މި މަހުގެ 20-27 އަށް މޮރިޝަސްގައި އޮންނަ މޮރިޝަސް އިންޓަނޭޝަނަލް ބެޑްމިންޓަން ޗެލެންޖުގައި ވާދަކުރާން ގައުމީ ބެޑްމިންޓަން ޓީމް މޮރީޝަސް އަށް ފުރައިފި އެވެ.
ގައުމީ ބެޑްމިންޓަން ޓީމް މިހާރު ތައްޔާރުވަމުން އަންނަނީ އަންނަ މަހުގެ ފަހުކޮޅު މަޑަގަސްކަރައިގައި އޮންނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށެވެ. އެ ގޮތުން ޓީމު މިހާރު ތައްޔާރުވަމުން އަންނަނީ ދެކުނު ކޮރެއާގެ ތަޖުރިބާކާރު ކޯޗެއްގެ އިރުޝާދުގެ ދަށުންނެވެ.
މޮރިޝަސް އިންޓަނޭޝަނަލް ޗެލެންޖަކީ އައިއޯއައިޖީގެ ކުރިން ގައުމީ ޓީމްގެ ކުޅުންތެރިންގެ ލެވެލް ދެނެގަތުމަށް މުހިންމު މުބާރާތެކެވެ. އައިއޯއައިޖީގައި ވާދަކުރާ އެހެން ގައުމުތަކުގެ ގިނަ ކުޅުންތެރިންތަކެއް މި މުބާރާތުގައި ވާދަކުރާތީ މި މުބާރާތުން ރާއްޖޭގެ ކުޅުންތެރިންނަށް ރަނގަޅު ތަޖުރިބާއެއް ލިބޭނެކަމަށް ބެލެވެ އެވެ.
މޮރިޝަސް އިންޓަނޭޝަނަލް ބެޑްމިންޓަން ޗެލެންޖަށް ފުރި ޓީމްގައި ހިމެނޭ ފިރިިހެން ކުޅުންތެރިންނަކީ ހުސައިން ޒަޔާން ޝަހީދު ޒަކީ، ނިބާލް އަހުމަދު، އަހުމަދު ތޯއިފް، މުހައްމަދު އަޖުފާން ރަޝީދު އެވެ. އަންހެން ކުޅުންތެރިންނަކީ ފާތިމަތު ނަބާހާ އަބްދުއްރައްޒާގު، އާމިނަތު ނަބީހާ އަބްދުއްރައްޒާގު، އައިޝަތު އަފްނާން ރަޝީދު، މައިސާ ފަތުހުﷲ އިސްމާއިލް އަދި އާމިނަތު ޝަހުރުނާޒު އެވެ. ޓީމާއިއެކު ކޮރެއާ ކޯޗުވެސް ބައިވެރިވާނެ އެވެ.
މޮރީޝަސް ބެޑްމިންޓަން ޗެލެންޖުގައި ރާއްޖޭގެ ޑަބަލްސް ޕެއާތަކުން މީގެ ކުރިން ވަނީ ގިނަ ކާމިޔާބީތަކެއް ހޯދާފަ އެވެ. މިގޮތުން ގައުމީ ޓީމްގައި މިވަގުތު ތިބި ގިނަ ކުޅުންތެރިންނަކީ މި މުބާރާތުން މެޑަލް ހޯދާފައިވާ ކުޅުންތެރިންނެވެ.
