ވެލިންޓަން، ނިއު ޒީލެންޑް (ޖުލައި 27) - ފީފާ ވިމެންސް ވޯލްޑް ކަޕްގެ އެންމެ ފަހުގެ ފައިނަލުގައި ކުޅުނު ދެ ޓީމު ކަމަށްވާ ނެދަލެންޑްސް އާއި އެމެރިކާ، މި ފަހަރުގެ މުބާރާތުގެ ގްރޫޕް ސްޓޭޖުގައި ބައްދަލުކުރި މެޗު 1-1 އިން އެއްވަރުވެއްޖެ އެވެ.
އެންމެ ފަހުން، 2019 ގައި ބޭއްވި ވިމެންސް ވޯލްޑް ކަޕްގެ ޗެމްޕިއަންކަން އެމެރިކާ އިން ހޯދީ ފައިނަލުގައި 2-0 އިން ނެދަލެންޑްސް ބަލިކޮށްފަ އެވެ، މި ފަހަރުގެ މުބާރާތުގެ ގްރޫޕް ސްޓޭޖުގައި މި ދެ ޓީމު ކުޅުނު މެޗުން ނެދަލެންޑްސް ލީޑުނަގާފައިވަނިކޮށް އެމެރިކާ އިން ވަނީ އެއްވަރުކޮށްފަ އެވެ.
އެ ގޮތުން، ނެދަލެންޑްސް އިން މި މެޗުގައި ލީޑުނެގީ ދާދި ފަހުން މެންޗެސްޓާ ސިޓީ އަންހެން ޓީމަށް ސޮއިކުރި ޖިލް ރޫޑް އެވެ. އެމެރިކާ އިން އެއްވަރުކުރީ މެޗުގެ ދެ ވަނަ ހާފުގަ އެވެ. މި ލަނޑު ޖެހީ ޓީމުގެ ކެޕްޓަން، ލިންޑްސޭ ހޮރާން ބޮލުންނެވެ.
އިތުރު ގޯލެއް ޖަހަން ދެ ޓީމަށް ވެސް ފުރުސަތު އޮތް ނަމަވެސް އެކަން ހާސިލްކުރަން ކުރި އެއްވެސް މަސައްކަތެއް ދިޔައީ ކާމިޔާބުނުވެ އެވެ. އެހެންނަމަވެސް، 2011 ވަނަ އަހަރުގެ ވޯލްޑް ކަޕް ފައިނަލުގައި ޕެނަލްޓީ ޖަހައިގެން ޖަޕާން އަތުން ބަލިވި ފަހުން، މެޗަކުން ބަލިނުވެ، މުބާރާތުގައި އެމެރިކާ އިން ކުރިއަށް ގެންދަމުން އަންނަ ރެކޯޑް ވަނީ ދަމަހައްޓައިފަ އެވެ.
ގްރޫޕް އީގެ އެއް ވަނައިގައި އޮތް އެމެރިކާ އާއި ދެ ވަނައިގައި އޮތް ނެދަލެންޑްސް އަށް ވަނީ ދެ މެޗުން ހަތަރު ޕޮއިންޓް ލިބިފަ އެވެ. އަދި މި ގްރޫޕްގައި ދެން އޮތް ދެ ޓީމު ކަމަށްވާ ޕޯޗުގަލް އާއި ވިއެޓްނާމް ވަނީ ފުރަތަމަ މެޗުތަކުން ބަލިވެފަ އެވެ. ޕޯޗުގަލް އާއި ވިއެޓްނާމް ބައްދަލުކުރާ މެޗު މިއަދު އޮންނާނެ އެވެ.
އިއްޔެ މުބާރާތުގައި ސްޕެއިނާ ޖަޕާން ކުޅުނު މެޗުތަކުން މޮޅުވެ، މި ވަނީ ގަދަ 16 ބުރަށް ދަތުުރުކޮށްފަ އެވެ. އެ ގޮތުން، ސްޕެއިން ވަނީ 5-0 އިން ޒެމްބިއާ ބަލިކޮށްފަ އެވެ. އަދި ޖަޕާނުން ވަނީ ކޮސްޓަ ރިކާ 2-0 އިން ބަލިކޮށްފަ އެވެ.
ޖަޕާނާއި ސްޕެއިން ދެން ކުޅޭ މެޗުގައި ނުކުންނާނީ ގްރޫޕްގެ އެއް ވަނަ ކަނޑައެޅުމަށެވެ. އެ ދެ ޓީމު ވަނީ ފުރަތަމަ ދެ މެޗުން ވެސް މޮޅުވެފަ އެވެ.
