ޔޫކްރެއިންގެ ޕާލަމެންޓް މެމްބަރަކު އާއިލާއާ އެކު ޗުއްޓީ ހޭދަކުރުމަށް ރާއްޖެއަށް ދަތުރު ކުރީ ގާނޫނާ ހިލާފަށްތޯ ބެލުމަށް އެ ގައުމުގެ އިދާރާތަކުން ތަހުގީގެއް ފަށައިފި އެވެ.
ޔޫކްރެއިނުން ރަޝިއާއާ ދެކޮޅަށް ހަނގުރާމަ ކުރަމުންދާތީ ޗުއްޓީގައި ގައުމުން ބޭރަށް ދަތުރުކުރުން އޮފިޝަލުންނަށް އޮތީ މަނާކޮށްފަ އެވެ. އަދި ސިފައިންގޭގައި ހިދުމަތް ކުރާ އުމުރުގެ ފިރިހެނުން ގައުމުން ބޭރަށް ދިޔުމަށް ހާއްސަ ހުއްދައެއް ހޯދަން ޖެހެ އެވެ.
އިދާރާތަކުން ޖިނާއީ ތަހުގީގެއް ފަށައި ބަލަމުން ދަނީ މެމްބަރު ޔޫރީ އަރިސްތޯވް ދޮގު މައުލޫމާތު ދިން ކަމަށް ތުހުމަތު ކުރެވޭތީ އެވެ. އެކަން ސާބިތުވެއްޖެ ނަމަ ތިން އަހަރުގެ ޖަލު ހުކުމެއް އައުން އެކަށީގެންވެ އެވެ.
އެ މައްސަލަ ތަހުގީގު ކުރަނީ ސްޓޭޓް ބިޔުރޯ އޮފް އިންވެސްޓިގޭޝަން (އެސްބީއައި) އަދި ޔޫކްރެއިންގެ ސެކިއުރިޓީ ސާވިސްގެ ފަރާތުންނެވެ.
އެސްބީއައިއިން ބުނީ މިހާތަނަށް ބެލި ބެލުމުން އެނގޭ ގޮތުގައި ޖުލައި މަހުގެ މެދުތެރޭގައި އަރިސްތޯވް ޗުއްޓީ ހޭދަކުރީ ރާއްޖޭގެ އިތާފުށި ރިސޯޓުގަ އެވެ.
އަންހެނުންނާއި ދަރިން ގޮވައިގެން ރާއްޖޭގައި ޗުއްޓީ ހޭދަކުރީ ބަލިވެގެން ކަމަށް ބުނެ ސަލާމުގެ ޗުއްޓީ ނަގައިގެން ހުރި ދަނޑިވަޅެއްގައި ކަމަށް ތުހުމަތުކުރެވެ އެވެ.
ޖޫން 5 އިން ޖުލައި 22 އަށް ގައުމުން ބޭރުގައި އަރިސްތޯވް އުޅުނު އިރު، އެންމެ ފުރަތަމަ ޔޫކްރެއިނުން ޕޮލޭންޑަށް ފުރީ ތިން ދުވަހުގެ ވިޔަފާރި ދަތުރެއްގަ އެވެ. ރާއްޖޭގައި އުޅޭކަން ފަޅާއަރުވާލީ ޔޫކްރެއިންގެ ނޫސްތަކުންނެވެ.
އެ މައްސަލަ ފެންމަތިވުމުން އަރިސްތޯވް ވަނީ އިސްތިއުފާ ހުށަހަޅައިފަ އެވެ. އެކަމާ މެދު ގޮތެއް ނިންމާނީ ޕާލަމެންޓުގެ ދެން އޮންނަ ސެޝަނުގަ އެވެ.
