ދަ ޑިމޮކްރެޓްސްގެ ރިޔާސީ ކެންޑިޑޭޓު ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބު އަދި އެ މަޖިލީހުގެ ރައީސް މުހައްމަދު ނަޝީދު، އެ ޕާޓީގެ ރިޔާސީ ކެމްޕޭނުގައި މިއަދު އައްޑޫއަށް ވަޑައިގަންނަވާނެ އެވެ.
"އަދަދު" އަށް ކަށަވަރުވެފައިވާ ގޮތުގައި އިލްޔާސް އަދި ނަޝީދު އައްޑޫއަށް ވަޑައިގަންނަވާނީ މިއަދު ހަވީރު 6:00 ގަ އެވެ. އެ ޕާޓީން މިހާރު ދަނީ ރިޔާސީ ކެންޑިޑޭޓުގެ ފުރަތަމަ ދަތުރަށް ތައްޔާރުވެ އައްޑޫއިން ހޫނު މަރުހަބާއެއް ކިޔުމަށް ތައްޔާރުވަމުންނެވެ.
އިލްޔާސް ޑިމޮކްރެޓްސްގެ ރިޔާސީ ޓިކެޓު ކާމިޔާބުކުރެއްވީ އިއްޔެ ކުރިއަށް ގެންދިޔަ ޕްރައިމަރީގައި ވޯޓުލީ ޖުމްލަ 3،203 މީހުންގެ ތެރެއިން 3،041 މީހުން ވޯޓު ހޯއްދަވައިގެންނެވެ. އެ ޕްރައިމަރީއަށް ކުރިމަތިލެއްވީ އިލްޔާސް އެކަންޏެވެ.
ނުފެންނަ ކަމަށް ވޯޓު ދީފައިވަނީ 153 ވޯޓެވެ. އަދި ބާތިލް ނުވަ ވޯޓު ވެސް ލާފައިވެ އެވެ. އެހެންކަމުން އިލްޔާސްއަށް ރިޔާސީ ޓިކެޓު ލިބިވަޑައިގަތީ ވޯޓު ދިން މީހުންގެ ތެރެއިން 94 ޕަސެންޓު މީހުންގެ ތާއީދާއެކު އެވެ.
ރިޔާސީ އިންތިހާބަށް ކުރިމަތިލުމުގެ ފުރުސަތު ސެޕްޓެމްބަރު މަހުގެ ހަތްވަނަ ދުވަހަށް ހަމަވާއިރު، ޑިމޮކްރެޓްސްގެ ރަނިންމޭޓު އަދި އިއުލާނެއް ނުކުރެ އެވެ. އަދި ފޯމު ލާނެ ތާރީހެއްވެސް އިއުލާނެއް ނުކުރެ އެވެ.
ޑިމޮކްރެޓްސް އަކީ، މިދިޔަ ޖެނުއަރީ 28، ގައި ބޭއްވި އެމްޑީޕީގެ ރިޔާސީ ޕްރައިމަރީން އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ނާކާމިޔާބުވި ފަހުން ސަރުކާރާ ދެކޮޅަށް ޕާޓީ ތެރޭގައި މަސައްކަތްތަކެއް ކުރަމުން ދަނިކޮށް ފިޔަވަޅު އަޅަން ފެށުމުން އުފެއްދި ޕާޓީއެކެވެ.
އެ ޕާޓީ އުފައްދަން ފެށި މަސައްކަތާއެކު ރިޔާސީ އިންތިހާބުގައި ވާދަކުރާނެކަން އިއުލާންކުރި އެވެ. ގިނަބަޔަކު ހީކުރީ އެ ޕާޓީގެ ރިޔާސީ ޓިކެޓު ހޯއްދަވާނީ ނަޝީދު ކަމަށެވެ. ނަމަވެސް ނަޝީދު ވަނީ ޒުވާން ލީޑަރަކު ގެންނަން ޖެހޭ ކަމަށް ވިދާޅުވެ ފަހަތަށް ޖެހިވަޑައިގެންފަ އެވެ.
އަންނަ ސެޕްޓެމްބަރު 9، ގައި އޮންނަ ރިޔާސީ އިންތިހާބުގައި ވާދަކުރައްވާނެ ކަމަށް ޕާޓީތަކުން އިއުލާންކުރި ކެންޑިޑޭޓުންނަކީ އިލްޔާސްގެ އިތުރުން އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހާއި އެމްއެންޕީގެ ރިޔާސީ ކެންޑިޑޭޓު މުހައްމަދު ނާޒިމާއި ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމްގެ އިތުރުން، ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީނެވެ.
އޭގެ ތެރެއިން ޔާމީން ހުންނެވީ 11 އަހަރުގެ ޖަލު ހުކުމެއްގަ އެވެ. އެމަނިކުފާނަށް ކްރިމިނަލް ކޯޓުން އިއްވާފައިވާ ހުކުމް ދެމިއޮތްހާ ހިނދަކު ކެންޑިޑެސީ ބަލައިނުގަންނާނެ ކަމަށް އިލެކްޝަންސް ކޮމިޝަނުން ބުނެފައިވާއިރު އެ ހުކުމުގެ އިސްތިއުނާފު ހައި ކޯޓުގައި އޮތީ މަޑުޖެހިފަ އެވެ.
