނުންވަނީ މި ޓްރާންސްފާގައި އެމްބާޕޭ 200 މިިލިއަން ޑޮލަރަށް ވިއްކާލުމަށެވެ. އެއީ ކޮންޓްރެކްޓް ހަމަވުމަށް ފަހު، އެމްބާޕޭ ކްލަބް ބަދަލުކުރާނަމަ ޕީއެސްޖީ އަތުން މޮޅު ކުޅުންތެރިއެއް ގެއްލޭނީ އެއްވެސް ފީއެއް ނެތި ކަމަށްވާތީ، އޭގެ ބިރުން ސަލާމަތްވުމަށެވެ.
