މޮސްކޯ އާއި ކްރައިމިއާގެ ހިސާބުތަކަށް ޑްރޯން ހަމަލާ ދިނުމުން ހަރުކަށި ރައްދެއް ދޭނެކަމުގެ ވަރުގަދަ އިންޒާރެއް ރަޝިއާއިން ދީފި އެވެ.
ރަޝިއާގެ ވެރިރަށް މޮސްކޯއަށް ދިން ހަމަލާގެ ޒިންމާ އުފުލީ ޔޫކްރެއިނުންނެވެ. ރަޝިއާއިން ބުނީ އެއީ އާއްމުންނަށް ޓާގެޓުކޮށްގެން ދިން ޓެރަރިސްޓު ހަމަލާއެއް ކަމަށެވެ.
ރައްދުގައި ހަރުކަށި ފިޔަވަޅުތައް އަޅާނެ ކަމަށް ރަޝިއާގެ ފޮރިން މިނިސްޓްރީން ބުންޏެވެ. ޔޫކްރެއިނުން އާއްމުންނަށް ޓާގެޓް ކުރަނީ ހުޅަނގުގެ އެއްބާރުލުމާ އެކުގައި ކަމަށް ވެސް ރަޝިއާއިން ތުހުމަތު ކުރި އެވެ.
ރަޝިއާގެ އޮފިޝަލުން ބުނީ ޔޫކްރެއިންގެ ޑްރޯންތައް އަމާޒު ކުރީ މޮސްކޯގެ ދެ އިމާރާތަަކާއި 2014 ވަނަ އަހަރުން ފެށިގެން ރަޝިއާއިން ކޮންޓްރޯލް ކުރާ ކްރައިމިއާގެ ހަތިޔާރު ގުދަނަކަށް ކަމަށެވެ.
ޔޫކްރެއިންގެ ދިފާއީ ފަރާތްތަކުން ބުނީ މޮސްކޯއަށް ދިން ހަމަލާއަކީ އެ ގައުމުގެ އަސްކަރީ އިންޓެލިޖެންސުން ރާވައިގެން ހިންގި ހާއްސަ އޮޕަރޭޝަނެއް ކަމަށެވެ.
ޔޫކްރެއިނުން މޮސްކޯއަށް ހަމަލާދީފައިވާ އިރު، އޭގެ އެއް ދުވަސް ކުރަން ރަޝިއާއިން ވަނީ ޔޫކްރެއިންގެ އޮޑެއްސާ ސިޓީއަށް ހަމަލާތަކެއް ދީފަ އެވެ.
އެ ހަމަލާގައި ދެ މީހުން މަރުވެ، ޔުނެސްކޯގެ ތަރިކައިގެ ލިސްޓުގައި ހިމެނޭ ސިޓީގެ ތާރީހީ ފައްޅިއަކަށް ގެއްލުން ލިބުނެވެ. އެކަމުގެ ބަދަލު ހިފާނެ ކަމަށް ޔޫކްރެއިނުން ބުންޏެވެ.
