ލަންޑަން (ޖުލައި 30) - ސައުދީ އަރަބިއްޔާގެ ޕްރޮފެޝަނަލް ލީގު (ޕްރޯ ލީގު)ގެ ކްލަބްތަކުން ދުނިޔޭގެ ފުޓްބޯޅައިގެ ޓްރާންސްފާ މާކެޓް ބަދަލުކޮށްލައިފި ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
ޔޫރަޕްގެ ނަން މަޝްހޫރު ގިނަ ކުޅުންތެރިންތަކެއް ސައުދީ އަރަބިއްޔާގެ ކްލަބްތަކަށް ބަދަލުވެފައިވާއިރު، އޭގެ ތެރޭގައި މެންޗެސްޓާ ސިޓީ އަށް ކުޅެމުން އައި އަލްޖީރިއާގެ ތަރި ރިޔާދު މާރޭޒް ވެސް ހިމެނެ އެވެ.
މިދިޔަ ސީޒަނުގައި ތިން މުބާރާތު (އެފްއޭ ކަޕް، އިނގިރޭސި ޕްރިމިއާ ލީގު އަދި ޗެމްޕިއަންސް ލީގު)ގެ ތަށި ހޯދި ސިޓީގެ ކޯޗު ގާޑިއޯލާ ބުނީ މި އަހަރު ކުރީކޮޅުގައި އެންމެ ފުރަތަމަ ސައުދީ ލީގަށް ކްރިސްޓިއާނޯ ރޮނާލްޑޯ ދިއުމަށް ފަހު، މިހާރު މުޅި މާކެޓް އޮތީ ބަދަލުވެފައި ކަމަށެވެ.
"ޔަގީންކަމެއް އެއީ، ސައުދީ އަރަބިއްޔާ އިން ޓްރާންސްފާ މާކެޓް ބަދަލުކޮށްލައިފި، ފުރަތަމަ ދިޔައީ ކްރިސްޓިއާނޯ ރޮނާލްޑޯ، މިހާރު މަޝްހޫރު އެތަށް ކުޅުންތެރިއަކު އެ ދިޔައީ އެ ލީގަށް، އަހަންނަށް އަދިވެސް އެބަ ފެނޭ ގިނަ ކުޅުންތެރިންތަކެއް އެ ލީގަށް ބަދަލުވާނެތަން،" ގާޑިއޯލާ ބުންޏެވެ.
ގާޑިއޯލާ ބުނީ މިއީ ކަންބޮޑުވުމެއް އޮވެގެން ނޫނީ ޖެހިލުންވެގެން ދައްކާ ވާހަކައެއް ނޫން ކަމަށާއި މި ވަގުތު ފެންނަން އޮތް ހަގީގަތެއްގެ މައްޗަށް ބަލަައި، ބުނާ އެއްޗެއް ކަމަށެވެ.
ސައުދީން ވަރުގަދަ ލީގެއް ކުޅެން ކުރާ މަަސައްކަތުގައި މިހާރު ވެސް ކާމިޔާބު ހޯދައިފި ކަމަށް ގާޑިއޯލާ ގަބޫލުކުރެ އެވެ. އޭނާ ބުނީ ދެން މީގެ އޮތް ގޮތަކީ ރަނގަޅު އުސޫލުތަކެއްގެ ތެރެއިން ދެމެހެއްޓެނިވި ގޮތެއްގައި އެ ލީގު ވަރުގަދަކޮށް ބޭއްވުން ކަމަށެވެ.
ފުޓްބޯޅައިގައި މި ވަގުތު އެންމެ ނުފޫޒު ބޮޑީ ފައިސާގެ ބާރު އޮންނަ ޓީމުތަކާއި ގައުމުތަކުގެ ލީގުތައް ކަމަށް ބުނެ، ކުރި ސުވާލަށް ގާޑިއޯލާ ބުނީ އިންވެސްޓްމަންޓެއް ނުކޮށް އެއްވެސް ކަމެއްގައި ކުރިއަށްނުދެވޭނެ ކަމަށާއި ދުނިޔޭގެ ހުރިހާ ދިމާލެއްގައި ވެސް އޮތީ އެ ހަގީގަތް ކަމަށެވެ.
