ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި އެމްޑީޕީގެ ޓިކެޓުގައި ވާދަ ކުރައްވާ، އުމުރުފުޅުން 61 އަހަރުގެ އިބްރާހިމް މުހައްމަދު ސޯލިހަށް ވުރެ، އެ މަނިކުފާނުގެ ކުރީގެ މިތުރު ހަގީ ފަސް އަހަރެވެ. އެހެންނާ ނަޝީދުގެ މިހާރު އުމުރުފުޅަކީ 56 އަހަރެވެ.
އާދީއްތަ ދުވަހުގެ ރޭ ދި ޑިމޮކްރެޓް ޕާޓީގެ ހަރުގޭގައި ބޭއްވި ޖަލްސާގައި ނަޝީދު ފުރަތަމަ ވެސް ވިދާޅުވީ އެމަނިކުފާނު ވެސް އުމުރުފުޅުން 50 އަހަރަށްވުރެ މަތިވެފައިވާތީ މިހާރު މުސްކުޅިފުޅުވެއްޖެ ކަމަށެވެ. އެކަމަކު ސިއްހީ މައްސަލަތަކެއް ނެތްކަން ތަކުރާރުކޮށް ހަމްދުކުރެއްވުމާއެކު ފާހަގަކުރެއްްވި އެވެ. ދެން ރައީސް އިބްރާޙީމް މުހައްމަދު ސޯލިހަށް ހަނދުމަފުޅުކޮށް ދެއްވީ އެ މަނިކުފާނު ވެސް މުސްކުޅިފުޅުވެއްޖެކަމެވެ. ވެރިކަމުގެ އައު ހިޔާލުތައް އަންނާނީ 50 އަހަރު ނުފުރޭ، 'ޒުވާން' ބޭފުޅުންނަށްކަމަށް ޖޯޝުގައި ވިދާޅުވި އެވެ. މިހާރުގެ ލީޑަޝިޕަށް ވީ ވަރެއް ވަނީ 'ޑިލޭ ސްޕްރޭ ޖަހައިގެން' ކަމަށް މާ ދުރުގައި ތިބި ބަޔަކާ ހަވާލާ ދެއްވައި ވިދާޅުވި އެވެ.
ނަޝީދުގެ ވާހަކަ ފުރަތަމަ ފަހަރަށް އަޑުއަހާ މީހަކަށް ފެންނާނީ އެމަނިކުފާނުގެ ހިތްތިރި ކަމެވެ. ވެރިކަމުގެ އެދުމެއް ނެތްކަމާއި ޒުވާނުންނާ ގައުމު ހަވާލުކުރެއްވުމުގައި ހުރި އިހުލާސްތެރި ރޫހެވެ. އެއީ ފުރަތަމަ ފަހަރަށް އަޑުއެހީމާ ހީވާނޭ ގޮތެވެ.
އެމްޑީޕީގެ ރިޔާސީ ޕްރައިމަރީއަށް ހުޅުވާލީ މީގެ ހަތަރު ފަސް މަހެއްހައި ދުވަސް ކުރިންނެވެ. އޭރުވެސް ރައީސް ނަޝީދުގެ އުމުރުފުޅުން 56 އަހަރު ވެއްޖެ އެވެ. އެ މަނިކުފާނުގެ ބަހުންނަމަ މުސްކުޅިފުޅު ވެއްޖެ އެވެ. އެކަމަކު ރިޔާސީ ޕްރައިމަރީގައި ވާދަކުރައްވަންވީމާ އެއީ ވެރިކަމަށް އެއްވަނަ މަރުކާ އެވެ. ތެދެކެވެ. ނަޝީދުގެ ހަލުވި ހިންގެވުމާއި އަވަސް ހަރަކާތްތަކުން ޒުވާންކަން މެނުވީ ފާޅުނުވާކަމަށް، އެކަކަށް އަޅުގަނޑު ހަމަގައިމުވެސް ބުނާނަމެވެ.
