ސިޑްނީ، އޮސްޓްރޭލިއާ (ޖުލައި 20) - ނިއު ޒީލެންޑާއި އޮސްޓްރޭލިއާގައި މިއަދު ފަށާ ފީފާ ވިމެންސް ވޯލްޑް ކަޕްގައި އޮސްޓްރޭލިއާ ކުޅޭ ފުރަތަަަމަ ދެ މެޗު އެ ޓީމުގެ ކެޕްޓަން، ސޭމް ކާ އަށް ގެއްލޭނެ ކަމަށް އޭނާ ބުނެފި އެވެ.
ނިއު ޒީލެންޑާއި އޮސްޓްރޭލިއާގައި މިއަދުން ފެށިގެން އަންނަ މަހުގެ 20 ވަނަ ދުވަހުގެ ނިޔަލަށް ކުރިއަަށްދާ ފީފާ ވިމެންސް ވޯލްޑް ކަޕްގައި ނިއު ޒީލެންޑުން ވަނީ މިއަދު ފުރަތަމަ މެޗުގައި ނޯވޭ އަތުން 1-0 އިން މޮޅުވެފަ އެވެ. މި މެޗުގެ ހަމައެކަނި ލަނޑު، 48 ވަނަ މިނިޓްގައި ޖެހީ ހެނާ ވިލްކިންސަން އެވެ.
މިއީ، ވިމެންސް ވޯލްޑް ކަޕެއްގައި ނިއު ޒީލެންޑުން ހޯދި ފުރަތަމަ މޮޅެވެ.
އޮސްޓްރޭލިއާ އިން މިއަދު ކުޅެން އޮތް މެޗު ފެށެން ކުޑަތަންވެފައި ވަނިކޮށް އެ ޓީމުގެ ތަރި ކާ އަށް އަނިޔާވެފައިވާ ކަމަށް މި ވަނީ މީޑިއާގައި ބުނެފަ އެވެ.
އިނގިރޭސި ކްލަބް ޗެލްސީ އަށް ކުޅެމުން އަންނަ އޮސްޓްރޭލިއާގެ ކެޕްޓަން ކާ، އެ ޓީމުގެ ޕްރެކްޓިހެއްގެ ތެރެއިން.
ސޯޝަލް މީޑިއާގައި އާންމުކުރި ސްޓޭޓްމަންޓެއްގައި ކާ ބުނެފައިވަނީ ކުޑަކަޅުވާ އަށް ލިބިފައިވާ އަނިޔާގެ ސަބަބުން ފުރަތަމަ ދެ މެޗުގައި އޭނާ ނުފެންނާނެ ކަމަށެވެ. އެހެންކަމުން، މިއަދު އަޔަލެންޑާ ދެކޮޅަށް ކުޅޭ މެޗާއި މި މަހު 27 ވަނަ ދުވަހު ނައިޖީރިއާއާ ދެކޮޅަށް އޮސްޓްރޭލިއާ ކުޅޭ މެޗު ކާ އަށް ގެއްލޭނެ އެވެ.
"އަނިޔާގައި ހުންނަން ޖެހުނަސް އަހަރެން މި ހުރީ ޓީމާ އެކު،" ކާ ބުންޏެވެ.
ނިއު ޒީލެންޑާއި ނޯވޭ ބައްދަލުކުރި މެޗުގެ ކުރިން ވަނީ މިއަދު ނިއު ޒީލެންޑްގެ އޯކްލޭންޑް ސިޓީގައި ހިނގި ބަޑިޖެހުމުގެ ހާދިސާގައި މަރުވި ދެ މީހުންނާއި އަނިޔާ ލިބުނު ފަރާތްތަކާ އެކު ތިބިކަމަށް ދައްކުވައިދިނުމުގެ ރަމްޒެއްގެ ގޮތުން ސުކޫތެއް ވަނީ ގެނެސްފަ އެވެ.
ފީފާ އިން ވަނީ ނިއު ޒީލެންޑްގައި ހިނގި މި ހާދިސާއާ ގުޅިގެން ސަލާމަތީ ގޮތުން ޔަގީންކުރަން ޖެހޭ ކަންކަން ވަގުތުން ވަގުތަށް ހަމަޖައްސައި، ބަލަމުން އަންނަ ކަމަށް ބުނެ ބަޔާނެއް ނެރެފަ އެވެ.
