އައްޑޫ ސިތީ ހިތަދޫގައި އިމާރާތް ކުރާ އިސްލާމީ މަރުކަޒުގެ އަމަލީ މަސައްކަތް މިއަދު ފަށައިފި އެވެ.
އެކަމަށް ހާއްސަކޮށް މިއަދު ބޭއްވި ހާއްސަ ރަސްމިއްޔާތެއްގައި އިސްލާމީ މަރުކަޒުގެ ބިންގާ އަޅުއްވައި ދެއްވީ ނައިބު ރައީސް ފައިސަލް ނަސީމުއާއި އިސްލާމިކް މިނިސްޓަރު، ޑރ. އަހުމަދު ޒާހިރު އަލީގެ އިތުުރުން އައްޑޫގެ މޭޔަރު އަލީ ނިޒާރު އެވެ.
ހިތަދޫގައި ކުރީގެ ޕޮލިސް ޓްރެއިނިން ސްކޫލު ހިންގި ބިމުގައި އިސްލާމީ މަރުކަޒު އިމާރާތް ކުރުމަށް ފީޑޯ ޕްރައިވެޓް ލިމިޓެޑާ ހަވާލު ކުރީ މިދިޔަ މާޗު، 24 ގަ އެވެ. 55.52 މިލިއަން ރުފިޔާގެ އެ މަރުކަޒުގައި 1500 މީހުންގެ ޖާގައިގެ ނަމާދުކުރާ ބަޔަކާއި 450 މީހުންގެ ޖާގައިގެ މަލްޓި ޕާޕަސް ހޯލަކާއި ހަތަރު ކްލާސްރޫމާއި ދެ ސެމިނާ ރޫމްގެ އިތުރުން އިދާރީ އޮފީހާއި އިސްލާމިކް ލައިބްރަރީ އަދި ޕޭންޓްރީއެއް ހިމެނޭނެ އެވެ.
އިސްލާމީ މަރުކަޒުގެ ބިންގާ އަޅުއްވައިދެއްވުމަށް ނައިބު ރައީސް ފައިސަލް ނަސީމް ވަޑައިގަންނަވނީ -- ފޮޓޯ: ރައީސް އޮފީސް
އައްޑޫގައި އިސްލާމީ މަރުކަޒެއް އަޅައިދިނުމުގެ ވައުދަކީ މީގެ ކުރިން ރައީސް ނަޝީދުގެ ވެރިކަމުގައި ވެސް ވީ ވައުދެކެވެ. އަދި އޭގެފަހުން ރައީސް ޔާމީނުގެ ވެރިކަމުގައި ވެސް އެ މަރުކަޒުގެ ވާހަކަ ދެކެވުނެވެ.
އެއަށްފަހު މިހާރުގެ ރައީސް، ވެރިކަމަށް ވަޑައިގަތުމަށްފަހު ވެސް އެ ވައުދު އަލުން ވެލެއްވި އެވެ. މިއަދު ބިންގާ އެޅި އެ މަރުކަޒުގެ މަސައްކަތް، މިއަދުން ފެށިގެން 540 ދުވަހުގެ ތެރޭގައި ނިންމަން ޖެހޭނެ އެވެ.
އައްޑު އަތޮޅު ހުރިހާ ރަށެއްގެ އިދާރީ މަސައްކަތްތައް ބަލަހައްޓަމުން ދަނީ ހިތަދޫގަ އެވެ. އެ ރަށަކީ މާލެ ފިޔަވައި ރާއްޖޭގައި އެންމެ ބޮޑު އާބާދީއެއް އޮންނަ ރަށް ވެސް މެ އެވެ.