ރިޔާސީ ޕްރައިމަރީ ނަޝީދަށް ކާމިޔާބުވާ ގޮތެއް ނުވި އެވެ. ރައީސް ސޯލިހުގެ މައްޗަށް ކުރި ނުހޯއްދެވި، ބަލިވެވަޑައިގަތުމުން ނަޝީދު ދެން ނިންމެވީ ޕާޓީ ތެރޭގައި ރަސްމީކޮށް ވަކި ހަރަކާތެއް ފައްޓަވާށެވެ. އެ ހަރަކާތް ފުޅާވެ، ޕާޓީއަކަށް ބަދަލުކުރައްވައި، ދެން މަސައްކަތް ކުރެއްވީ 'އީބޫ ނޫންގޮތެއް' ހޯއްދެވުމަށެވެ.
ނަޝީދުގެ ވިސްނުންފުޅު އާދީއްތަ ދުވަހުގެ ރޭ އެ ވިދާޅުވެ ދެއްވީ އެވެ. ވެރިކަމަށް އަންނަންވާނީ ޒުވާނެކެވެ. އުމުރުން ފަންސާސް އަހަރު ނުވާ، ތާޒާ ހިޔާލުތަކުގެ ވެރިއެކެވެ. ޅަދޮނޅު، ހަރަކާތްތެރި، އަދި 'ޑިލޭ ސްޕްރޭ' ބޭނުން ކުރަން ނުޖެހޭނޭ ބޭފުޅެކެވެ. ރައީސް އިބްރާހީމް މުހައްމަދު ސޯލިހު ބަލިކުރައްވަން، މި ހުރިހާ ޝަރުތެއް ފުރިހަމަވާކަމަށް ނަޝީދަށް ފެނިވަޑައިގެންނެވި ކެންޑިޑޭޓަކީ ޖުމުހޫރީ ޕާޓީގެ ލީޑަރު އޮނަރަބްލް ގާސިމް އިބްރާހީމް އެވެ. ގާސިމް އަމިއްލަފުޅު ނަފްސަށް ރައްދު ނުކުރައްވާނޭ ކިތަންމެ ތައުރީފަކާއި ސަނާއެއް ނަޝީދުގެ ފަރާތްޕުޅުން ގާސިމަށް ބަރުތީލަކުރި އެވެ. ވެރިކަން ހައްގީ ގާސިމް އިބްރާހީމަށް ކަމަށް ވިދާޅުވި އެވެ.
އެ ހިފެހެއްޓުމެއް ނެތް ތައުރީފުތަކާއެކު ނަޝީދު ގާސިމަށް ހުށަހެޅުއްވީ، ވެރިކަމަށް އިންތިހާބު ވުމާއެކު، ގާސިމަކީ ވެރިކަމުގެ ބާރު ނެތް ރައީސަކަށްވެވަޑައިގަތުމަށްފަހު، ވެރިކަން ހިންގަން ބޮޑުވަޒީރަކު އިންތިހާބު ކުރުމަށެވެ. އެކަން ކުރާނޭ ގޮތުގެ އިޖުރާއީ ތަރުތީބުތައް ބަޔާންކުރާ ނިކަން ދިގު ކަރުދާހެއްވެސް ގާސިމަށް ފޮނުއްވި އެވެ. އެ ކަރުދާހުގައި އޮތްގޮތުން، ނިޒާމީ ވޯޓަކަށް ގޮސް، ބަރުލަމާނީ ނިޒާމަކަށް ބަދަލުކުރަން ޖެހޭނީ ގާސިމް ވެރިކަމުގެ ހުވާކުރެއްވުމުގެ ވެސް ކުރިންނެވެ.
ނަޝީދު ހައްދަވަން އުޅުއްވި ހިންތައަކީ ކޮބައިކަން، އަމިއްލަ މަސައްކަތުން ރާއްޖޭގެ އެންމެ ބޮޑު އެއް މަހުޖަނަށް ވެވަޑައިގެންނެވި، އަދި އެންމެ ފުޅާ ދާއިރާއެއްގައި ބޮޑެތި ވިޔަފާރިތައް ހިންގަވާ ގާސިމަށް ސާފުވެވަޑައިގަތެވެ. ގާސިމް ވިދާޅުވީ ނަޝީދު ބޭނުންފުޅުވަނީ ގާސިމަކީ ޕަޕެޓެއްގެ ގޮތުގައި ހުންނަވައި، ނަޝީދު ވެރިކަން ހިންގާ ގޮތަށް ކަންކަން އަނބުރާލުމަށް ކަމަށެވެ. ވަރަށް ކޯފާވެ ނަޝީދަށް ފާޑުވިދާޅުވި އެވެ.
