މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އެ މީހާގެ ހިއްސާ އޮންނަ ކުންފުންޏެއްގެ ބޭންކް އެކައުންޓުން ގިނަ އަދަދެއްގެ ފައިސާ ވަގަށް ނެގި މައްސަލައެއްގައި 10 މީހަކު ހައްޔަރުކޮށްފިއެވެ.
ފުލުހުން ހިންގި މި ބޮޑު އޮޕަރޭޝަނުގައި ހައްޔަރުކުރި މީހުންގެ ތެރެއިން ހަތް މީހަކު މާލެއިން ހައްޔަރުކުރިއިރު، ތިން މީހަކު ހައްޔަރުކުރީ އައްޑޫ ސިޓީންނެވެ. އަދި ބާކީ ހުރި މީހާ ހައްޔަރުކުރީ ކ. ހިންމަފުށިންނެވެ.
ފުލުހުން ބުނި ގޮތުގައި މި ސްކޭމްގައި އެ ކުންފުނީގެ އެކައުންޓުން 279,600 އަށްވުރެ ގިނަ ރުފިޔާ ވަނީ ނަގާފައެވެ.
މި މައްސަލައާ ގުޅިގެން ޖެނުއަރީ 21 އިން ފެށިގެން ކޯޓު އަމުރުތަކުގެ ދަށުން ހައްޔަރުކޮށްފައިވަނީ ލ. އިސްދޫ، ގުޑްލައިފް، މުހައްމަދު ހަސަން، 59، ސ. ހިތަދޫ، އުދަ، އަލީ އިރުފާނު އަހްމަދުދީދީ 26، ސ. ހިތަދޫ، ނަންރީތިގެ، އަލީ ޝިރާޒު 38، ހދ. ވައިކަރަދޫ، ޕެރިމްރޯޒް، އަބްދުﷲ ނާފިޒް 39، ގއ. ކަނޑުހުޅުދޫ، ފޫހިވާގެ، މުހައްމަދު އަލީ 42، މާލޭގެއާގެ، މުހައްމަދު ނުހާދު އަލީ 30، ހއ. ކެލާ، ޕެނަމާ، މުހައްމަދު ސިމާދު 38، ގދ. ފިޔޯރީ، ހީނާމާގެ، އަލީ އިމްރާން 38، ގދ. ތިނަދޫ، ގުލްބަކާގެ، އަބްދުﷲ އިސްރާގް 19 އަދި ކ. ހިންމަފުށި، މެޑޯޒް، މުހައްމަދު އިބްރާހީމް 49 އެވެ.
ހައްޔަރުކުރި މީހުންގެ ތެރެއިން ހަ މީހަކީ ސްކޭމްކޮށްގެން ހޯދި ފައިސާ އެ މީހުންގެ އަމިއްލަ އެކައުންޓަށް ޖަމާކޮށްގެން އެ ފައިސާ ނެގި މީހުންނެވެ. އަދި އެކަކު ވަނީ އެ ފައިސާ އެކި ވިޔަފާރިތަކަށް ޖަމާކޮށްގެން މުދާ ގަނެފައެވެ. މީގެ އިތުރުން ތިން މީހަކީ އެކި މީހުން އޭޓީއެމްތަކަށް ގެންގޮސް، އެ މީހުން މެދުވެރިކޮށް ފައިސާ ނެރުވުމަށްފަހު އެ ފައިސާއާ ހަވާލުވި މީހުން ކަމަށް ފުލުހުން ބުންޏެވެ.
މި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން މުހައްމަދު އިބްރާހީމް ފަސް ދުވަހަށް، މުހައްމަދު އަލީ އާއި މުހައްމަދު ޙަސަން ހަތް ދުވަހަށް، އަލީ އިރުފާން އަހްމަދުދީދީ 10 ދުވަހަށް އަދި ބާކީ ތިބި ހަ މީހުން 15 ދުވަހަށް ބަންދުކުރުމަށް ވަނީ އަމުރުކޮށްފައެވެ.
