ދެކުނު އެފްރިކާގައި ބާއްވަން ހަމަޖެހިފައިވާ ބައިނަލްއަގްވާމީ ސަމިޓަށް ރަޝިއާގެ ރައީސް ލެޑިމިއަ ޕުޓިން ވަޑައިނުގަންނަވާނެ ކަމަށް ބުނެފި އެވެ.
އޯގަސްޓު މަހު އޮންނަ ބްރިކްސް ސަމިޓަށް ދެކުނު އެފްރިކާއިން ވަނީ ޕުޓިންއަށް ދައުވަތު އަރުވައިފަ އެވެ. އެކަމަކު ޕުޓިން ހައްޔަރު ކުރުމުގެ އަމުރެއް ނެރިފައި އޮތް މައްސަލަ ވަނީ ފެންމަތިވެފަ އެވެ.
ރަޝިއާ ސަރުކާރާ ހަވާލަދީ ރިއާ ނިއުސް އެޖެންސީން ބުނީ ޕުޓިން ދެކުނު އެފްރިކާއަށް ވަޑައިނުގަންނަވާނެ ކަމަށާއި ސަމިޓުގައި ބައިވެރިވެވަޑައިގަންނަވާނީ ވީޑިއޯ ކޯލް މެދުވެރިކޮށް ކަމަށެވެ.
ޕުޓިން ހައްޔަރު ކުރުމުގެ އަމުރު ނެރުނީ އިންޓަނޭޝަނަަލް ކްރިމިނަލް ކޯޓް (އައިސީސީ) އިންނެވެ. ދެކުނު އެފްރިކާއަކީ އައިސީސީގެ މެމްބަރު ގައުމަކަށް ވާތީ އެ އަމުރު ތަންފީޒު ކުރަން ޖެހޭނެ އެވެ.
އެކަމަކު މީގެ ކުރިން ވެސް ދެކުނު އެފްރިކާއިން ވަނީ ބައެއް ގައުމުތަކުގެ ވެރިން ހައްޔަރު ކުރުމަށް އައިސީސީން ނެރުނު އަމުރުތައް ތަންފީޒު ކުރަން ދެކޮޅު ހަދައިފަ އެވެ.
އެހެންވެ، އެ ގައުމުގެ އިދިކޮޅު ފަރާތްތަކުން މި ފަހަރު ވަނީ މައްސަލަ ކޯޓަށް ހުށަހަޅައި، ޕުޓިން ވަޑައިގެންފި ނަމަ ހައްޔަރު ކުރުން މަޖުބޫރުވާނެ ގޮތް ހެދުމަށް މަސައްކަތް ފަށައިފަ އެވެ.
ޕުޓިން ވަޑައިނުގެންނެވި ނަމަވެސް ބްރިކްސްގައި ހިމެނޭ އެހެން ގައުމުތަކުގެ ވެރިން ދެކުނު އެފްރިކާއަށް ދަތުރު ކުރައްވާނެ އެވެ.
ބްރިކްސްގެ މެމްބަރު ގައުމުތަކަކީ ބްރެޒިލް، ރަޝިއާ، އިންޑިއާ، ޗައިނާ އަދި ދެކުނު އެފްރިކާ އެވެ.
