މިއާމީ، ޔުނައިޓެޑް ސްޓޭޓްސް (ޖުލައި 25) - އިންޓަ މިއާމީ އިން ދެން ކުޅޭ މެޗުގައި އެ ޓީމުގެ އާޖެންޓީނާ ތަރި، ލިއޮނަލް މެސީ، އަށް ފުރަތަމަ އެގާރައިގައި ކުޅެވޭނެ ކަމަށް އެ ޓީމުގެ ކޯޗު ޓަޓާ މާޓީނޯ ބުނެފި އެވެ.
ހިލޭ ޓްރާންސްފާއެއްގައި އިންޓަ މިއާމީ އަށް ބަދަލުވުމަށް ފަހު، މެސީ، 36، އެ ޓީމަށް ކުޅެދިން ފުރަތަމަ މެޗުގައި ކުޅެން އެރީ ބަދަލެއްގެ ގޮތުގަ އެވެ. އެކަމަކު، އެ މެޗުގައި ވެސް މެސީ ވަނީ އިތުރު ވަގުތުގައި ހިލޭ ޖެހުމެއް ގޯލަށް ވައްދާލައި، ކްރޫޒް އަޒުލް އަތުން އިންޓަ މިއާމީ މޮޅުކޮށްދީފަ އެވެ.
އެޓަލަންޓާ ޔުނައިޓެޑާ ދެކޮޅަށް އަންގާރަ ދުވަހުގެރޭ ކުޅޭ މެޗުގެ ކުރިން ދިން އިންޓަވިއުއެއްގައި މާޓީނޯ ބުނީ ހުކުރު ދުވަހުގެރޭ ބަދަލަކަށް އަރައި، އަޒުލްއާ ދެކޮޅަށް މެސީ އާއި ސާޖިއޯ ބުސްކެޓްސް ދެއްކި ކުޅުމަށް ބަލާއިރު، ދެ ކުޅުންތެރިންނަށް ވެސް ފުރަތަމަ އެގާރައިގައި ކުޅެވިދާނެ ކަމަށެވެ.
"ޔަގީނުން ވެސް އެ ދެ މީހުން، ލިއޯ (މެސީ) އާއި ބުސީ (ބުސްކެޓްސް) ސާބިތުކޮށްދީފި، ގިނަ މިނިޓް އެ މީހުން ލައްވައި ކުޅުވަންޖެހޭނެކަން، އަހަންނަށް ފެންނަ މަންޒަރުތަކަށް ބަލާއިރު، ޓްރެއިނިންނާއި އެހެނިގެން ކަންކަން ވެސް ދަނީ ރަނގަޅަށް، މެސީ ވެސް އެ ހުރީ 11 ގައި ބޭނުންކުރެވޭހާ ފިޓްކޮށް،" ކުރިން އާޖެންޓީނާ އާއި ބާސެލޯނާ އަށް ކޯޗުކޮށްދިން މާޓީނޯ ބުންޏެވެ.
އެޓަލަންޓާ ޔުނައިޓެޑް އަތުން އިންޓަ މިއާމީ މޮޅުވެއްޖެނަމަ، އެ ޓީމަށް ނޮކައުޓް ބުރުން ފުރުސަތު ލިބޭނެ އެވެ. އެމެރިކާގެ ލީގު ކަޕުގައި ވާދަކުރަނީ އެ ގައުމުގެ ލީގު ސިސްޓަމް ކްލަބްތަކާއި މެކްސިކޯގެ ކްލަބްތަކެވެ.