"އަޅުގަނޑަށް އިނގޭ ރައީސް ނަޝީދު އެ ދައްކަވަނީ ކޮން ވާހަކައެއްކަން. އަޅުގަނޑު ދަންނަން ރައީސް ނަޝީދު ވަރަށް ފުރިހަމައަށް. އެބޭފުޅާއަކަށް [ނަޝީދަށް] ކަމަކުނުދާނެ އެބޭފުޅާ ނޫން އެހެން މީހަކު ދިވެހިރާއްޖޭގެ ވެރިކަމުގައި ހުންނާކަށް. އެހެން މީހަކަށް އެ ފުރުސަތު ދީގެން އެބޭފުޅާއަކަށް ކެތެއް ނުވާނެ،" ގާސިމް ވިދާޅުވި އެވެ.
ގާސިމާއެކު ނަޝީދަށް ކޯލިޝަން ހެއްދެވޭ ގޮތެއް ނުވި އެވެ. އެކަމަކު ނަޝީދު އެކަމަށް ވަރަށް ބޮޑަށް މަސައްކަތް ކުރެއްވި އެވެ. އަދިވެސް އެބަ ކުރައްވަ އެވެ. އެކަމަކު ގާސިމްގެ އުމުރުފުޅަކީ ސާޅީހެއް ނޫނެވެ. އެއީ ވީހުގެ އަހަރުތައް ގުނަމުންދާ ބޭފުޅެއްވެސް ނޫނެވެ. އެކަމަކު ނަޝީދުގެ ހުށަހެޅުންތަކަށް އާނބަސް ވިދާޅުވާނަމަ، ގައުމުގެ ވެރިކަމަށް ގެންނަން ނަޝީދު ކަނޑައެޅުއްވި ޝަރުތުތަކުގެ އޮޅިގަނޑު ގިރާކުރެވެ އެވެ.
މީގެ ހަތަރު މަސް ދުވަސް ކުރިން ދުނިޔެވީ ގާނޫނުތައް ނިޔާކޮށްފައި އޮތްގޮތުން އުމުރުން ފަންސާސް ފުރުމުން އެމީހާ ވަނީ ދުނިޔޭގެ ތަޖުރިބާތައް ލިބިހުރި ހަރު މީހަކަށެވެ. އެހާރުން ދެން އެވީ އެމީހަކު ކުޅަ ތަޖުރިބާގެ އަލީގައި ގައުމަށް ހިދުމަތް ކޮށްދިނުމައިގެން އުޅޭށެވެ. އުމުރުން ފަންސާސް ފުރުނު ފަހުން ނަޝީދު ރިޔާސީ ޕްރައިމަރީގައި ވާދަކުރެއްވީ އެހެންވެ އެވެ. ގާސިމް އިބްރާހީމް ރައީސުލްޖުމްހޫރިއްޔާ ކަމުގެ މަގާމަށް ގެންނަވަން މަސައްކަތް ކުރެއްވީ ވެސް އެހެންވެ އެވެ. ކޯލިޝަން ހެއްދެވުމަށް މަސައްކަތް ކުރައްވާ އެހެން ޕާޓީތަކުގެ ލީޑަރުން ވެސް ވަނީ ފަންސާސް ގިނާ ކުރައްވައިފަ އެވެ.
އެކަމަކު، މިހަތަރު މަސް ދުވަހުގެ ތެރޭގައި އެ ގާނޫނަށް ބަދަލު އައިސްފި އެވެ. ފަހުގެ އިސްލާހު ބުނާ ގޮތުން ވެރިކަން ކުރަންވާނީ އުމުރުން ފަންސާސް ނުފުރޭ މީހުންނެވެ. އައު ހިޔާލުތައް އަންނާނީ ފަންސާސް ފުރުމާ ހަމައަށެވެ. ފަންސާސް ފުރޭ ދުވަހު އެ ދޮރު ބަންދުވާނެ އެވެ. މިއީ މިވަގުތަށް އޮތް ގޮތެވެ. ފެނިވަޑައިގަންނަވާ ލާއިގު ވަގުތެއްގައި މިގާނޫނަށް އިތުރު އިސްލާހެއް ނާންނާނޭކަމުގެ އެއްވެސް ޔަގީންކަމެއް ނެތެވެ.
