ޖުމްހޫރީ ޕާޓީ އިސްވެ އޮންނަ ގޮތަށް އެމްއާރްއެމާ އެކު ކޯލިޝަން ހެދުމުގެ މަޝްވަރާތައް ފަށައިފި އެވެ.
އެމްއާރްއެމާއެކު ޖުމްހޫރީ ޕާޓީން ބޭއްވި ބައްދަލުވުމަށްފަހު ނޫސްވެރިންނާ ބައްދަލުކޮށް, ޖޭޕީގެ ޑެޕިއުޓީ ލީޑަރު އަދި ގާސިމްގެ ކެމްޕޭން މެނޭޖަރު އަމީން އިބްރާހިމް ވިދާޅުވީ, ބައްދަލުވުމުގައި, ދެ ޕާޓީގެ ސިޔާސަތުތަކާއި, ގަބޫލުކުރާ ގަބޫލުކުރުންތަކުގައި ހުރި އެއްގޮތް ކަމާއި ތަފާތުކުރުންތައް އެއް ސަފުހާއަކަށް ގެންނަން މަޝްވަރާ ކޮށްފައިވާ ކަމަށެވެ.
ދެ ޕާޓީން މަޝްވަރާ ކުރަމުން ދަނީ އެއް ކެންޑިޑޭޓަކު ނެރުމަށްތޯ ނޫސްވެރިއަކު ސުވާލު ކުރުމުން އަމީން ވިދާޅުވީ އެ ޕާޓީން ކެންޑިޑޭޓަކު ނެރެފައިވާ ކަމަށާއި, މަޝްވަރާކުރަން ދެން އަންނާނީ ޖޭޕީގެ ކެންޑިޑޭޓެއްގެ ފަހަތަށް އަރާނެ ބަޔަކު ކަމަށެވެ.
"ޖުމްހޫރީ ޕާޓީގެ ކެންޑިޑޭޓް, ކެންޑިޑޭޓެއްގެ ގޮތުގައި އިއުލާންކޮށް ޓިކެޓު އަރުވައި ހުރިހާ ކަމެއް ނިމިފައި މިއޮތީ. އުއްމީދު ކުރަނީ އަޅުގަނޑުމެންނާ އެކުގައި މަސައްކަތް ކުރައްވާނެ ބޭފުޅުން ކަމަށް އެކުގައި ކުރިއަށް ދިއުމުގެ ވާހަކަ ދައްކައިގެން, އެއް ޕޭޖަކަށް އާދެވޭ ގޮތަށް ވިސްނުން ބައްޓަންކުރަން ވާހަކަ ދައްކާނީ," ނަމަވެސް މިކަމުގައި ގޮތެއް ނިންމަން އަދި އަވަސްކަން ފާހަގަކުރައްވަމުން އަމީން ވިދާޅުވި އެވެ.
އޭނާ ވިދާޅުވީ, އެފަދަ ބޮޑު ނިންމުމެއް ނިންމަން ވަގުތު ނަގާނެ ކަމަށާއި, ފުރަތަމަ ބައްދަލުވުމުން އެކަމުގައި ގޮތް ނުނިމޭ ކަމަށެވެ.
ޖޭޕީއާއެކު މަޝްވަރާ ފަށާފައި މިވަނީ, އެމްއާރްއެމްގެ ފަރާތުން ރިޔާސީ ކެންޑިޑޭޓެއްގެ ގޮތުގައި އެ ޕާޓީގެ ރައީސް ފާރިސް މައުމޫން ނެރުމަށް ވާންޖެހޭ ތައްޔާރީތައް އެ ޕާޓީގެ އެކްސޯ މެންބަރުން ކުރަމުން ދަނިކޮށެވެ.
އެމްއާރްއެމްގެ ފަރާތުން ވާދަކުރަން ނިންމާފައިވަނިކޮށް ޖޭޕީއާއެކު މަޝްވަރާ ފެށުމާ ގުޅޭގޮތުން ސުވާލުކުރުމުން ފާރިސް ވިދާޅުވީ ވެރިކަމަށް ކުރިމަތިލައްވާނެކަން އިއުލާން ކުރައްވާފައި ނުވާނެ ކަމަށެވެ. ނަމަވެސް, އެކަމާ ގުޅުންހުރި މަސައްކަތްތައް ކުރައްވަމުންދާ ކަމަށް ވިދާޅުވި އެވެ.
"އަޅުގަނޑު ވަކި އެނައުންސްމަންޓެއް އަދި ހަދާފައެއް ނުވާނެ. އެކަމަކު އެއީ ގާނޫނީ ވަގުތުތަކެއް ކަނޑައެޅިފައިވާ މަސައްކަތަކަށްވާތީވެ, އަޅުގަނޑުމެން ވެސް ތައްޔާރީތައްވުމުގެ ގޮތުން ބައެއް މަސައްކަތްތައް އެބަ ކުރަން." ފާރިސް ވިދާޅުވި އެވެ.
ފާރިސް ފާހަގަ ކުރެއްވި ގޮތުގައި, މިއަދު ޖޭޕީއާއެކު ކުރި މަޝްވަރާތަކުގައި ވަރަށް އުއްމީދީ މަންޒަރެއް ފެނިގެން ހިނގައްޖެ އެވެ. އަދި, މިކަމުގައި ރަސްމީ އަދި ނުރަސްމީކޮށް ވެސް އިތުރު މަޝްވަރާތައް ކުރަން ނިންމާފައިވާ ކަން ފާރިސް ހާމަކުރެއްވި އެވެ.
އެމްއާރްއެމާއި ޖޭޕީން ގުޅިގެން މަސައްކަތް ކުރުމުގެ މަޝްވަރާތައް ކުރިއަށް ގެންދިޔައިރު, ޖޭޕީން ވަނީ ގުޅިގެން މަސައްކަތް ކުރުމާ ގުޅޭގޮތުން ޑިމޮކްރެޓްސް އާއި އެމްއެންޕީގެ އިތުރުން ޕީޕީއެމާއެކު ވެސް މަޝްވަރާ ކޮށްފަ އެވެ. އަދި ޕީޕީއެމް ރުހޭނަމަ އެއް ކެންޑިޑޭޓަކު ނެރުމުގެ މަޝްވަރާތައް ވެސް ކުރި އެވެ.
ނަމަވެސް, އެއްވެސް ޕާޓީއަކަށް އެއް ކެންޑިޑޭޓަކު ނެރުމާމެދު އެއްބަސްވުމަކަށް ނާދެވި, ހުރިހާ ޕާޓީތައް ވެސް ގެންދަނީ އަމިއްލައަށް ކެމްޕޭން ކުރަމުންނެވެ.
