ދިވެއްސަކަށް އެންމެ ގިނައިން ގަނެވޭނީ 10 ސިމް ކާޑު ކަމަށާއި ބިދޭސީއެއް ނަމަ ގަނެވޭނީ ތިން ސިމް ކާޑު ކަމަށް ކަނޑައަޅައި، ފޯނު ނަމްބަރު ދޫކުރުމާއި ނަމްބަރު ބޭނުންކުރުމާ ބެހޭ ގަވާއިދު އިސްލާހުކޮށްފި އެވެ.
އާ ގަވާއިދުގައި ވާގޮތުން ރާއްޖޭގައި ސިމް ކާޑު ދޫކުރެވޭނީ ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) އިން މޯބައިލް ޓެލެކޮމިއުނިކޭޝަން ސާވިސް ޕްރޮވައިޑާ ލައިސެންސް ދޫކޮށްފައިވާ ފަރާތްތަކަށާއި އެ ފަރާތްތަކުގެ އޭޖެންޓުންނަށެވެ. އަދި ސިމް ކާޑު ކަސްޓަމަރުންނަށް ދޫކުރާއިރު އޮންނަން ވާނީ ބޭނުންނުކުރެވޭ ހާލަތު (ނޮން އެކްޓީވޭޓަޑް ސްޓޭޓަސް) ގައި ކަމަށް ވެސް ގަވާއިދުގައި ބުނެ އެވެ.
މޯބައިލް ފޯނު ރަޖިސްޓްރީ ކުރަން ހުށަހަޅާ ފަރާތުގެ ގިނަ މައުލޫމާތުތަކެއް ސާވިސް ޕްރޮވައިޑަރަށް ފޯރުކޮށްދޭން ޖެހޭ ކަމަށް ވެސް ގަވާއިދުގައި ބުނެފައިވެ އެވެ. އޭގެ ތެރޭގައި ފުރިހަމަ ނަން، އުފަން ތާރީހު، ޕާސްޕޯޓު ނަމްބަރު ނުވަތަ ވޯކް ޕާމިޓް ނަމްބަރު އަދި ދިރިއުޅޭ އެޑްރެހާއި ދާއިމީ އެޑްރެސް ހިމެނެ އެވެ.
ރަޖިސްޓްރީ ކުރަން ހުށަހަޅާ ފަރާތުން ހުށަހަޅާ ކާކު ކަން އަންގައިދޭ މުއްދަތު ހަމަނުވާ ލިޔުންތަކުގެ ކޮޕީ ސާވިސް ޕްރޮވައިޑަރުގެ އަތުގައި ރައްކާކުރެވިފައި ހުންނަންޖެހޭނެ ކަމަށް ގަވާއިދުގައި ބުނެފައިވެ އެވެ.
ގަވާއިދުގައިވާ ގޮތުން އެ ރަޖިސްޓްރޭޝަން މަރުހަލާ ޑިޖިޓަލްކޮށް ކުރިއަށް ގެންދިއުމުގެ އިހްތިޔާރު ވެސް ސާވިސް ޕްރޮވައިޑަރަށް އޮންނާނެ އެވެ.
ގަވާއިދުގައި ދޫކުރުމަށް ކަނޑައަޅާފައިވާ އަދަދުގެ އިތުރަށް އެއްވެސް ފަރާތަކުން ނަމްބަރު ބޭނުންވާ ނަމަ މަގުބޫލު ސަބަބެއް ބަޔާންކޮށް ކޮމިއުނިކޭޝަން އޮތޯރިޓީއަށް ހުށަހެޅުމުން ހުއްދަ ދިނުމުގެ އިހްތިޔާރު އެ އޮތޯރިޓީއަށް އޮންނާނެ އެވެ.
އޭގެ އިތުރުން ގަވާއިދުގައިވާ އެއްވެސް މާއްދާއަކާ ހިލާފު ކަމެއް ސާވިސް ޕްރޮވައިޑަރު ނުވަތަ އެޖޭންޓަކުން ކޮށްފި ނަމަ، އެ ފަރާތަކާ މެދު ފިޔަވަޅު އަޅައި ޖޫރިމަނާ ކުރެވޭނެކަން ގަވާއިދުގައި ފާހަގަކޮށްފައިވެ އެވެ.
- ގަވާއިދާ ހިލާފުވާ ފުރަތަމަ ފަހަރު އެކަމެއް ރަނގަޅުކުރުމަށް މުއްދަތެއް ދިނުމަށްފަހު އެކަން އެންގުން
- ގަވައިދާ ހިލާފުވާ ދެވަނަ ފަހަރު އެކަމެއް ރަނގަޅުކުރުމަށް އަންގައި 10،000ރ. އިން ޖޫރިމަނާކުރުން
- ގަވައިދާ ހިލާފުވާ ތިންވަނަ ފަހަރު އެކަމެއް ރަނގަޅުކުރުމަށް އަންގައި 20،000ރ. އިން ޖޫރިމަނާ ކުރުން
- ގަވައިދާ ހިލާފުވާ ތިންވަނަ ފަހަރު ނުވަތަ އެއަށް ވުރެ އިތުރުވާނަމަ، ކޮންމެ ފަހަރަކު 50،000ރ. ޖުރިމަނާކޮށް ފިޔަވަޅު އެޅުން
އެ ގަވާއިދަށް އަމަލުކުރަން ފަށާނީ ގަވާއިދު ޝާއިއުކުރި ތާރީހުން ފެށިގެން އެއް މަސް ފަހުންނެވެ. އަދި ގަވާއިދަށް އަމަލުކުރަން ފެށުމަށްގަހު ކުރިން ދޫކޮށްފައިވާ ނަމްބަރުތައް ބޭނުން ކުރުމުގައި ވެސް އައު ގަވާއިދަށް އަމަލުކުރަންޖެހޭނެ އެވެ. އަދި ގަވާއިދަށް އަމަލުކުރަން ފަށާތާ ތިން މަސް ދުވަހުގެ ތެރޭގައި ގަވާއިދާ އެއްގޮތަށް ނަމްބަރުގެ އަދަދު އިހުތިޔާރު ނުކުރާ ނަމަ، އެ އަދަދު މަދުކޮށް އިތުރުވާ ނަމްބަރުތަކުގެ ހިދުމަތް ކަނޑާލާނެ އެވެ.
