އެޑަލެއިޑް (ޖުލައި 30) - ފީފާ ވިމެންސް ވޯލްޑް ކަޕްގައި އިއްޔެ މޮރޮކޯ އާއި ދެކުނު ކޮރެއާ ބައްދަލުކުރި މެޗުގައި ބުރުގާ އަޅައިގެން ކުޅެ، މޮރޮކޯގެ ނުހައިލާ ބެންޒީނާ ވިމެންސްގެ ވޯލްޑް ކަޕްގެ ތާރީހުން ޖާގަ ހޯދައިފި އެވެ.
ބެންޒީނާ އަކީ ބުރުގާ އަޅައިގެން ވޯލްޑް ކަޕްގެ މެޗެއްގައި ކުޅުނު ފުރަތަމަ ކުޅުންތެރިޔާ އެެވެ.
ފީފާ އިން ކުރިން ބުރުގާ އަޅައިގެން ކުޅުން މަނާކުރިޔަސް، އެ ގަވައިދު ބަދަލުކޮށް، ބުރުގާ އަޅައިގެން ކުޅުމުގެ ހުއްދަ ދިނީ 2014 ވަނަ އަހަރެވެ.
ވޯލްޑް ކަޕްގެ މެޗެއްގައި ބުރުގާ އަޅައިގެން ކުޅުނު ފުރަތަމަ ކުޅުންތެރިޔާގެ ޝަރަފު ހޯދި ބެންޒީނާ ،25، އަކީ މޮރޮކޯގައި ކްލަބު ފުޓްބޯޅަ ކުޅޭ ކުޅުންތެރިއެކެވެ.
އަލް ޖަޒީރާއާ ވާހަކަދައްކަމުން ބެންޒީނާ ބުނީ މިއީ އޭނާ އަށް ވަރަށް "ފަހުރުވެރި ވަގުތުކޮޅެއް" ކަމަށެވެ.
"ފާއިތުވި އަހަރުތަކުގައި ވަރަށް ބުރަ މަސައްކަތްތަކެއްކުރެވިއްޖެ. އަހަރަމެންގެ އުންމީދަކީ ރަނގަޅު ފެންވަރެއްގައި ކުޅެ، މޮރޮކޯގެ ރައްޔިތުން ހިތްހަމަޖެހޭ ނަތީޖާތަކެއް ނެރުން،" ބެންޒީނާ ބުންޏެވެ.
ގިނަ ކުޅިވަރުތަކަކުން ވަނީ މި ފަހަކަށް އައިސް ބުރުގާ އަޅައިގެން ކުޅުމުގެ ހުއްދަ ދީފައެވެ. އެހެން ނަމަވެސް އަދިވެސް ފްރާންސްގައި ރަސްމީ މެޗުތަކުގައި ބުރުގާ އަޅައިގެން ކުޅުމަކީ މަނާ ކަމެކެވެ.
