ކުރިން އޮފީސް އިމާރާތެއްގެ ގޮތުގައި ބޭނުންކުރި ގާޒީ ބިލްޑިން ތަޅާލައި އެ ބިން ސާފު ކުރި ނަމަވެސް، އެ ބިން ތަރައްގީ ކުރާނެ ވަކި ޕްލޭނެއް ފައިނަލް ނުކުރާ ކަމަށް ސަރުކާރުން ބުނެފި އެވެ.
ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "އަދަދު" ނޫހަށް ވިދާޅުވީ ގާޒީ ބިލްޑިން ހުރި ބިމަށް ހަދާނެ ގޮތެއްގެ މަޝްވަރާތައް ކުރެވެމުން އަންނަ ކަމަށެވެ.
"ވަކި ގޮތެއް މުޅިން ފައިނަލް ނުކުރަން. ވަރަށް އަވަހަށް ގޮތެއް ނިންމާނަނަން،" އޭނާ ވިދާޅުވި އެވެ.
ގާޒީ ބިލްޑިން އަކީ ކުރީގެ ރައީސް މައުމޫން އަބްދުލް ގައްޔޫމުގެ ވެރިކަމުގައި އޮފީސް އިމާރާތެއްގެ ގޮތުގައި ހުޅުވި ތަނެކެވެ. އެތަން ބޭނުންކުރަން ފަށާފައި ވަނީ 1982 ގެ ތެރޭގަ އެވެ.
ގާޒީ ބިލްޑިން އިމާރާތް ތަޅާލާފައި ވަނީ އެތަން ވަރަށް ބޮޑަށް ބާވުމާ ގުޅިގެންނެވެ. އެ އިމާރާތް ދާދި ފަހަކާ ޖެހެންދެއް އޮފީސް އިމާރާތެއްގެ ގޮތުގައި ބޭނުންކުރި އެވެ.
ރައީސް އޮފީހުގެ ކުރިމައްޗަށް ވާގޮތަށް ކުރިން އޮފީސް އިމާރާތެއްގެ ގޮތުގައި ބޭނުންކުރި ހުރަވީ ބިލްޑިންގެ މި ވެރިކަމުގައި ތަޅާލައި އެތަނުގައި ވަނީ ޕާކަކާއި ސައިކަލް ޕާކިން ޒޯނެއް ހަދައިފަ އެވެ.
