ރައީސް އިބްރާހިމް މުހައްމަދު ސޯލިހުގެ ކެބިނެޓް ފުރަތަމަ އެކުލަވާލިއިރު, އައްޑޫގެ އެއްވެސް ބޭފުޅަކު ހިމަނުއްވާފައި ނުވާތީ ރައްޔިތުންގެ ރައީސް މުހައްމަދު ނަޝީދު އެމަނިކުފާނަށް މިރޭ ފާޑުވިދާޅުވެއްޖެ އެވެ.
އައްޑޫ ސިޓީއަށް ކުރައްވަމުން ގެންދަވާ ދަތުރުފުޅުގައި ޑިމޮކްރެޓްސްގެ ފޭދޫ ހަރުގެ ޖަލްސާގައި ވާހަކަދައްކަވަމުން ނަޝީދު ވަނީ ރައީސް ސޯލިހުގެ ސަރުކާރުން އައްޑުއަށް އިހުމާލުވެފައިވާ ކަމަށެވެ.
ނަޝީދު އައްޑޫ ސިޓީ ތަރައްގީ ނުކޮށް, ރާއްޖެ ތަރައްގީ ނުކުރެވޭނެ ކަމަށް މި ސަރުކާރުން ތަކުރާރުކޮށް ބުނަމުން ދިޔަ ނަމަވެސް, މި ސަރުކާރުން ވަނީ އައްޑޫފަދަ އާބާދީ ބޮޑު ތަނަކަށް އިހުމާލުވެފަ ކަމަށެވެ. ކެބިނެޓް ފުރަތަމަ އެކުލަވައިލެއްވި އިރު އައްޑޫ ބޭފުޅަކު ނުހިމެނުއްވުމަކީ އެފަދަ އިހުމާލެއްގެ ގޮތުގައި އެމަނިކުފާނު ސިފަކުރެއްވި އެވެ.
ރައީސް ސޯލިހުގެ ކެބިނެޓް ފުރަތަމަ އެކުލަވާލިއިރު, އައްޑޫ ބޭފުޅަކު ހިމަނުއްވާފައެއް ނުވެ އެވެ. ނަމަވެސް ދައުރުގެ މެދުތެރެއިން, ކެބިނެޓުގެ ބައެއް ވަޒީރުން ބަދަލު ކުރެއްވިއިރު, އައްޑޫއަށް ނިސްބަތްވާ އައިޝަތު ޝައުނާ, އެންވާރަމަންޓް މިނިސްޓަރު ކަމުގައި ކެބިނެޓުގައި ހިމެނުއްވި އެވެ.
"އަޅުގަނޑު މި ދަންނަވަނީ ކުޑަ ރަށްރަށަށް ބޭނުންވާ ކަންކަން ނުކުރާ ވާހަކައެއްް ނޫން. އެކަމަކު އަހަންމިއްޔަތުކަމެއް, ހާއްސަކަމެއް ދޭން އެބަޖެހޭ ބޮޑެތި އާބާދީތަކަށް" އިންސާފުވެރިކަމާއެކު ގިނަ ރައްޔިތުންނަށް ހިދުމަތް ކޮށްދެވޭނީ އެހެންކަން ފާހަގަކުރައްވާ ނަޝީދު ވިދާޅުވި އެވެ.
ނަޝީދު ވިދާޅުވީ އެމަނިކުފާނު ގަބޫލުކުރައްވާ ގޮތުގައި ގިނަ ދިވެހި ރައްޔިތުންނަށް ފައިދާއެއް ވާނީ އައްޑޫ ސިޓީ އަދި ކުޅުދުއްފުށި ސިޓީއަށް ދައުލަތުގެ އާމްދަނީން ބޮޑުބައެއް ހަރަދުކޮށްގެން ކަމަށެވެ.
ކުޑަ ރަށެއް, ބޮޑު ރަށެއް ބާކީނުކޮށް, ތަރައްގީ ކުރުމަކީ މި ސަރުކާރުގެ ސިޔާސަތެކެވެ. އެ މަގުން, ސަރުކާރުން ދަނީ ރާއްޖޭގެ ކުދި ރަށްތަކުގައި ގިނަ މަޝްރޫއުތަކެއް ހިންގަމުންނެވެ. ނަމަވެސް ރައީސް ސޯލިހާ ދެކޮޅަށް އެމްޑީޕީގެ ޕްރައިމަރީގައި ނިކުންނެވި ފަހުން ނަޝީދު ގެންދަވަނީ އެމަނިކުފާނުގެ ސިޔާސަތުތަކަށް ފާޑުވިދާޅުވަމުންނެވެ.
މީގެ ކުރިން ވެސް ނަޝީދު ވަނީ, ބޮޑެތި އާބާދީތަކަށް އިސްކަން ދީގެން ރާއްޖެ ތަރައްގީކުރަން ޖެހޭ ކަމަށް ވިދާޅުވެފަ އެވެ.
މި ސަރުކާރަށް ނަޝީދުގެ ފާޑުކިއުން އަމާޒުކުރެއްވިއިރު, ރައީސް ސޯލިހު ވެސް ވަނީ އައްޑުއަށް ކުރެއްވި ދަތުރުފުޅެއްފައި ނަޝީދުގެ ސަރުކާރުން އައްޑުއަށް ކޮށްދެއްވި ކަންކަމަށް ފާޑު ވިދާޅުވެފަ އެވެ.
މިއަހަރު ޖެނުއަރީގައި އައްޑުއަށް ވަޑައިގެން ރައީސް ވިދާޅުވީ ނަޝީދުގެ ވެރިކަމުގައި އައްޑޫ ސިޓީ ތަރައްގީކުރުމުގެ މަސައްކަތް ކުރިއަށް ގެންގޮސްފައިވަނީ އެއްވެސް ރޭވުންތެރިކަމެއްނެތި ކަމަށެވެ. އަދި އޭރު އައްޑޫގައި ބޭއްވި ސާކް ސަމިޓަށް އައްޑޫއަށް ގެނައީ 'އުފުރާލެވޭ' ތަރައްގީ ކަމަށް ވެސް ވިދާޅުވި އެވެ.
"ކުރީ ސަރުކާރުން އެބަހުރި ޕްރޮޖެކްޓުތައް ހިންގަން އުޅެފައި، މި ސިޓީގެ ފެނާއި ނަރުދަމާ ގާއިމް ކުރުމުގެ ނަމުގައި ކަންތައްތަކެއް ހިނގި، އެހެންނަމަވެސް ކިހިނެއްތޯވީ، ކިތައް އަހަރު އެކަމުގައި ހޭދަކުރަން ޖެހުނުތޯ،" ނަޝީދު ވެރިކަމުގައި ފެށި އެ މަޝްރޫއަށް ފާޑުވިދާޅުވަމުން ރައީސް ވިދާޅުވި އެވެ.
އައްޑޫގައި ދަތުރުފަތުރުގެ ނިޒާމު ފަށަން ނަޝީދުގެ ވެރިކަމުގައި ކުރި މަސައްކަތަށް ވެސް ރައީސް ވަނީ ވަރަށް ބޮޑަށް ފާޑުވިދާޅުވެފަ އެވެ. ރައީސް ވިދާޅުވީ އެކަން ވެސް ވީ ސަރުކާރަށް ބޮޑު ބުރައެއް އުފުލަން ޖެހުނު "ސަކަރާތްގަނޑަކަށް" ކަމަށެވެ.
