އެމްޑަބްލިއުއެސްސީ ދިވެހި ޕްރިމިއާ ލީގުގައި މިރޭ ކްލަބް ގްރީން ސްޓްރީޓްސް އަތުން އީގަލްސް އިން 6-1 އިން ބޮޑު މޮޅެއް ހޯދައިފި އެވެ..
މި މޮޅާ އެކު އީގަލްސް އިން ވަނީ ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާ ދެ ޕޮއިންޓަށް ގާތަށް ޖެހިލައިފަ އެވެ. ވެލެންސިއާ ޓީމު ހަމަނުވުމުން މިއަދު ހަވީރު މާޒިޔާ އަށް ވަނީ މެޗު ލިބިފަ އެވެ. މާޒިޔާ އެއް ވަނައިގައި އޮތީ، ހަ މެޗުން 18 ޕޮއިންޓާ އެކު އެވެ. ގްރީން ސްޓްރީތްސް އަތުން އީގަލްސް ހޯދި މޮޅާ އެކު އެ ޓީމަށް ވަނީ ހަ މެޗުން 16 ޕޮއިންޓް ލިބިފަ އެވެ.
ގަލޮޅު ދަނޑުގައި މިރޭ ކުޅުނު މެޗުގެ ފުރަތަމަ ހާފުގައި އީގަލްސް އިން ވަނީ ހަތަރު ގޯލުގެ ލީޑެއް ނަގައިފަ އެވެ. އެ ގޮތުން މެޗުގެ 12 ވަަނަ މިނިޓްގައި އީގަލްސް އިން ލީޑުނެގީ ބްރެޒިލްގެ ފޯވާޑް އިވާން ކާލޯސް ޖެހި ގޯލުންނެވެ. އޭގެ ތިން މިނިޓް ފަހުން، އިސްމާއިލް އީސާ (މެސީ) އީގަލްސްގެ ލީޑުފުޅާކޮށްދިނެވެ.
އީގަލްސް އިން ތިން ވަނަ ގޯލު ޖެހީ މެޗުގެ 37 ވަނަ މިނިޓްގަ އެެވެ، މި ލަނޑު ޖެހީ އިބްރާހިމް މަހުދީ ހުސެއިން (ފޭދޫ އިއްބެ) އެވެ. އަދި ފުރަތަމަ ހާފު ނިމުމުގެ ކުރިން 43 ވަނަ މިނިޓްގައި، އީގަލްސްގެ ކެޕްޓަން، އަހުމަދު ރިޒްވާން (ރިޒޭ) އެ ޓީމުގެ ހަތަރު ވަނަ ގޯލު ޖެހި އެވެ.
ދެ ވަނަ ހާފުގައި އީގަލްސް އިން އަނެއް ދެ ގޯލު ޖެހީ ތިން މިނިޓްގެ ތެރޭގަ އެވެ. އެ ގޮތުން، 66 ވަނަ މިނިޓްގައި އިވާން ކާލޯސް ވަނީ އީގަލްސްގެ ފަސް ވަނަ ގޯލު ޖަހައިފަ އެވެ. އޭގެ ތިން މިނިޓް ފަހުން، އީގަލްސްގެ ފަހު ލަނޑު ޖެހީ ފޭދޫ އިއްބެ އެވެ.
ގްރީން ސްޓްރީޓްސް އިން މެޗުގައި ޖެހި ހަމައެކަނި ލަނޑު އިތުރު ވަގުތުގައި ކާމިޔާބުކޮށްދިނީ އިބްރާހިމް ހާމިދު އެވެ. މި މެޗުގެ ނަތީޖާއާ އެކު ގްރީން ސްޓްރީޓްސް ލީގުގެ ހަތް ވަނައިގައި އޮތީ ތިން ޕޮއިންޓާ އެކު އެވެ.
ލީގުގައި މާދަމާ ހަވީރު ހަތަރެއް ޖަހާއިރު ފަށާ މެޗުގައި ޓީސީ ސްޕޯޓްސް ކްލަބް ކުޅޭނީ ސުޕަ ޔުނައިޓެޑް ސްޕޯޓްސް (ސަސް)އާ އެވެ. އަދި މާދަމާރޭ ކުޅޭ މެޗުގައި ޔުނައިޓެޑް ވިކްޓަރީ (ޔޫވީ) ބައްދަލުކުރާނީ ބުރު ސްޕޯޓްސް ކްލަބާ އެވެ.
