ދިރުވާލައިގެން ރާއްޖެއަށް ގިނަ އަދަދެއްގެ މަސްތުވާތަކެތި އެތެރެކުރަން އުޅުނު ނޭޕާލަށް ނިސްބަތްވާ ދެ ފަސިންޖަރަކު ކަސްޓަމްސް އިން އަތުލައިގަނެފި އެވެ.
ކަސްޓަމްސްއިން ބުނި ގޮތުގައި މި މީހުން އަތުލައިގަތީ މިދިޔަ މަހުގެ 25 ގައި އެވެ. އެ އިދާރާއިން މި މައުލޫމާތު ހާމަކޮށްފައި މި ވަނީ ހާދިސާ ހިނގިތާ ތިން ހަފުތާއަށް ވުރެ ގިނަ ދުވަސް ފަހުންނެވެ.
ކަސްޓަމްސް އިން ބުނި ގޮތުގައި، މި ދެ މީހުންގެ ހަށިގަނޑުގެ ތެރެއިން މަސްތުވާތަކެތި އަޅާފައި ހުރި ޖުމްލަ 142 ބުލެޓް ފެނުނެވެ. އޭގެ ތެރޭގައި ތިން ބާވަތެއްގެ މަސްތުވާތަކެތި ހިމެނެ އެވެ. އެއީ 51.6 ގްރާމްގެ މޯފިން އާއި، 424 ގްރާމްގެ ކޮކެއިންގެ އިތުރުން 708.2 ގްރާމްގެ ހެރޮއިންނެވެ.
މި ތަކެތީގެ ޖުމްލަ ބަރުދަނުގައި 1183.8 ގްރާމް ނުވަތަ އެއް ކިލޯއަށް ވުރެ ގިނަ މަސްތުވާތަކެތި ހުއްޓެވެ. މިއީ މަސްތުވާތަކެތީގެ ގާނޫނަށް މި ފަހުން ގެނައި ބަދަލުގެ ދަށުން މަރުގެ އަދަބު އިއްވޭހާ ބައިވަރު ޑްރަގެވެ.
މި މައްސަލައިގައި ހިމެނޭ މީހުންގެ ވަނަވަރު ރަސްމީ އިދާރާތަކުން ހާމަކޮށްފައި ނުވި ނަމަވެސް، އެނގިފައިވާ ގޮތުގައި ހައްޔަރުކޮށްފައިވަނީ ނޭޕާލަށް ނިސްބަތްވާ 40 އަހަރުގެ އަންހެނަކާއި 47 އަހަރުގެ ފިރިހެނެކެވެ.
މި އަހަރުގެ ޖުލައި މަހުގެ ފަހުން ވެސް މިފަދަ މައްސަލައެއްގައި ޖެމެއިކާގެ މީހަކާއި ދިވެއްސަކު ވަނީ ހައްޔަރުކޮށްފަ އެވެ. މީގެ އިތުރުން، އައްޑޫ ސިޓީގެ ގަން އިންޓަނޭޝަނަލް އެއާޕޯޓުން އިންޑިއާގެ ފަސިންޖަރުންތަކެއް 5.5 ކިލޯގެ ކެނެބިސް އެތެރެކުރަން އުޅެނިކޮށް ވެސް އަތުލައިގަތެވެ.
