ސެޕްޓެމްބަރު މަހު ބާއްވާ ރިޔާސީ އިންތިހާބު ކާމިޔާބުވެއްޖެ ނަމަ ކުރިއަށް ވަޑައިގަންނަވާނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފަހަތްޕުޅުގައި ހުންނަވައިގެން ކަމަށް ދަ ޑިމޮކްރެޓްސްގެ ރިޔާސީ ޕްރައިމަރީއަށް ކުރިމަތިލެއްވި ހަމައެކަނި ކެންޑިޑޭޓް އިލްޔާސް ލަބީބް މިރޭ ވިދާޅުވެއްޖެ އެވެ.
ސަޕޯޓަރުންނާއެކު މިއަދު ޕާޓީ ޖަގަހައިގައި ބޭއްވި ހަރަކާތެއްގައި އާންމުންގެ ސުވާލުތަކަށް ޖަވާބުދެއްވަމުން އިލްޔާސް ވިދާޅުވީ އޭނާގެ "ސިޔާސީ މުދައްރިސު" ނަޝީދުގެ "މައްޗަށް އެރޭނެ ގޮތެއް ނޯންނާނެ" ކަމަށެވެ.
"އަޅުގަނޑުގެ ސިޔާސީ ޓީޗަރަކީ، އަޅުގަނޑުގެ މުދައްރިސަކީ ރައީސް ނަޝީދު. އެބޭފުޅާގެ ފަހަތުގައި އަޅުގަނޑު ކުރިއަށްދަނީ އަދި ދެންވެސް ދާން އޮތީ އެ ބޭފުޅާގެ ފަހަތުގައި. އަޅުގަނޑަށް އެބޭފުޅާގެ މައްޗަށް އެރޭނެ ގޮތެއް ނޯންނާނެ،" ލަބީބް ވިދާޅުވި އެވެ.
އޭގެ އިތުރުން ލަބީބް މިރޭ ވިދާޅުވީ "އަޅުގަނޑުމެންގެ ސިޔާސީ މުފައްކިރަކީ" ރައީސް ނަޝީދު ކަމަށެވެ.
"ރާއްޖޭގެ ސިޔާސީ މަޝްރަހު ބައްޓަން ކުރައްވާ މިހިސާބަށް ގެންދެވި ބޭފުޅަކީ ރައީސް ނަޝީދޭ. އެއީ އަޅުގަނޑުމެންގެ ސިޔާސީ މުފައްކިރު،" އޭނާ ވިދާޅުވި އެވެ.
އޭގެ އިތުރުން އިލްޔާސް ވިދާޅުވީ، ރައީސް ސޯލިހުއާ ނަޝީދާ މެދުގައި އޮތްފަދަ ގާތް ގުޅުމެއް ނެތް ކަމަށެވެ. އެހެން ނަމަވެސް ރައީސް ސޯލިހު އަމަލުކުރެއްވި ފަދައިން ނަޝީދަށް ނަހައްދަވާނެ ކަމަށް އިލްޔާސް ވިދާޅުވި އެވެ.
މިރޭ ޑިމޮކްރޭޓްސްގެ ހަރުގޭގައި ބޭއްވި ބައްދަލުވުމަކީ އެޕާޓީގެ ޕްރައިމެރީ ކެނޑިޑޭޓު ދަސްކޮށްލުމަށް ބޭއްވި ހަރަކާތެކެވެ. އެ ބައްދަލުވުމުގައި އާންމު މެމްބަރުންނަށް އިލްޔާސްއާ ސުވާލުކޮށް ހިޔާލު ބަދަލުކޮށްލުމުގެ ފުރުސަތު ދިނެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބަށް ކުރިމަތިލާން މިއަދު ހުޅުވާލިއިރު ރައީސް އިބްރާހިމް މުހައްމަދު ސޯލިހުގެ އިތުރުން ޖުމްހޫރީ ޕާޓީގެ ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމް ކުރިމަތިލައްވަ އެވެ.
ޕީޕީއެމުން ބުނަނީ އެ ޕާޓީގެ ކެންޑިޑޭޓަކީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީގެ ރައީސް އަބްދުﷲ ޔާމީން ކަމަށެވެ. މިވަގުތު މާފުށީ ޖަލުގައި ހުންނެވި ޔާމީންގެ އިންތިހާބީ ހައްގުތައް ކަށަވަރު ކުރުމަށް އެމަނިކުފާނުގެ ވަކީލުން މިއަދު ވަނީ ސުޕްރީމް ކޯޓަށް މައްސަލައެއް ވައްދައިފަ އެވެ.
