ރައްޔިތުންގެ މަޖިލީހުގެ މެންބަރުންނަށް ލިބޭ އިނާޔަތްތަކާއި ހިމާޔަތާއި ރައްކާތެރިކަމުގެ ވާހަކަ ރައްޔިތުން ދައްކަނީ ސަރުކާރަށް އަޅުވެތިވެފައި ތިބޭ "ބޮޓުންނާ" ހެދިކަމަށް ގަލޮޅު ދެކުނު ދާއިރާގެ މެންބަރު، މީކާއިލް އަހުމަދު ނަސީމް ވިދާޅުވުމުން ރިޔާސަތު އެކަމަށް ހުރަސް އަޅައިފި އެވެ.
މަޖިލީހުގެ މިއަދުގެ ޖަލްސާގައި ވާހަކަދައްކަވަމުން މީކާއިލް ވިދާޅުވީ މަޖިލިސް މެންބަރުންގެ ކަރާމާތް ނަގައިލަނީ އެ މެންބަރުން އަމިއްލައަށް ކަމަށެވެ. އޭގެ މިސާލެއްގެ ގޮތުން އޭނާ ދެއްކެވީ މަޖިލީހަށް ހުށަހަޅާ ގަރާރުތަކަށް ބަހުސް ކުރުން ހަނިކުރުމަށް މަޖިލިސް ގަވާއިދަށް މިހާރު ހުށަހަޅާފައިވާ އިސްލާހެވެ.
"މިފަދަ އިސްލާހުތައް މި ރައްޔިތުންގެ މަޖިލީހަށް ހުށަހެޅޭހާ ހިނދަކު ދިވެހި ރައްޔިތުން، މި ތަނުގައި ލިބޭ އިނާޔަތްތަކާއި ހިމާޔަތާއި ރައްކާތެރިކަމާއި އިމްތިޔާޒުގެ ވާހަކަދެއްކުމެއް ހުއްޓާނެ، އިއްޒަތްތެރި ރައީސް ޒަމާނުއްސުރެ ރައްޔިތުންގެ މަޖިލީހުން ގަރާރުތަކަށް އަމަލުކުރަނީ ބިލުގެ އުސޫލުން،" މީކާއިލް ވިދާޅުވި އެވެ.
"އެހެންނަމަވެސް، 20 ވަނަ ރައްޔިތުންގެ މަޖިލިސް، މި ދަންނަވާ ކުލީ މެންބަރުންގެ މަޖިލިސް، ބޮޓުންގެ މަޖިލިސް، އިއްޒަތްތެރި ރައީސް ދިވެހި ރައްޔިތުން ހަވާލުކުރި."
މީކާއިލް އެހެން ވިދާޅުވުމާއެކު ރިޔާސަތުން ވަނީ އޭނާގެ ވާހަކަ ހުއްޓުވައި އެގޮތަށް މަޖިލީހުގައި ނުދެއްކޭނެ ކަމަށް އަންގަވައިފަ އެވެ.
"އިއްޒަތްތެރި މެންބަރު، މިހާރު ހަމަ އަޅުގަނޑު ރިޔާސަތުން ވެސް ހުއްޓުވަންޖެހޭ ހިސާބަށް ތިޔަ ވަޑައިގަންނަވަނީ، ތަންކޮޅެއް ދުރަށް. އެހައި ދުަރަށް ވަޑައިނުގެން މިއީ ބައުންޑަރީ ތެރޭގައި މަސައްކަތް ކުރެއްވިއްޔާ ވާހަކަފުޅު ބައްޓަންކުރެއްވިއްޔާ ރަނގަޅުވާނެ، އެއީ ރައްޔިތުންގެ މަޖިލިސް މެންބަރުންނަށް މުހާތަބުކޮށް ބޮޓުންނެކޭ ވިދާޅުވުމުގެ ފުރުސަތެއް ނޯންނާނެ،" މަޖިލީހުގެ ރައީސް، އަބްދުއްރަހީމް އަބްދުﷲ ވިދާޅުވި އެވެ.
"އަދި، [މަޖިލިސް މެންބަރުންނަކީ] ކުލީ މެންބަރުންނެކޭ ވެސް ވިދާޅެއް ނުވެވޭނެ، އެހިސާބަށް ދަންޏާ އަޅުގަނޑުމެންނަށް ޖެހޭނީ ހަމަ އިއްޒަތްތެރި މެންބަރުގެ ވާހަކަތައް ހުއްޓުވަން."
އެ އެންގުން އެންގެވުމަށްފަހު، އަލުން ފުރުސަތު އެރުވުމުން މީކާއިލް ވިދާޅުވީ މަޖިލީހުގެ މެންބަރުން އޭނާ ސިފަކުރައްވާ ގޮތް ހުއްޓުވުމަކީ މަޖިލީހުގެ ރިޔާސަތަށް އޮތް އިހުތިޔާރެއް ނޫން ކަމަށެވެ.
"އަޅުގަނޑު މި ތަނުގައި ތިބި ރައްޔިތުންގެ މަޖިލީހުގެ މެންބަރުން ސިފަކުރަން ބޭނުންވާ ގޮތް ހުއްޓުވުމަކީ މަނިކުފާނަށް އޮތް އިހުތިޔާރެއް ނޫން، މަނިކުފާނަށް އޮތް އިހުތިޔާރެއް ނޫން އެއީކީއެއް، މިއީ ކުލީ މެންބަރުންގެ މަޖިލީހެއް، މިއީ..." މީކާއިލްގެ މައިކު ކަނޑައިލުމުގެ ކުރިން ވިދާޅުވަމުން ގެންދެވި އެވެ.
އޭގެ ފަހުން އަނެއްކާ ވެސް ލިބުނު ފުރުސަތުގައި މީކާއިލް ވިދާޅުވީ ރައްޔިތުންގެ މަޖިލީހުގެ ގަވާއިދަށް ބޭނުންހައި އިސްލާހެއް ގެންނައިރު މަޑުން ނުތިއްބަވާނެ ކަމަށެވެ. އަދި، ރައްޔިތުންގެ މަޖިލީހަކީ ވެރިކަން ކުރާ ޕީއެންސީގެ ސެނެޓު ނޫން ކަމަށާއި މަޖިލީހުގެ ގަވާއިދަކީ ޕީއެންސީގެ އަސާސީ ގަވާއިދު ނޫންކަމަށް އޭނާ ވިދާޅުވި އެވެ.
